Ndanyele 5
5
Mayambwayambwa a Mbeleshaza
1Mwene Mbeleshaza watendelele mayambwayambwa amanene bantu bendi babalemu likulukazi, pe wanwine nabo waine. 2Oho bashingile kukolwa, Mbeleshaza wabatongwezele ngayi balete zinkomoki za ngolinde na shiliva na zindonga ebye akaletele tatiyendi Nembukandineza mu Litala lya Nyambi mu Yelushalema, ngayi Mwene na babilolo bendi babalemu na mahano bendi na bakazendi bakwinginina batweshe kunwinamo. 3Wanguwangu zinkomoki za ngolinde na zindonga byaletiwile biya bakafumishile ku Litala lya Nyambi, mu Yelushalema pe nimwabo banwinininemo, Mwene na babilolo bendi babalemu na mahano bendi, hamo na bakazendi bakwinginina, 4Aha banwinenga waine, pe bayemezele banyambi aba babumbiwile ha ngolinde na shiliva na lubemba na shondo na kubaza ha shitondo na limanya.
5Babazumukile tuhu minwe ya liboko lya muntu lyamonekele litikita ha limota lya kulambulula lya musheke wa mwene kuliyahikiza na lyeyeko lya zimuni, pe mwene wamonene liboko eshe lyatikitilenga. 6Niho lupala lwa mwene lwafutukile kutubuluka, pe walakamine shikuma kami wakankishile manungo wendi. 7Mwene wabilikizile ngayi balete bakamalele na bakakupenza bya nyenye na bambuki. Oho bezile kuli mwene, pe mwene wambile ku bakangana ba Mbambiloni ngayi, “Muntu ou nimwendi ukutwesha kulaba eye ntikitilo pe ukuntongweza eshe bikutontoloka ukavwikiwa bivwalo byabitali bya wene bya shimbombo na kuvwala nketwana za ngolinde mu ncingo yendi, pe ukatendiwa kwinga wa wuhatu ku wukulwane wakulela mu wene.” 8Niho bakangana bamwene nimwabo bakumine, ngoboni kowa muntu kukwabo watweshele kulaba ntikitilo hinge kutongweza mwene eshe bikutontoloka. 9Haneshe Mwene Mbeleshaza waliyakatile shikuma na kufutuka wakupempuka, bantu bendi babalemu babulile na kulimuka sha kutenda.
10Manda bamyene oho ayuvwile mazu a mwene na babilolo bendi babalemu pe wenginine mukati ka litala lya mayambwayambwa. Lihano wambile ngayi, “Obe mwene ya Ngoma uyoyenga mwaya myaka. Hinga upempuka mutima hinge ku monesha kufutula lupala lwobe. 11Kwali muntu umo mu wene wobe ou uli na moyo wa banyambi ba kuyela. Ha matena a kulela kwa tatiyobe, ou mulume wamoneshelenga ngana zaziwahe, tatiyobe wamuyakile ha wukulwane wa Bakalandeya, bakamalele na bambuki. 12Ndaba ou mulume Ndanyele mumwendi mwawaniwile mutima wangana na kalimukisho na kanangatima kakutwesha kutontolola milo na kukumbula tushau na kutontolola bya kulimba, nohobene yihanenu ou mulume Ndanyele, ou atumbile mwene ngayi Mbeleteshaza eze kukwobe mu kukutongweza nimwabyo eshe bikutontoloka.”
Ndanyele ukutontolola byatikitiwile
13Niho Ndanyele bamuletele mukati kuli mwene. Mwene wambile kuli Ndanyele ngayi, “Kati unengi uya Ndanyele wa Kayunda waha bantapwa aba tate afumishile ku Yunda ndi? 14Nayuvwa ngayi moyo wa banyambi uli mu mwobe kami ngayi mutima wangana, wa kalimukisho na kanangatima. 15Bakangana na bakamalele baletiwa mu kulaba ebye byatikitiwile ngayi bantongweze eshe bikutontolola, ngoboni bakwanga. 16Haya nayuvwu ngayi obe ukutwesha kutontolola bya kuholama na byambo byabikalu. Ndi ukutwesha kulaba ebye binatikitiwi na kuntongweza eshe bikutontoloka, ukavwalikiwa mu bikobelo byabitali bya wene bya shimbombo na nketwana za ngolinde za maleema na kuzishukika mu ncingo yobe, kami ukenga wa wuhatu ku bakakulela mu wene.”
