Kulaba 1
1
Kulaba Kwakutatika kwa Ishalela
1Ha mutena wakutatika wa ngonda wawubili mu mwaka wawubili oho bantu ba Ishalela bafumakale ku Engepita, Nyambi ya Ngula wambile kuli Moshesha kuyo ku Ntanda ya Shikungulukilo mu Libelelengwa lya Shinayi. Wambile nehi ngayi, 2“Obe na Aloni mukalabe bantu ba Ishalela mu mavumo namu mapashi. Tikitenu mazina a balume nimwabo 3ba myaka makumi abili hinge ba kukula kupitakana oho, aba banakumu ha kulwa nzita. Obe na Aloni ukatikitishe banzita. 4Mukatule mukulwane umo wamu livumo ku mushobo na mushobo akamiyavwe. 5Aba nibo balume bakakutwaminina mukati ka mishobo yabo, ba ku fwanina kumiyavwa mukutenda ou mulimo. Ku mushobo wa Lubena ukamiyavwa Elizula, mwana Shendula, 6ku mushobo wa Shimiyoni, Shelumiyela mwana Zulishandayi, 7ku mushobo wa Yunda, Nahishoni mwana Aminandabe, 8ku mushobo wa Ishaka, Natanele mwana Zuwala, 9ku mushobo wa Zembuloni Eliyambi mwana Heloni, 10kuli bana ba Yoshefwa babalume ku mushobo wa Efulemu, Elishama mwana Amihundi, ku mushobo wa Manashe, Ngamaliyele mwana Pendahizu, 11ku mushobo wa Mbenjamani, Ambindani mwana Ngindiyoni, 12ku mushobo wa Ndani, Ahiyaza mwana Amishandayi, 13ku mushobo wa Asha, Pangiyele mwana Okilani, 14ku mushobo wa Ngandi Eliyashafwi, mwana Ndeulu, 15ku mushobo wa Nafwitali, Ahila mwana Enani.” 16Aba nibo bantu bahatiwile mu shikungulukilo, bakakutwaminina mishobo ya bankakazabo, bakulwane ba mavumo a Baishalela.
17Moshesha na Aloni bashimbile aba bantu banatoyiwi mazina, 18pe behanine hamo likunge nimwalyo ha mutena wakutatika wa ngonda wawubili. Pe batikitile bantu nimwabo mu livumo namu livumo, mazina a balume ba myaka makumi abili hinge ba kukula kupitakana, batikitiwile na kulabiwa, 19ngonehe Nyambi ya Ngula atongwezele Moshesha. Nohobene Moshesha alabililemo bantu mu Libelelengwa lya Shinayi. 20Ku bazukulya Lubena mwana Ishalela wa mweli, watikitile mazina a balume nimwabo ba myaka makumi abili hinge ba kukula kupitakana oho, ku mavumo naku mapashi wabo. 21Palo ya bantu bawanine ku bazukulya Lubena bengile 46,500. 22Ku bazukulya Shimiyoni, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo. 23Bantu balabile ku bazukulya Shimiyoni bengile 59,300. 24Ku bazukulya Ngandi, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi. 25Bantu balabile ku bazukulya Ngandi, bengile 45,650. 26Ku bazukulya Yunda, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi. 27Bantu balabile ku bazukulya Yunda, bengile 74,600. 28Ku bazukulya Ishaka balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo. 29Bantu balabile ku bazukulya Ishaka, bengile 54,400. 30Ku bazukulya Zembuloni, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo. 31Bantu balabile ku bazukulya Zembuloni bengile 57,400. 32Ku bana ba Yoshefwa, bazukulya Efulemu, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo. 33Bantu ba ku Efulemu balabiwile ku bazukulya Yoshefwa, bengile 40,500. 34Ku bazukulya Manashe, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo. 35Bantu balabiwile ku bazukulya Manashe bengile 32,200. 36Ku bazukulya Mbenjamani, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo. 37Bantu balabiwile ku bazukulya Mbenjamani, bengile 35,400. 38Ku bazukulya Ndani, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo. 39Bantu balabile ku bazukulya Ndani, bengile 62,700. 40Ku bazukulya Asha, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo. 41Bantu balabile ku bazukulya Asha, bengile 41,500. 42Ku bazukulya Nafwitali, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo. 43Bantu balabile ku bazukulya Nafwitali, bengile 53,400. 44Aba nibo balabiwile kuli Moshesha na Aloni na baya bakakutwaminina ba Ishalela likumi na babili, muntu na muntu wemaninine livumo lyendi na lupashi lwendi. 45Baishalela nimwabo ba myaka makumi abili hinge ba kukula kupitakana oho, aba banakumu ha kulwa nzita balabiwile kwezeka ngo mu mapashi wabo. 46Bantu nimwabo balabile bengile 603,550.
47Ngoboni Balevi kaliha batikitiwile hamo na mishobo yamina, 48ndaba Nyambi ya Ngula wambile kuli Moshesha ngayi, 49“Oho ukalaba bantu nimwabo Baishalela banakumu ha kulwa nzita, hinga ukayakako mushobo wa Balevi. 50Ngoboni uyake Balevi kukulama Ntanda ya Shikungulukilo na byuma byayo nimwabyo bilimo. Bakakulika byuma byayo nimwabyo na kutendelamo, kami bakayizinguluka ha kuzika munkungwa. 51Shikati nimwasho oho mu kutuntula munkungwa wenu, Balevi nibo bakatuntula ntanda nakwimikayo kami ku munkungwa wawupya. Muntu washenge ou ukwiza kwakwipi na ntanda ukazihiwa. 52Wingi wa Baishalela bakatenda munkungwa litanga na litanga, muntu na muntu ha muhoko wendi niyemwine, kami mu nceto ya ndembela yendi. 53Ngoboni Balevi bakatula na kuzinguluka ntanda ya wupaki na kuyilama ngayi mwanga kukabule muntu wakwiza kwakwipi na ku shonkomona wukali wami wakukama likunge lya Baishalela.” 54Nohobene bantu ba Ishalela batendele byuma nimwabyo biya Nyambi ya Ngula atongwezele Moshesha.
Currently Selected:
Kulaba 1: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.