NARONAA 20

Í bona gbɛ̀n

(Bon 17:1-7)

1Isarailanɔ kà Zini gbárannan ń pínki mɔ káaku gũn, akũ ò vùtɛ Kadɛsi. Gwen Miriamu gàn, ò a vĩ̀. 2Í kun ò miro, akũ ò kàkara Musa kũ Harunaoi. 3Ò zuka kà Musai ò pì: Tó o gaga yã kũ gbɛ̃ kũ ò gàga Dikiri arɛnɔ, de abire sã̀na. 4Bɔ́yãi a su kũoo gbáranna díkĩnan de ò gaga la kũ ó pɔ́kãdenɔoo? 5Bɔ́yãi a bɔtɛ kũoo Misila a su kũoo gu vãni díkĩna gũnn? Pɔ́blewɛ ke kaka lí ke geepi nɛ́ ke bísi kú laro, akũsɔ̃ í kú la ò miro. 6Musa kũ Harunao gò paria ò gɛ̀ɛ dakarɛki kpɛ́lɛlɛa ò wùtɛ ń nɛ̀sɛlɛ kutɛna, akũ Dikiri gakuri bò à sùḿma. 7Dikiri yã ò Musanɛ à pì: 8Ǹ gò sɛ́, mɔkɔ̃n kũ n vĩ̀ni Harunao à gbɛ̃ pìnɔ kakara à yã o gbɛ̀si direnɛ ń wára, í ni bon. Lɛn ĩni í bońnɛ gbɛ̀ pìn ò mi lɛ kũ ń pɔ́kãdenɔ.

9Musa gòo sɛ̀ Dikiri arɛ lákũ à ònɛ nà. 10Musa kũ Harunao ń kákara gbɛ̀si pì arɛ, akũ à pìńnɛ: À ma á sãgbãnadenɔ! Á ye ò í boárɛ gbɛ̀ dínn yá? 11Akũ Musa ɔ sɛ̀ musu à gbɛ̀ɛ pìi lɛ̀ kũ a gòoo gɛ̃̀n pla. Í bò manamana, akũ ò mì kũ ń pɔ́kãdenɔ. 12Akũ Dikiri pì Musanɛ kũ Harunao: Zaakũ ádi ma náani kɛ a ma tɔ́ bò Isarailanɔnɛro, áni gɛ̃ kũńwo bùsu kũ matɛn kpáḿmanlo. 13Mɛriba ísɛ̃bokin gwe, gu kũ Isarailanɔ zuka kàn Dikirii, akũ à a ludakɛnaa mɔ̀ńnɛ.

Ɛdɔmunɔ gina Isarailanɔnɛ ò gɛ̃tɛ ń bùsula

14Musa gbɛ̃nɔ zĩ̀ ò bò Kadɛsi ò gɛ̀ɛ Ɛdɔmunɔ kína kĩnaa ò pì: Ókɔ̃nɔ n danɛ Isarailanɔ pì, ń wari kũ à ó lénɔ dɔ̃ pínki. 15Ó dizinɔ gɛ̀ɛ Misila, akũ o gìi kɛ̀ gwe. Misilanɔ wari dɔ̀wá kũ ó dizinɔ. 16O wiki lɛ̀ Dikiria, akũ à yã sì kũoo. À a Malaikaa zĩ̀ à bò kũoo Misila. Tera sà ó kú Kadɛsi, n bùsu lɛ́zɛkin. 17Ǹ ó gba zɛ́ ò gɛ̃tɛ n bùsuua. Óni gɛ̃tɛ buranɔ ke geepi búnɔaro, óni á lɔ̀gɔ'i miro. Ónigɔ̃ tɛ́ kína zɛ́da gũmmɛ. Óni litɛ ɔplai ke ɔzɛiro ari ò gɛ́ gɛ̃tɛo n bùsula. 18Akũ Ɛdɔmunɔ pìńnɛ: Áni le à gɛ̃tɛ ó bùsuuaro. Tó a gi, óni bo ò daálɛ kũ fɛ̃nɛdao. 19Isarailanɔ pìńnɛ: Óni gɛ̃tɛ zɛ́daamɛ. Tó ókɔ̃nɔ ke ó pɔ́kãdenɔ á í mì, óni a fĩna bo. Gɛ̃tɛnaan ótɛn wɛtɛ ado. 20Ɛdɔmunɔ pì: Áni le à gɛ̃tɛro. Akũ ń zĩ̀karinɔ bɔ̀tɛ dasidasi ò sù dańlɛ kũ gbãnao. 21Zaakũ Ɛdɔmunɔ gì Isarailanɔnɛ ò gɛ̃tɛ ń bùsuua, akũ Isarailanɔ pã̀ńnɛ.

Haruna ganaa

22Isarailanɔ bò Kadɛsi ń pínki ò kà Oru kpia 23Ɛdɔmu bùsu lɛ́zɛkin. Gwen Dikiri yã òn Musanɛ kũ Harunao à pì: 24Haruna ni ká a dizinɔla tera, ani gɛ̃ bùsu kũ matɛn Isarailanɔ gba gũnlo, kũ á gbɛ̃nɔn pla a gi ma yã ma zaa Mɛriba yãi. 25Ǹ Haruna kũ a nɛ́ Ɛlɛazao sɛ́ ǹ didi kũńwo Oru kpia 26ǹ Haruna pɔ́kasanɔ bɔtɛa ǹ da a nɛ́ Ɛlɛazanɛ gwe. Gwen Haruna ni gan à ká a dizinɔla.

27Musa kɛ̀ lákũ Dikiri ònɛ nà. À dìdi Oru kpia gbɛ̃ sĩnda pínki wára 28à Haruna pɔ́kasanɔ bɔ̀tɛa à dà a nɛ́ Ɛlɛazanɛ, akũ Haruna gà kpi pìi musu gwe. Kũ Musa kũ Ɛlɛazao kìpa kpi pìia 29akũsɔ̃ Isarailanɔ mà kũ Haruna gà, akũ ò a gɛ̀ wɛ̃nda kɛ̀ gɔrɔ baraakuri.

Currently Selected:

NARONAA 20: BB2005

Highlight

Copy

Compare