17Niho Ndanyele akumbwile kuli mwene ngayi, “Litentekele bishemo byobe. Panika ncuungu yobe ku muntu wamina. Ngoboni hinge shingi noho nikakulabila Obe Mwene ya Ngoma eshe shinatikitiwi na kukutongweza eshe shikutontoloka.
18“Obe mwene ya ngoma, Nyambi Wakukangana niyemwine wayakile tatiyobe Nembukandineza kwinga mwene wamunene shikuma pe wamupanikile maleema na wene. 19Pe ndaba ya mwanya wawunene shikuma amupanine bantu ba mishobo nimwayo na matunga nimwawo na zindimi bamutininenga na kumukanka. Obo mwene ashingile kuziha, wabazihile, baya ashingile kukatula ashingile kuyoyesha wabayoyeshele. Wabakatwile na baya ashingile ku shampula, wabashampwile. 20Ngoboni oho mutima wendi niye walilundumikile na kuwu kaluhisha, ndaba ya kuliyemeza, pe wafumishiwile ha litanda lyendi lya wene kami wayawile mwanya wendi wa maleema. 21Watandiwile mukati ka bantu, pe mutima wendi wafutukile ngo wa kayamana. Wayoyele hamo na bambongolo ba lishaka, walile mwila ngo zingombe, lutu lwendi lwazambalalile na mume wawilenga kuyilu. Hantu noho etabilile ngayi Nyambi Wakukangana ukulela wene wa bantu, kami ukutwesha kupana ku muntu enge yani ou akushinga.
22“Na nobe mwanendi wa mulume, Mbeleshaza wufwako kulilimbwilisha obemwine, hinge ndi walimukile eshe nimwasho. 23Ngoboni unalilundumikili Nyambi wa muyilu pe waletele zinkomoki na zindonga za kukunama za mu litala lyendi. Obe na bantu bobe babalemu na bakazobe bakwinginina na kunwinamo waine na kuyemeza banyambi ba kubumba ha ngolinde na ha shiliva na lubemba na byondo na bitondo na limanya, banyambi baya bakubula kutwesha ku mona hinge kuyuvwa na kulimuka shuma. Ngoboni wufwako kulemeeka Nyambi ou walamanga wumi wobe na byuma nimwabyo ukutenda.
24“Nisho shuma shiya atuminine liboko Nyambi mu kutikita awa mazu. 25Eshe nisho shatikitiwile, MENE, MENE, TEKELU na PALISHINI. 26Haya shino shikutontoloka ngayi, MENE, Nyambi walabakale matena a wene wobe na kuwaleta ku mamaninino, 27TEKELU, wafwanikiziwakale ha bipimisho pe wawaniwile ngayi, unengi wamuhehu shikuma, 28PALISHINI, wene wobe niwo unatapiwi kami unapanikiwi ku Bamende na ku Bapesha.”
29Wanguwangu Mbeleshaza wabatongwezele ngayi bavwalike Ndanyele bivwalo bya wene bya shimbombo na kumukoleka nketwana za ngolinde za maleema kuzingwilisha mu ncingo yendi. Pe bamupanikile kwinga wawuhatu wakulela mu wene.
30Ha wushiku uyo bene Mbeleshaza, mwene wa Mbambiloni wazihiwile, 31pe Ndaliyashi wa ka Mendiya wakwatile ngovu za wene. Niho Ndaliyashi wekalile na myaka 62.
