Rud Nuarin-tas alupas 4.
Nuarin-tas alupas 4.
1 Et ahlaig vai natimi ehpan iran uhup a Boas an nuhup u ilpu atimi alupas an maliyum. 6 Et esjum aien par auanimtan uman iyehki et idivaig nedo an pece Isreel. 9 Et auanimtan uman a Boas. 11 Et leh Rud ehgan aien. 13 Et apos Obet mapoi Tevit a Rud. 18 Inhal u Feres im ilpu mapon.
1IS apan a Boas an neucse nathatahau, um ateucse eahki: is atga eahki a natimi ehpan iran esjilid iyehki, is tas vai yin a Boas; is ahlaig vai yin aien an nidan, um ika ehelen, Apam aiek um ateucse igcaki. Is apan aien um ateucse.
2Is lucsei atimi is ten aien irai ilpu atimi alupas an maliyum, um ika, Akumu ateucse igcaki aijaua. Eris ateucse ara.
3Is um ika aien ehele natimi ehpan iran esjilid iyehki, Et ahtai a Neomai, aien is ahes irai Moab aien um apam igcaki, nuarin nobohtan et ethi, is ohuun a Elimelek etwaijau:
4kis ika ainyak ki imiabrai euc ainyak, um ika, Namu auanimtan aiek an nuhup u atimi, im lep an nuhup u ilpu atimi alupas an pece unyak. El et merit aiek nauanimtan vaig, namu auanimtan aiek: ja el et eti merit aiek nauanimtan vaig, asuptecnaig ehelek, mika ki ato ainyak: et eti lep eteuc tah nauanimtan vaig, aiek ache; nai uhup aiek, ja par apitac ainyak. Is ika aien, Ekpu auanimtan ainyak.
5Is lep tas a Boas, um ika, An nadiat inig an auanimtan uman aiek ehele Neomai, namu lep auanimtan aiek Rud nup u Moab, ehgai natimi mas iyehki, mika an imiatidai nidai natimi mas iyehki an nuarin nobohtan o un.
6Is ika a natimi ehpan iran esjilid, Et ehka vai nyak nauanimtan vaig imtak, vai ki jim auahas nuarin nobohtan unyak ainyak; namu auanimtan imtam aiek nitai inig et idim tau irak; et idim ehka vai nyak nauanimtan vaig.
7Nedo o nup Isreel itu acen nigki, an nauarimtai itai vaig, im nahtai jipe itai vaig, mika yi pu ipjin niji itai asega; is atipagki su o un tah natimi, um alupai etwan: is itai asjaaicnaig an pece Isreel nedo inigki.
8Is ika a natimi ehpan iran esjilid iyehki ehele Boas, Namu auanimtan intam aiek. Is atipagki su o un aien.
9Is tas a Boas ehele ilpu atimi alupas, im lep atimi asega, um ika, Eka ato aijaua an nadiat inig mika, ek mun auarimtai itai asega u Elimelek ainyak, im niji itai asega u Kilion, im niji itai asega u Meelon ehele Neomai.
10Ek mun lep auanimtan Rud ainyak nup u Moab, ehgai Meelon, mika yi ehgak aien, par imiatidai nidai natimi mas iyehki an nuarin nobohtan o un, va uhpu jim atipagki nidai natimi mas iyehki ehele ilpu etwan, im lep an neucse neom o un: eka ato nitai iji igki aijaua inpig.
11Eris ika natimi asega eris amen an neucse nathatahau ara, im ilpu atimi alupas, Ecra ato nitai iji igki aijama, Etmu ika a Ihova yi idivaig Rejel im Lia a intakata inig, et mun ham anliin neom unyum aien: eris ahes ira ahwat rahki a nup Isreel; etmu ago nedo upene Efrata aien, uhmu lep imiahpas nidan Bedlehem:
12erumu idivaig ilpu mapoi Feres a ilpu mapom, aien ahki is apos yin a Temar imi Juta, vai ilpu halav unyum etpu alupai euc a Ihova irai intakata takuras inigki.
13Is leh Rud ehgan a Boas: is wat amen ehelen aien, is ika a Ihova yi asvalav aien, is um apos inhalav atamaig o un aien.
14Eris tas a ilpu takata ehele Neomai, um ika, Naaurinig vai Ihova va nedo o un, nikavaig, is eti udei euc aien, jam alupai euc natimi ehpan iram esjilid, va etpu esjilid nidan an pece Isreel.
15Etpu imiatumumoh euc aien, um aminjinai euc an nefatimi unyum: et mun idim apos yin a ehgai inhalav atamaig unyum, aien et aiyu inliinmopon aien vai euc, et lep esjilid aien vai euc irai ilpu halav atamaig et seven.
16Is leh inhalav iyehki a Neomai, um ati yin an ritin, um aminjinai yin.
17Eris anvi nidan a ilpu takata, ilpu atimi eblaamnem o un marom, um ika, Eh mun apos inhalav atamaig et ethi imi Neomai; eris anvi nidan par ika Obet: is etmai Jese aien, is etmai Tevit a Jese.
18Eris ilpu mapoi Feres ara sji igki: is apos Hesron a Feres,
19is apos Ram a Hesron, is apos Aminatab a Ram,
20is apos Neeson a Aminatab, is apos Salmon a Neeson,
21is apos Boas a Salmon, is apos Obet a Boas,
22is apos Jese a Obet, is apos Tevit a Jese.
Currently Selected:
Rud Nuarin-tas alupas 4.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)