Zincimpi 22
22
1Lizina lyaliwahe likupitakana wuheti wawingi,
kami kuyamiziziwa kunengi kwakuwahe kupitakana shiliva hinge ngolinde.
2Bakakuheta na bancepwe bakwezekela hamo,
Nyambi ya Ngula niye wa balengele nimwabo.
3Muntu wangana waholamanga ndi namono malamo,
ngoboni shibulangana ukuhenyenako pe hakwikala mu wukalu.
4Kulilimbwilisha na kuyuvwila Nyambi ya Ngula bowa,
byaletanga wuheti na maleema na wumi.
5Mu nzila ya muntu wakuluwa muli mihongela na tuntamba,
ou ukulilama ukwikala hahatali nabyo.
6Longesha kanuke nzila ya ku fwanina,
pe akakula kukafumamo wufwako.
7Mukakuheta wenga hekulya ncepwe,
mukakutambula mukuli wenga ndungo ya uya namupana.
8Muntu ukushanga kuluwa ukateza makando,
pe kuyandisha kwa baminobe kukamana.
9Mukakuhana ukatambula mfuywezi,
ndaba wapananga byakulya byendi ku bancepwe.
10Tanda muntu wa wuncengwe,
pe nkani na kulyamba bikamana na lihandu likapita.
11Ndi muntu uku haka mutima na nyambilo ya nceshe,
ukenga muhoni wa mwene.
12Meho a Nyambi ya Ngula apenzanga ha uya uli na kalimukisho,
ngoboni wakanangananga mazu a muntu wa mahalo.
13Muvwa ukwamba ngayi, “Ha munkanda hali shimbwi,
nikazihiwila mu mikwakwa.”
14Kanwa ka mbuyama walwiholwiho kanengi linkwina lya kunonka,
Nyambi ya Ngula ukapilamina muntu ndaba ukawilamo.
15Kuyeba kwekalanga mu mutima wa kanuke,
ngoboni lunyanzi luka mushangamisha na kufumisha kuyeba mumwendi.
16Ou ukulyatilila bancepwe ngayi mwanga avulishe wuheti wendi,
na nou ukupana bakakuheta, wuncepwe ukabezilila nimwabo.
Mazu Makumi Ahatu a Ngana
17Tengeka litu lyobe, mwanga uyuvwe mazu a bantu bangana,
na kuyaka mutima wobe ku bya kalimukisho.
18Ndaba shikenga sha kuwahilisha kubilama mushali shobe,
ndi nimwabyo bikwikalanga ha mivumbo yobe.
19Nikushinga ngayi ukulupile muli Nyambi ya Ngula,
nisho shuma nika kutongwezelabyo.
20Kati shilolo nikutikitile zinyambilo makumi ahatu,
za ngana naza kalimukisho,
21kuku monesha ebye byenga byabiwahe na kupwisha,
ngayi uka ba kumbule na kupwisha obo bakakutuma ndi?
Kushiwulula 1
22Hinga uyibila ncepwe ndaba ngayi nengi ncepwe,
hinge kuyandisha bakakuyanda mu nkuta.
23Nyambi ya Ngula ukemanina shambo shabo,
uku bipisha wumi wa baya ba kubabipisha.
Kushiwulula 2
24Hinga ulimama wuhoni na muntu wa kapilamina,
hinge kwenda na muntu wamukali,
25kutina ulilongesha zinzila zendi na kulimanga obe mwine mu lunyimbwa.
Kushiwulula 3
26Hinga winga umo wanibo ba kukulupisha na lukushi kuyavwa muntu ku mulandu wendi,
hinge kwimanina muntu ku mikuli yendi.
27Ndi wufwabyo byuma bya kuyumba,
bakakuyangula wulili wobe oho hinga walanganaho?
Kushiwulula 4
28Hinga uhenyesha nginza
iya bayakile batatizobe bashikale.
Kushiwulula 5
29Kati mwamona wawuntungu mu mulimo wendi ndi?
Wanoho ukemana kumbili ya bamyene,
kukemana kumbili ya bantu tuhu wufwako.
Currently Selected:
Zincimpi 22: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.