Currently Selected:
Ndanyele 5: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
Ndanyele 5
5
Mayambwayambwa a Mbeleshaza
1Mwene Mbeleshaza watendelele mayambwayambwa amanene bantu bendi babalemu likulukazi, pe wanwine nabo waine. 2Oho bashingile kukolwa, Mbeleshaza wabatongwezele ngayi balete zinkomoki za ngolinde na shiliva na zindonga ebye akaletele tatiyendi Nembukandineza mu Litala lya Nyambi mu Yelushalema, ngayi Mwene na babilolo bendi babalemu na mahano bendi na bakazendi bakwinginina batweshe kunwinamo. 3Wanguwangu zinkomoki za ngolinde na zindonga byaletiwile biya bakafumishile ku Litala lya Nyambi, mu Yelushalema pe nimwabo banwinininemo, Mwene na babilolo bendi babalemu na mahano bendi, hamo na bakazendi bakwinginina, 4Aha banwinenga waine, pe bayemezele banyambi aba babumbiwile ha ngolinde na shiliva na lubemba na shondo na kubaza ha shitondo na limanya.
5Babazumukile tuhu minwe ya liboko lya muntu lyamonekele litikita ha limota lya kulambulula lya musheke wa mwene kuliyahikiza na lyeyeko lya zimuni, pe mwene wamonene liboko eshe lyatikitilenga. 6Niho lupala lwa mwene lwafutukile kutubuluka, pe walakamine shikuma kami wakankishile manungo wendi. 7Mwene wabilikizile ngayi balete bakamalele na bakakupenza bya nyenye na bambuki. Oho bezile kuli mwene, pe mwene wambile ku bakangana ba Mbambiloni ngayi, “Muntu ou nimwendi ukutwesha kulaba eye ntikitilo pe ukuntongweza eshe bikutontoloka ukavwikiwa bivwalo byabitali bya wene bya shimbombo na kuvwala nketwana za ngolinde mu ncingo yendi, pe ukatendiwa kwinga wa wuhatu ku wukulwane wakulela mu wene.” 8Niho bakangana bamwene nimwabo bakumine, ngoboni kowa muntu kukwabo watweshele kulaba ntikitilo hinge kutongweza mwene eshe bikutontoloka. 9Haneshe Mwene Mbeleshaza waliyakatile shikuma na kufutuka wakupempuka, bantu bendi babalemu babulile na kulimuka sha kutenda.
10Manda bamyene oho ayuvwile mazu a mwene na babilolo bendi babalemu pe wenginine mukati ka litala lya mayambwayambwa. Lihano wambile ngayi, “Obe mwene ya Ngoma uyoyenga mwaya myaka. Hinga upempuka mutima hinge ku monesha kufutula lupala lwobe. 11Kwali muntu umo mu wene wobe ou uli na moyo wa banyambi ba kuyela. Ha matena a kulela kwa tatiyobe, ou mulume wamoneshelenga ngana zaziwahe, tatiyobe wamuyakile ha wukulwane wa Bakalandeya, bakamalele na bambuki. 12Ndaba ou mulume Ndanyele mumwendi mwawaniwile mutima wangana na kalimukisho na kanangatima kakutwesha kutontolola milo na kukumbula tushau na kutontolola bya kulimba, nohobene yihanenu ou mulume Ndanyele, ou atumbile mwene ngayi Mbeleteshaza eze kukwobe mu kukutongweza nimwabyo eshe bikutontoloka.”
Ndanyele ukutontolola byatikitiwile
13Niho Ndanyele bamuletele mukati kuli mwene. Mwene wambile kuli Ndanyele ngayi, “Kati unengi uya Ndanyele wa Kayunda waha bantapwa aba tate afumishile ku Yunda ndi? 14Nayuvwa ngayi moyo wa banyambi uli mu mwobe kami ngayi mutima wangana, wa kalimukisho na kanangatima. 15Bakangana na bakamalele baletiwa mu kulaba ebye byatikitiwile ngayi bantongweze eshe bikutontolola, ngoboni bakwanga. 16Haya nayuvwu ngayi obe ukutwesha kutontolola bya kuholama na byambo byabikalu. Ndi ukutwesha kulaba ebye binatikitiwi na kuntongweza eshe bikutontoloka, ukavwalikiwa mu bikobelo byabitali bya wene bya shimbombo na nketwana za ngolinde za maleema na kuzishukika mu ncingo yobe, kami ukenga wa wuhatu ku bakakulela mu wene.”
