2 കൊരിന്തിയിര് 2
2
1അത്കൊണ്ട് നാന് ഇന്നിയം നിങ്ങള താവ്ക്ക് വന്ത് നിങ്ങള തുക്കിപ്പിക്കേറിന്റ് തീരമാനിച്ചിൻ. 2നാന് നിങ്ങള തുക്കിപ്പിച്ചേ നാന് തുക്കിപ്പിച്ച നിങ്ങയില്ലാണ്ടി വേറ ഏവനാണും എന്ന കൂയെട്പ്പാനിക്കൊള്ളത്. 3-4നാന് മുന്തിയേ നിങ്ങ്ക്ക് എയ്‌തിയത് കൊള്ള തുക്കത്തോടയും മനനോവോടയും കണ്ണ്നീരോടയം ആഞ്ഞ്ത്. അത് നിങ്ങള തുക്കംവെര്ത്ത്‌വാനിക്കില്ല എക്ക് നിങ്ങളോടൊള്ള വെലിയ ശ്‌നേകം നിങ്ങ തിക്കൊണ്ടാവാനിക്കാഞ്ഞ്ത്. നാന് നിങ്ങളാട്ടക്കി വെര്വ്നിക്കി എക്ക് കൂയ് തെന്റ കൂട്ടറാഞ്ഞ നിങ്ങ്ക്ക് എന്ന തുക്കിപ്പിക്കാണ്ടി ഇരപ്പാനിക്കി വേണ്ടിയാണും നാന് ഇത് എയ്‌തന്റത്. നാന് കൂയെട്പ്പ്നിക്കി നിങ്ങയും കൂയെട്പ്പ്റിന്റ് എക്ക് ഒറപ്പൊണ്ട്.
5ഒരത്തൻ എന്ന തുക്കിപ്പിച്ചേ അവൻ എന്നയില്ല, നിങ്ങള ഒക്കളയം ആണും തുക്കിപ്പിക്കിന്റത്. (നാന് അവനപ്പെറ്റി ചാട്ടാത്ത കാരിയം ഒന്റും പേശ്‌വാനിക്കി ഇട്ടപ്പെട്‌ല) 6നിങ്ങളീല് പല ആള്കളും അവന്ക്ക് കൊടത്ത ശിച്ച മതി. 7പകരം നിങ്ങ അവൻ കൊള്ള തുക്കത്തീല് ആണ്ട് പോകാണ്ടിയിരപ്പാനിക്കി അവന എണക്കത്തും അവനോട പൊറ്ക്കത്തം ചെയ്യണം. 8ഇന്റെ അവനോടൊള്ള നിങ്ങള ശ്‌നേകം ഒറപ്പിച്ച് കൊടക്കണമിന്റ് നാന് കെഞ്ചിപ്പേശന്റൻ. 9നിങ്ങ ഒക്ക കാരിയത്ത്ന്റയം ചൊല്ല്ക്ക് നെക്കന്റരാ ഇന്റ് പരിവീശിപ്പാനാണും നാന് എയ്‌തീത്. 10നിങ്ങ പൊറ്ക്കന്റവനോട നാനും പൊറ്ക്കന്റൻ. നാന് എന്തനീങ്കിലും പൊറ്‌ത്തതിന്റെ കിര്ശ്തുവ്ന്റ മൊകത്ത് നിങ്ങള നെമ്മക്കി വേണ്ടി പൊറ്‌ത്തതാണും. 11എന്തനിന്റെ ഇച്ചരാതി നമ്മള തോപ്പിക്കേറ്ത്; അവന്റ തന്തറങ്ങള നമ്മ്ക്ക് തിക്കൊണ്ടില്ലോ.
12ഇന്റെ നാന് കിര്ശ്തുവ്ന്റ നെല്ലശേതി വിളിച്ച് പേശ്‌വാനിക്കി തൊറവാശ് ഇന്റ് പേശന്റ താവീല് വന്തൻ; കർത്താവ് എക്ക് അവട അവന്റ വേല ചെയ്യ്‌വാനിക്കി ഒര വെയ് തൊറന്ന് തന്താര്. 13ഇന്റെ നമ്പീല് എന്റ തമ്പിയാഞ്ഞ തീത്തൊശ്‌ന കാണാഞ്ഞത് കൊണ്ട് എന്റ മനശീല് പുത്തിമുട്ട് ഒണ്ടാഞ്ഞ്ത്; അത്കൊണ്ട് നാന് അവടനെന്റ് മക്കതോനിയക്കി പിയ്യൻ.
കിര്ശ്തുവീല് ഒള്ള നേട്ടം
14കിര്ശ്തുവീല് എങ്ങള എപ്പനം നേടി നടത്ത്ത്തം എങ്ങളീല് അവനപ്പെറ്റിയൊള്ള പുത്തി ഒക്ക താവീലും നെല്ല മണമ്പേല പരത്ത്ന്റവന്‌മാഞ്ഞ തെയ്‌വത്ത്ക്ക് നന്നി. 15രച്ചിക്കപ്പെട്ട ആള്കള നെട്വ്ക്കും നയിച്ച്പോന്റ ആള്കള നെട്വ്ക്കും എങ്ങ തെയ്‌വത്ത്ക്ക് കിര്ശ്തു കൊടത്ത നെല്ല മണമൊള്ള ഏവാരം പേലയാണും. 16നയിച്ച്പോന്റ ആള്കള്ക്ക് എങ്ങ ചാവ്ക്കൊള്ള മണമം രച്ച കിട്ടി വന്ത ആള്കള്ക്ക് എങ്ങ ഉശ്റ്ന്റ മണമം ആണും. ഇന്റെ ഈ വേലക്കി ശോക്ക്തിയൊള്ളവൻ ഏവൻ? 17എങ്ങ വേറാള്കളപ്പേല തെയ്‌വവയനം ആതായത്ത്ക്ക് വേണ്ടി പേശന്റാള്കളില്ല. ഇന്റെ നെല്ല മനശോടയം തെയ്‌വം വിട്ട ആള്കളപ്പേലയും തെയ്‌വമൊകത്ത് കിര്ശ്തുവ്ന്റ നെല്ലശേതി പേശന്റം.
Currently Selected:
2 കൊരിന്തിയിര് 2: മുതുവാൻ
Highlight
Share
Copy
Want to have your highlights saved across all your devices? Sign up or sign in
© New Life Literature
