കൊലൊശ്‌യിര് 3

കിര്ശ്തുവ്ന്റ കൂട്ടത്തൊള്ള പൊളപ്പ്

1അത്കൊണ്ട് നിങ്ങ കിര്ശ്തുവ്ന്റ കൂട്ടത്ത് ഉശ്റ്‌വന്ത് എള്മ്പിയിരക്കന്റതിന്റെ കിര്ശ്തു തെയ്‌വത്ത്ന്റ വലത്തീ മെര്പ്പ്ക്ക് ഇര്ക്ക്ന്റ താവാഞ്ഞ തെയ്‌വം വായന്റ ഒലകത്തീലൊള്ളത് തേടൻ. 2ഈ പൂമിയിലൊള്ള കാരിയത്ത്നപ്പെറ്റി നെനയ്‌ക്കാണ്ടി മേലോകത്തീലൊള്ള കാരിയത്ത്നപ്പെറ്റി നെനയ്‌ക്കണം. 3എന്തനിന്റെ തെറ്റ്കുറ്റം നെറഞ്ഞ നിങ്ങള പളകീ പൊളപ്പ് ചാകത്തം നിങ്ങള ഉശ്റ് കിര്ശ്തുവ്ന്റ കൂട്ടത്ത് തെയ്‌വത്തീല് മറഞ്ഞിരക്കത്തം ചെയ്യ്ന്റ്. 4നമ്മള #3:4 നമ്മള നമ്മള ഇന്റൊള്ളത്ക്ക് പകരം നിങ്ങള ഇന്റാണും ചെല കെയ്യെയ്‌ത്ത് പുത്തകങ്ങളീല് എയ്‌തിയിരക്കന്റത് ഉശ്റാഞ്ഞ കിര്ശ്തു പിന്നയം വെര്വ്നിക്കി അവന്റ മകിമയില് അവന്റ കൂട്ടത്ത് നിങ്ങയും വെര്വ്റ്.

പളകീ പൊളപ്പും പുത്തൻ പൊളപ്പും

5അത്കൊണ്ട് ചാട്ടാത്ത പൊളപ്പ്, ശുത്തിയില്ലാത്ത കാരിയങ്ങള്, കാമം, ചാട്ടാത്ത ഇട്ടം, കാണന്റതൊക്ക വേണം ഇന്റൊള്ള ആർത്തിയാഞ്ഞ ഉര്‌വങ്ങള കുമ്പ്ടത്ത് ഈണയൊള്ള ഈ ഒലകത്ത്ന്റ ഒക്ക ശൊവാവങ്ങളും നിങ്ങള പൊളപ്പീനെന്റ് വിട്ട്കളയണം. 6എന്തനിന്റെ ഈണയൊള്ള കാരിയത്ത്ന ശെല്ലിയാണം തെയ്‌വത്ത്ന്റ മൂച്ച് അവന്റ ചൊല്ല്ക്ക് നെക്കാത്ത ആള്കള്ക്ക് വെന്റത്. 7മുന്തി നിങ്ങ ഒലകത്തീല് ഒള്ളാള്കളപ്പേല പൊളച്ചപ്പൻ നിങ്ങയും ഇതൊക്ക ചെയ്ഞ്ഞ്‌ര്. 8ഇന്റെ ഇപ്പൻ മൂച്ച്, അടക്ക്‌വാനിക്കി പെറ്റാത്ത മൂച്ച്, വയ്‌രാക്കിയം, ചാടിപേശത്ത്, ചാട്ടാത്ത പയമ ഇതൊക്കയം വിട്ട്കളയണം. 9തമ്മ്ളിത്തമ്മ്ളി നൊണ പേശേറ്; എന്തനിന്റെ നിങ്ങള തെറ്റ്കുറ്റമൊള്ള പളകീ ശൊവാവമം അത്‌ന്റ ചാട്ടാത്ത ഒക്ക കാരിയങ്ങളും നിങ്ങ ഊരിക്കളഞ്ഞരില്ലോ? 10നിങ്ങ്ക്ക് ഈ പുത്തൻ ശൊവാവം തന്ത തെയ്‌വം നിങ്ങ്ക്ക് കിര്ശ്തുവ്ന നെല്ല തിക്കൊണ്ടാവാനിക്കി വേണ്ടി നിങ്ങളീല് ഓരോര തെവശമം മാറ്റം വെര്ത്തിത്തിന്ന ഇര്ക്കന്റാര്. 11അത്കൊണ്ട് എകൂതൻ ഇന്റോ എകൂതൻ ഇല്ലാത്തവൻ ഇന്റോ പരിച്ചേതന ഏറ്റവനിന്റോ ഏക്കാത്തവനിന്റോ പരിശ്കാരമൊള്ളവനിന്റോ പരിശ്കാരമില്ലത്തവനിന്റോ അടിമയിന്റോ അടിമയില്ലത്തവനിന്റോ ഇല്ല കിര്ശ്തുവാണും പൂരാള്കളീലും ഒക്കയം ആഞ്ഞവൻ.