17Niho Ndanyele akumbwile kuli mwene ngayi, “Litentekele bishemo byobe. Panika ncuungu yobe ku muntu wamina. Ngoboni hinge shingi noho nikakulabila Obe Mwene ya Ngoma eshe shinatikitiwi na kukutongweza eshe shikutontoloka.
18“Obe mwene ya ngoma, Nyambi Wakukangana niyemwine wayakile tatiyobe Nembukandineza kwinga mwene wamunene shikuma pe wamupanikile maleema na wene. 19Pe ndaba ya mwanya wawunene shikuma amupanine bantu ba mishobo nimwayo na matunga nimwawo na zindimi bamutininenga na kumukanka. Obo mwene ashingile kuziha, wabazihile, baya ashingile kukatula ashingile kuyoyesha wabayoyeshele. Wabakatwile na baya ashingile ku shampula, wabashampwile. 20Ngoboni oho mutima wendi niye walilundumikile na kuwu kaluhisha, ndaba ya kuliyemeza, pe wafumishiwile ha litanda lyendi lya wene kami wayawile mwanya wendi wa maleema. 21Watandiwile mukati ka bantu, pe mutima wendi wafutukile ngo wa kayamana. Wayoyele hamo na bambongolo ba lishaka, walile mwila ngo zingombe, lutu lwendi lwazambalalile na mume wawilenga kuyilu. Hantu noho etabilile ngayi Nyambi Wakukangana ukulela wene wa bantu, kami ukutwesha kupana ku muntu enge yani ou akushinga.
22“Na nobe mwanendi wa mulume, Mbeleshaza wufwako kulilimbwilisha obemwine, hinge ndi walimukile eshe nimwasho. 23Ngoboni unalilundumikili Nyambi wa muyilu pe waletele zinkomoki na zindonga za kukunama za mu litala lyendi. Obe na bantu bobe babalemu na bakazobe bakwinginina na kunwinamo waine na kuyemeza banyambi ba kubumba ha ngolinde na ha shiliva na lubemba na byondo na bitondo na limanya, banyambi baya bakubula kutwesha ku mona hinge kuyuvwa na kulimuka shuma. Ngoboni wufwako kulemeeka Nyambi ou walamanga wumi wobe na byuma nimwabyo ukutenda.
24“Nisho shuma shiya atuminine liboko Nyambi mu kutikita awa mazu. 25Eshe nisho shatikitiwile, MENE, MENE, TEKELU na PALISHINI. 26Haya shino shikutontoloka ngayi, MENE, Nyambi walabakale matena a wene wobe na kuwaleta ku mamaninino, 27TEKELU, wafwanikiziwakale ha bipimisho pe wawaniwile ngayi, unengi wamuhehu shikuma, 28PALISHINI, wene wobe niwo unatapiwi kami unapanikiwi ku Bamende na ku Bapesha.”
29Wanguwangu Mbeleshaza wabatongwezele ngayi bavwalike Ndanyele bivwalo bya wene bya shimbombo na kumukoleka nketwana za ngolinde za maleema kuzingwilisha mu ncingo yendi. Pe bamupanikile kwinga wawuhatu wakulela mu wene.
30Ha wushiku uyo bene Mbeleshaza, mwene wa Mbambiloni wazihiwile, 31pe Ndaliyashi wa ka Mendiya wakwatile ngovu za wene. Niho Ndaliyashi wekalile na myaka 62.
Libuka Lya Kuyela © Bible Society of Zambia, 2020.