Taitashi 2
2
Kulongesha kwa kupwisha
1Ngoboni obe longesha bya ku fwanina ku longesha kwa kupwisha. 2Tongweza balume bashikulwane ngayi benge ba kubomba, bakakutenda bya kulubuluka, baka bihanganiko bya ngana, bakakukulupila kwa kupwisha, bakashishemo nabaka lunzewe. 3Kami tongweza bambuyama bashikulwane ngayi bekale na biheka byabiwahe. Hinga benga Bakakatungwila, hinge bakakukolwa. Banafwanini ku longesha byuma byabiwahe, 4mwanga batweshe ku longesha tunkanga ngayi bahake bakokwabo na bana babo. 5Babalongeshe ngayi bekale na bihanganiko bya ngana, balilame, benge bakakulama shiwahe minkanda yabo, bekale na shishemo, kami bombatale ku bakokwabo, ngayi lizu lya Nyambi libule kuhanduliwa.
6Nohobene ambila bandumbana ngayi benge bakakulilama. 7Mu byuma nimwabyo, obe winge mukakutenda byabiwahe ngayi mwanga bamonene kukwobe. Ebye uku longesha binge bya kupwisha, kami ulongeshe na maleema. 8Wambe mazu akupwisha, ngayi kubule wakunyanciwa, pe baya ba kukulwisha mwanga bayene, ndaba bakabula shuma sha shibi sha kwamba hahetu.
9Longesha bandungo ngayi bombatale bahekulyabo, mwanga babawahililishe mu byuma nimwabyo, kami hinga balikanangana nabo. 10Hinga bayibila bahekulyabo, ngoboni bikati nimwabyo bamoneshe wuwahe na kupwisha, mwanga mu byuma nimwabyo, bamoneshe wuwahe wanebye banalilongeshe bya Nyambi Mupulwishi wetu.
11Nyambi unamoneshe nceshe zendi za kupulwisha bantu nimwabo. 12Nceshe zendi ziku tu longesha ngayi tukane mashewinizi ha bya Nyambi na kukana mahungu a bya muno mu kaye, mwanga tulilame, twikale na bihanganiko byakwoloka, twinge bakakulemesha Nyambi muno mu kaye, 13oho tukutatilila Mutena wa mfuywezi uya tukulumbeza oho kukaholoka wuwahe wa Nyambi wamunene na Mulamwini wetu Yeshu Kilishitu. 14#Nyi 130:8; Kut 19:5; Nday 4:20; 7:6; 14:2; 1Pita 2:9. Ou walitupwile niye mwine ndaba ya netu, ngayi atukulize ku wubi nimwawo, pe watuyeleshele ngayi twinge bantu bendi niye mwine, baya ba ku zundamina kutenda milimo yayiwahe.
15Ebye nibyo byuma unafwanini ku longesha. Bashumankanishe kami bakalihile na ngovu nimwazo. Hinga witabila ngayi muntu wamina akuyinishe.
Currently Selected:
Taitashi 2: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.