Yoshuwa 2
2
Yoshuwa ukutuma bakakuhokela ku Yeliko
1Niho, Yoshuwa mwana Nune, atumine balume babili kufuma ku Shitimu kuwi kuya mu kuhokela, wambile ngayi, “Yenu mu kuhokela litunga, shinene lukena lwa Yeliko.” Oho bakumine mu lukena, benginine mu lukena bayile mu kutulila ku litala lya mbuyama walwiholwiho watumbiwile ngayi Lahambu. 2#Bah 11:31; Yako 2:25.Niho mwene wamu Yeliko ayuvwile lushango ngayi kuli Baishalela bamo banezi kuno mazolo mu kuhokela litunga. 3Nohobene mwene wamu Yeliko watumine lizu kuli Lahambu ngayi, “Tutwishila obo balume bali mu litala lyobe ha munkanda, obo banezi mu kuhokela lino litunga nimwalyo.”
4Ngoboni mbuyama waholekele baya balume babili, niho akumbwile ngayi, “Kupwisha, balume bamo beza ku litala lyami, ngoboni kaliha nalimukile oku bafuminine. 5Baya tuhu ha kulela kwa mutena, oho lipangati lyamu lukena shilolo lishinkiwe. Nabula kubepula ngayi bakuya kuti, ngoboni ndi ba kubakonka shawangu, pe bakabawana.” 6Ngoboni Lahambu oho watwalakale bakakuhokela hayilu ya shihoke na kubaholeka ku nceto ya ntende, ziya ayakile ha shihoke sha litala. 7Oho balume batutikile mu lukena, pe lipangati lyashinkiwile. Bayile na kushingashinga bakakuhokela ba Ishalela babakonkele kukakuma naku mwaba wakuzabuka mushinzi wa Yondana.
8Oho shilolo bakakuhokela ba Ishalela balale, Lahambu wakandamine hayilu ya shihoke sha litala, 9pe wambile kukwabo ngayi, “Nikulimuka ngayi Nyambi ya Ngula unamipaniki litunga lino. Nimwabo mwabo muno mu litunga banamitampwa. 10#Kut 14:21; Kul 21:21-35. Tunayuvwu eshe Nyambi ya Ngula ayumishile kumbili yenu Liwate lya Kufubila oho mwafuminenga mu Engepita. Tunayuvwu kami eshe mwalobeshele bamyene babili ba Baamoli, ba Shihoni na Ongi, aba bekalile ku mushamuko wa Yondana. 11Pe oho twayuvwileko, twatinine. Nimwetu twabulile ngovu ndaba yanenu, ndaba Nyambi ya Ngula, Nyambi yenu wenga Nyambi wa muyilu na hano hanci. 12Haya libezenu mu lizina lya Nyambi ya Ngula ngayi mukayuvwile nceshe ba lupashi lwami, ngonehe shiya namiyuvwili nceshe. Kami mpanenu kalimukisho kamo kaya nikatwesha kumi kulupila. 13Nkulupishenu ngayi mukalamwina batate na bamawa na bampanzami na bayaya babakazi na ba lupashi lwabo nimwabo. Hinga mutuleha ngayi tuzihiwe.”
14Balume bakumbwile kukwendi ngayi, “Nyambi mwanga atole wumi wetu kuhingisha mu wumi wobe ndi kutenda ngonehe tukwamba tufwako. Ndi obe kutongwezako muntu enge yani hinge yani ebye tunatendenga ufwako, pe tukatenda kukwobe na nceshe na kwoloka, tukalama shikulupisho shetu kukwobe oho Nyambi ya Ngula akatupana litunga elye.”
15Lahambu wekalilenga mu litala lyatendiwilile kumo na kembi ka lukena, nohobene wanyenzumwishile balume na lunyimbwa mu limpananga. 16Wambile kukwabo ngayi, “Yenunga ku litunga lya binkanda, kutina bantu ba mwene bakamiwana. Mukaholame matena ahatu, hantu banaboko. Nohoboni mutweshe kuya mu nzila yenu.”
17Balume bambile kuli Lahambu ngayi, “Tukalama shikulupisho ngonehe shiya wamba ndi obe kami ukalama ebye twali yuvwashana. 18Oho tuka katukila litunga lyobe mutakwe eshe nisho wafwanina kutenda, manga lunyimbwa lwa kufubila ku limpananga elye watu nyenzumwishila. Yingiza batatiyobe na bamandiyobe na bayayizobe, nimwabo ba lupashi mu litala lyobe. 19Ndi muntu wamina ukututikila ha munkanda wa litala lyobe, lufu lwendi lukenga mulandu wendi, pe etu kukekalaho na mulandu ha lufu lwendi tufwako. Ngoboni ndi muntu wamina uli nendi muno mu litala ukalemana, pe ukenga mulandu wetu. 20Ngoboni ndi ukushimika ebye tunatendenga pe netu kukalama shikulupisho shetu eshe wafunga ngayi tukukulupishesho tufwako.” 21Wetabilile pe wabafunzwile. Lahambu wamangile lunyimbwa lwa kufubila ku limpananga oho bayakale.
22Bakakuhokela bayile mu binkanda, pe baholamine. Oho bantu ba mwene babashingilenga mu zimbalila nimwazo za litunga ha matena ahatu, kaliha babawanine, nohobene babokele ku Yeliko. 23Niho baya bakakuhokela babili ba kunkulukile ha binkanda, pe bazabukile mushinzi, niho babokele kuli Yoshuwa. Pe, bamutongwezele byuma nimwabyo biya byamonekele. 24Bambile kukwendi ngayi, “Kupwisha bene Nyambi ya Ngula unatupaniki litunga nimwalyo. Bantu ba kuyo nimwabo banatutampwa.”
Currently Selected:
Yoshuwa 2: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.