Kulaba 19
19
Mutoko wa ngombe ya kufubila
1Nyambi ya Ngula wambile kuli Moshesha na Aloni ngayi, 2“Mutongweze Baishalela ndayano eze ngayi, mulete shitole wa ngombe wakufubila uya wakubula nyanco kami uya wakwinga hinga atanga kutendaho mulimo, 3pe mumupanike kuli mukankombela Eliza. Ukatwaliwa ha munkanda wa munkungwa na kuzihiwila hambili yendi. 4Niho mukankombela Eliza ukashimba mukeza wayo umo pe ukawumyanzila na munwe wendi bikati mutanu na bibili kulwa Ntanda ya shikungulukilo. 5Shimuna wanzimba na shitembe na nyama na mukeza na mila, bikahokeshewe hambili ya mukankombela. 6Pe mukankombela ukashimba mutondo wa shinda na mwahi wawushe wa hishopu na lunyimbwa lwa kufubila, pe ukabiyumbila mu mundilo. 7Mukankombela amanisha kutenda noho, niho ukayowesha bivwalo byendi na kuyowela ha lutu, nohoboni haya mwanga atweshe kwingina mu munkungwa, ngoboni ukwikala hinga enga wa mazilo hantu naku mazolo. 8Muntu uya wahokesha ngombe wa shitole naye kami uku fwanina kuyowesha bivwalo byendi na kuyowela ha lutu, ngoboni kami ukwikala hinga enga wakubula kuyela hantu naku mazolo. 9#Bah 9:13.Niho muntu uya unengi wa kuyela niye ukukundula uya mutoko wa ngombe wa shitole na kuwuyaka mu mwanya wa kuyela ha munkanda wa munkungwa, oku bakawulamanga kwinga wa likunge lya Ishalela mu kuliyavwisha ha kuwahisha mema akufumisha byabibi. Shiheka eshe shikutendiwa sha kuliyelesha ku wubi. 10Muntu uya wakundula mutoko uku fwanina kuyowesha bivwalo byendi, ngoboni ekale hinga enga wa mazilo hantu naku mazolo. Ndayano eze zikashuma ku shikati nimwasho ku wubili wabo Baishalela na mapukwenda bazika mukati kabo.”
Kukwata ha mutuntu wa muntu wakufwa
11“Muntu nimwendi ukukwata mutuntu wa muntu wakufwa, unabipi ku matena mutanu na abili. 12Uku fwanina kuliyelesha niyemwine na mema akuyelesha ha mutena wawuhatu naha mutena wa mutanu na wawubili, pe ukenga wa kuyela. Ngoboni ndi abulu kuliyelesha niyemwine ha matena awa abili, pe kwinga wa kuyela ufwako. 13Muntu nimwendi wakukwata ha mutuntu wa muntu, pe a kubula kuliyelesha niyemwine uli na mazilo, ndaba mema akuliyelesha nawo kumwangiwila hahendi afwako. Unazilululu ntanda ya shikungulukilo sha Nyambi ya Ngula, pe kami kuhanganikiwila kwinga umo waku bantu ba Ishalela ufwako. 14Muntu nimwendi ukufwila mukati ka ntanda, pe muntu nimwendi ou uli muya mu ntanda ha shikati sha lufu, hinge ou ukwinginamo unabipi ku matena mutanu na abili. 15Ntesho nimwayo kami yiya yili mu ntanda, ya kubula muhuko ku kanwa kayo, pe yinabipi. 16Muntu nimwendi ukukwata mutuntu wa muntu wa kufwa ku mponde, hinge unafu na kukola, hinge muntu nimwendi ukukwata shifupa sha muntu wakufwa, hinge ha shinzimbi, unabipi ku matena mutanu na abili. 17Ha kufumisha bya mazilo, mutoko umo wa ngombe wa shitole wa kufubila uya wahokeshiwile kwinga ntupu ya ha wubi ukashimbiwa na kuwuyaka mu nyungu, pe baka wezelelamo mema akukeluluka. 18Mu kubalika tuhu, muntu umo uya wa kuyela ukashimba mwahi wawuwahe wa hishopu na kuwu zubika mu mema na kumyanzila ha ntanda na byuma nimwabyo bilimo na bantu aba banekalamo. Ha ku bokelaho, muntu nimwendi uya wa kuyela ukamyanzila mema ha muntu ou wakwata shifupa sha muntu wakufwa, hinge mutuntu wa muntu wakufwa ku mponde, hinge shinzimbi. 19Ha mutena wawuhatu naha mutena wa mutanu na abili, muntu uya wa kuyela ukamyanzila mema ha muntu uya nabipi. Ha mutena wa mutanu na abili ukuyelesha muntu, uya niye wayoweshakale bivwalo byendi na kuyowela ha lutu, pe ukenga wa kuyela ku mazolo.
20“Muntu uya nimwendi unalibipishi ndi ukubula kuliyelesha niyemwine ukekala hinga enga wa mazilo, ndaba ufwako kuliyelesha na mema. Pe ukuzilula ntanda ya Nyambi ya Ngula, kukahanganikiwila kwinga umo waku bantu ba Nyambi ufwako. 21Mukalame ndayano zino ku shikati nimwasho sha kumbili. Muntu uya wamyanzilanga mema akuliyelesha niye kami uku fwanina kuyowesha bivwalo byendi, muntu nimwendi wakukwata mema anashalaho pe nalibipishi hantu naku mazolo. 22Shuma nimwasho eshe akakwata muntu uya unalibipishi, pe nimwasho shinabipi, kami muntu nimwendi uya wakukwatasho unabipi hantu naku mazolo.”
Currently Selected:
Kulaba 19: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.