12അവൻ ശ്‌നേകിക്കിന്റ ശുത്തിയൊള്ള ആള്കളാഞ്ഞ് തെയ്‌വം നിങ്ങള തേടിയെടത്ത്ത്കൊണ്ട് നിങ്ങ കരണ, മനനോവ്, തായ്‌മ, എളിമ, പൊറ്പ്പ് ഇതൊക്ക ഒള്ളാള്കളാകണം. 13തമ്മ്ളിത്തമ്മ്ളി പൊറ്ക്കത്തം തമ്മ്ളിത്തമ്മ്ളി എന്തനീങ്കിലും ചണ്ടയോചാരിയോ ഒണ്ടാഞ്ഞെ കർത്താവ് നിങ്ങളോട പൊറത്തത് പേല തമ്മ്ളിത്തമ്മ്ളി പൊറ്ക്കത്തം ചെയ്യണം. 14ഇതീക്കായും നമ്മള ഒക്കളയം ഒന്റിച്ചാക്കി തെകിഞ്ഞ ഒര്മീല് നെർത്തന്റ ശ്‌നേകം ഒള്ളാള്കളാഞ്ഞിരവൻ. 15കിര്ശ്തുവ്ന്റ നിമ്മ്തി നിങ്ങള ചങ്കീല് വായട്ടെ; എന്തനിന്റെ ഈ നിമ്മ്തിക്കി വേണ്ടിയാണും നിങ്ങള ഒറ്റ തേകമാഞ്ഞ് വിളിച്ചിരക്കന്റത്; നന്നിയൊള്ളാള്കളാഞ്ഞും ഇരവൻ. 16കിര്ശ്തുവ്ന്റ വയനം നിങ്ങള ചങ്കീല് കൊള്ള ഒണ്ടാക്‌ട്ട്; തെയ്‌വം തെന്റ പുത്തിയോട തമ്മ്ളിത്തമ്മ്ളി പടിപ്പിക്കിത്തം പുത്തിപേശത്തം ചെയ്യൻ. നിങ്ങള ചങ്കീല് തെയ്‌വത്തോട നന്നിയൊള്ളാള്കളാഞ്ഞ് ശങ്കീർത്തന പാട്ട് പാടത്തം തെയ്‌വത്ത്ക്ക് നന്നി പേശന്റ പാട്ട് പാടത്തം തെയ്‌വമം ആഞ്ഞ് ഒള്ള ചേവ കൊള്ള വളന്ന് വെര്‌വാനൊള്ള പാട്ട് പാടത്തം ചെയ്യൻ. 17നിങ്ങ ചെയ്യന്റതം പേശന്റത്‌മാഞ്ഞ ഒക്ക കാരിയങ്ങളും കർത്താവാഞ്ഞ ഏശുവ്ന്റ പേരില് ചെയ്യത്തം അവന ശെല്ലി അപ്പനാഞ്ഞ തെയ്‌വത്ത്ക്ക് നന്നി പേശത്തം ചെയ്യൻ.

ഏശുവ്ന നമ്പന്റ വീട്ട്കാറ്ക്കൊള്ള പുത്തിപേശത്ത്

18വീട്ട്കാറിമാരേ, കർത്താവ്ക്ക് ഒള്ളാള്കളപ്പേല നിങ്ങള വീട്ട്കാറൻമാര ചൊല്ല്ക്ക് നെവൻ.

19വീട്ട്കാറൻമാരേ, നിങ്ങള വീട്ട്കാറിമാരയം ശ്‌നേകിച്ചിടൻ; അവങ്ങളോട എളിമയോട പെനിമാറൻ.

20കുഞ്ച്‌ലേ, ഒക്ക കാരിയത്തിലും നിങ്ങള അപ്പനമ്മമാര ചൊല്ല്ക്ക് നെക്കണം. എന്തനിന്റെ ഇത് കർത്താവ്ക്ക് ഇട്ടമാണും.

21അപ്പൻമാരേ, നിങ്ങള കുഞ്ച്‌ല മനശ് കെട്ത്തിക്കളയാണ്ടി ഇരപ്പാനിക്കി അവങ്ങള മൂച്ചെട്പ്പിക്കേറ്.

22വേലക്കാറേ, ഈ പൂമിയിലൊള്ള നിങ്ങള ഏമാൻമാര ഒക്ക കാരിയത്തിലും ചൊല്ല്ക്ക് നെവൻ; അവങ്ങള ഇട്ടം കിട്ട്‌വാനിക്കി വേണ്ടി അവങ്ങ കാണ്വ്നിക്കി മാട്ട്ക്ക്മില്ല കർത്താവ്ന പേടിക്കന്റത് പേല നെല്ല മനശോട ചെയ്യൻ. 23നിങ്ങ എന്തൻ ചെയ്ഞ്ഞാലും അത് ആള്കള്ക്ക് ചെയ്യന്റത് പേലയില്ല കർത്താവ്ക്ക് ചെയ്യന്റത്പേല നെല്ല മനശോട ചെയ്യണം. 24അവന്റ ആള്കള്ക്ക് വേണ്ടി വെച്ചിരക്കന്റ കൂലി കർത്താവ് നിങ്ങ്ക്ക് തെര്മിന്റ് നെനയ്‌ക്കണം. എന്തനിന്റെ കിര്ശ്തുവാണും നിങ്ങ പെര്കാരിക്കിന്റ ശെരിക്ക്മൊള്ള ഏമാൻ. 25തെറ്റ് ചെയ്യന്റ ഒക്കളക്കും അവാവൻ ചെയ്യന്റ തെറ്റ്ക്കൊള്ള ശിച്ച കിട്ടും; അത്ക്ക് ഒര തിരിവ്മില്ല.

Currently Selected:

കൊലൊശ്‌യിര് 3: മുതുവാൻ

Highlight

Copy