NARONAA 9

Vĩnla dikpɛkɛnaa

1Dikiri yã ò Musanɛ Sinai gbárannan Isarailanɔ bona Misila wɛ̃̀ plade mɔ káaku gũn à pì: 2Isarailanɔ gɔ̃ Vĩnla dikpɛ kɛ a gɔrɔa. 3À dikpɛ pì kɛ mɔ díkĩna gɔrɔ gɛ̃ro donsariden ɔkɔsi. À kɛ lákũ ma dàárɛ nà pínki kũ a dokayã kũ ma dàárɛnɔ.

4Musa ò Isarailanɔnɛ ò Vĩnla dikpɛ kɛ, 5akũ ò dikpɛ pìi kɛ̀ Sinai gbárannan mɔ káaku gɔrɔ gɛ̃ro donsariden ɔkɔsi. Ò kɛ̀ lákũ Dikiri ò Musanɛ nà pínki. 6Gbɛ̃kenɔ kú gwe ò gbãsĩ vĩ kũ ò ɔ nà gɛ̀ɛa yãi, akũ odi le ò Vĩnla dikpɛ kɛ̀ zĩ birearo. Akũ ò gɛ̀ɛ ò Musa kũ Harunao lè zĩ birea gɔ̃̀nɔ 7ò pì Musanɛ: Gɛ̀ yã musu o gbã̀a lɛ̀. Bɔ́yãi ò gìwɛrɛ ò su kũ gbanɔ Dikirinɛ kũ ó gbɛ̃nɔo a gɔrɔaa? 8Musa wèḿma à pì: À zɛ ari mà ma lákũ Dikiri ni o á yã musu nà. 9Akũ Dikiri pì Musanɛ: 10Ǹ o Isarailanɔnɛ, tó ń gbɛ̃kenɔ ke ń burinɔ kpɛ́ gbãsĩ vĩ gɛ̀ yã musu, ke ò gɛ̀ɛ wɛ̃tɛ zã̀zã ken, oni fɔ̃ ò Vĩnla dikpɛ kɛmɛnɛ kpɛkpɛ. 11Mɔ plade gɔrɔ gɛ̃ro donsaride ɔkɔsin oni dikpɛ pì kɛ. Oni sã nɔ̀bɔ só kũ burodi futɛnasario kũ lá kyã̀kyãao. 12Òsun a ke tó gu dɔ̀aro akũsɔ̃ òsun sã pì wá ke ɛ́ro. Oni Vĩnla dikpɛ pì kɛ lákũ ma dìtɛárɛ nà pínki. 13Gbɛ̃ kũ adi gbã̀ lɛ́ro akũsɔ̃ adi gɛ́ wɛ̃tɛ kearo, tó à gì Vĩnla dikpɛ pì kɛi, ò ade bo a gbɛ̃nɔ tɛ́, zaakũ adi sumɛnɛ kũ gbao a gɔrɔaro. A taari ni wí a musu. 14Bòasu kũ à kú á tɛ́ akũsɔ̃ à ye à Vĩnla dikpɛ kɛmɛnɛ, séde à kɛ lákũ ma a doka dìtɛárɛ nà. Bòasu kũ bedeo ń pínki yã dokɔ̃nɔmɛ.

Tɛ́luku dana bizakutala

(Bon 40:34-38)

15Zĩ kũ ò bizakuta kũ̀ dɔ̀, tɛ́luku pìi dà sèeda kuta pìla. Naana zaa ɔkɔsi ari gu gɛ̀ɛ à dɔ̀o tɛ́luku pì kú kuta pìi musu lán tɛ́ bà. 16Lɛn àdigɔ̃ kun lɛ gɔrɔ sĩnda pínki, àdigɔ̃ kú kuta pìla fãnantɛ̃, gwãani sɔ̃ lán tɛ́ bà. 17Tó à gò kuta pìia, akũ Isarailanɔ dì futɛ kũ táo. Gu kũ tɛ́luku pìi zɛ̀n, gwen òdi bùra kátɛn. 18Tó Dikiri mɔ̀ńnɛ lɛ, òdi bùra futɛ. Tó à mɔ̀ńnɛ dɔ, òdi ɛra ò bùra kátɛ. Tó tɛ́luku pì da kuta pìla sɔ̃, ń bùraa dìgɔ̃ katɛnamɛ. 19Tó tɛ́luku pì tɛn gɔrɔ pla kɛ kuta pìla, òdigɔ̃ Dikiri yã ma, òdi bùra futɛro. 20Zĩkenɔa tɛ́luku pìi dì gɔrɔ pla kɛ kutalaro. Tó Dikiri mɔ̀ńnɛ, òdi bùra kátɛ, tó Dikiri ɛ̀ra à mɔ̀ńnɛ dɔ, akũ òdi bùra futɛ. 21Zĩkenɔa sɔ̃ tɛ́luku pìi dì zɛ gu dokɔ̃nɔ fíti zaa ɔkɔsi ari kɔnkɔ. Tó à gòa kɔnkɔ, akũ òdi bùra futɛ. Fãnantɛ̃ ke gwãanin yá, tó tɛ́luku pìi gòa, òdi bùra futɛmɛ. 22Tó tɛ́luku pìi gɔ̃̀ zɛna kuta pìla gɔrɔ do ke mɔ do ke wɛ̃̀ don yá, òdigɔ̃ katɛna bùran, òdi futɛro. Tó à gòa, akũ òdi bùra futɛ. 23Òdi bùra kátɛ ke ò bùra futɛ Dikiri lɛ́ sariro. Òdigɔ̃ Dikiri yã ma lákũ à dà Musanɛ à òńnɛ nà.

Currently Selected:

NARONAA 9: BB2005

Highlight

Copy

Compare

Want to have your highlights saved across all your devices? Sign up or sign in

Bisã Bible © SIM International, 2005.

Learn More About Bisã Bible 2005