MATIU 25

Nɔkpare gbɛ̃nɔn kurinɔ

1Gɔrɔ birea kpata kũ à bò Luda kĩnaa nigɔ̃ de lán nɔkpare gbɛ̃nɔn kuri kũ ò ń fitilanɔ sɛ̀ ò bòo, òtɛn gɛ́ da nɔsɛrilɛ bàmɛ. 2Ń gbɛ̃nɔn sɔɔronɔ bi yɔ̃nkɔnɔmɛ. Ń gbɛ̃nɔn sɔɔronɔ sɔ̃ laakaridenɔmɛ. 3A yɔ̃nkɔnɔ ń fitilanɔ sɛ̀ nísi zànaa sari, 4a laakaridenɔ sɔ̃ ò ń fitilanɔ sɛ̀ kũ nísi zànaao. 5Nɔsɛri dí su likalikaro, akũ i ń sɛ́ ń pínki, òtɛn i o. 6Lizãndo ò wiki lɛ̀: Nɔsɛri tɛn su! À futɛ à gɛ́ daalɛ. 7Akũ nɔkpare pìnɔ vù ń pínki, ò ń fitilanɔ kɛ̀kɛ. 8Akũ yɔ̃nkɔnɔ pì laakaridenɔnɛ: À ó gba nísi fíti sàee! Ó fitila tɛn ga bi! 9Akũ laakaride pìnɔ wèḿma ò pì: Ani mɔ́wá kãáo pínkiro. À gɛ́ à á pɔ́ lú a yìarinɔ kĩnaa. 10Kũ ò gɛ̀ɛ lú, akũ nɔsɛrii kà. Gbɛ̃ kũ ń soru kɛ̀nɔ gɛ̃̀ kãao nɔsɛ gũn, akũ ò gbàa tàta. 11Kũ à kɛ̀ saa nɔkpare kpara pìnɔ sù, òtɛn lɛ́ zu: Dikiri, Dikiri! Ǹ zɛ wɛ̃wɛrɛ! 12Akũ à wèḿma à pì: Yãpuran matɛn oárɛ, má á dɔ̃ro. 13Abire yãi á wɛ́ gɔ̃ dɔ, zaakũ á a gɔrɔ ke a gɔrɔ zaka dɔ̃ro.

Ɔgɔdakɛna zĩkɛrinɔnɛ

(Luk 19:11-27)

14Kpata kũ à bò Luda kĩnaa de lán gbɛ̃ kũ àtɛn gɛ́ wɛ̃tɛaa bà, akũ à a zĩkɛrinɔ sìsi, à a aruzɛkɛ nàńnɛ ń ɔĩ. 15À ɔgɔda kɛ̀ ń gbɛ̃ donɛ sɔ̃̀nɔ sɔɔro, gbɛ̃ plade sɔ̃̀nɔ pla, gbɛ̃ aakɔ̃de sɔ̃̀nɔ do, ń baadi gbãna lɛ́n, akũ à gɛ̀ɛ wɛ̃tɛa. 16Sɔ̃̀nɔsɔɔrode gɛ̀ɛ à laga tà kũ ɔgɔ pìio gɔ̃̀nɔ, akũ à àree lè sɔ̃̀nɔ sɔɔro. 17Sɔ̃̀nɔplade kɛ̀ lɛ dɔ, akũ à àree lè sɔ̃̀nɔ pla. 18Sɔ̃̀nɔdode sɔ̃ à gɛ̀ɛ à wɛ̀ɛ yɔ̃̀, akũ à a dikiri ɔgɔ pìi ùtɛn. 19Gɔrɔ pla gbɛra zĩkɛrii pìnɔ dikirii sù, akũ àtɛni a ɔgɔ yã gɔ̃gɔ̃ kũńwo. 20Sɔ̃̀nɔsɔɔrode sù kũ sɔ̃̀nɔ sɔɔro pãnde kũ à lèeo à pì: Dikiri, ǹ sɔ̃̀nɔ sɔɔro kũ n kpàma gwa, à àree kàramɛnɛ sɔ̃̀nɔ sɔɔro dɔ. 21Akũ a dikirii pìnɛ: N kɛ̀ zĩkɛri mana náanide! Lákũ ń náani vĩ kũ a fítio nà, mani a zɔ̃kɔ̃ nannɛ n ɔĩ sà. Ǹ gɛ̃ ma pɔnnakɛnaa gũn. 22Sɔ̃̀nɔplade sù dɔ à pì: Dikiri, ǹ sɔ̃̀nɔ pla kũ n kpàma gwa, à àree kàramɛnɛ sɔ̃̀nɔ pla dɔ. 23Akũ a dikirii pìnɛ: N kɛ̀ zĩkɛri mana náanide! Lákũ ń náani vĩ kũ a fítio nà, mani a zɔ̃kɔ̃ nannɛ n ɔĩ sà. Ǹ gɛ̃ ma pɔnnakɛnaa gũn. 24Akũ sɔ̃̀nɔdode sù sà à pì: Dikiri, má dɔ̃ kũ n yãnɔn zĩ'ũ. Ndì pɔ́ kɛ̃ gu kũ ńdi tɔ̃nlo. Ndì pɔ́ kakara gu kũ ńdi gbɛ̃nlo. 25Akũ vĩna ma kũ, ma gɛ ma n ɔgɔ ùtɛ wɛ̀ɛn. N pɔ́n dí. 26Akũ a dikirii pìnɛ: Zĩkɛri vãni ma'ãde! Ń dɔ̃ kũ madì pɔ́ kɛ̃ gu kũ mádi tɔ̃nlo, madì pɔ́ kakara gu kũ mádi gbɛ̃nloo? 27À mana yã n ɔgɔda kɛ̀o gbɛ̃kenɛ, de tó ma su, mà a pɔ́ sí kũ a ío. 28À sɔ̃̀nɔ do pì sía à kpá sɔ̃̀nɔsɔɔrodea. 29Zaakũ gbɛ̃ kũ à pɔ́ vĩn Luda ni karanɛ ari àgɔ̃ din. Gbɛ̃ kũ à vĩro sɔ̃, bee pɔ́ kũ à vĩ Luda ni síamɛ. 30Zĩkɛri pã dí sɔ̃, à a zu bàai gusiran. Gwen oni ɔ́ɔ dɔn ò ɔ di ń mìia.

Ziakpɛ zĩ yãkpatɛkɛnaa

31Tó Bisãsiri Nɛ́ sù a gakuri gũn kũ a malaikanɔ ń pínki, ani vutɛ a kíblegba gakuridea. 32Andunia burinɔ ni kakara a arɛ ń pínki, ani ń kɛ̃kɔ̃a, lákũ pɔ́dãrii dì sãnɔ kɛ̃kɔ̃a kũ blènɔ nà. 33Ani sãnɔ kpá a ɔplai, blènɔ sɔ̃ ɔzɛi. 34Abire gbɛra Kína pì ni pi gbɛ̃ kũ ò kú a ɔplainɔnɛ: Ákɔ̃nɔ kũ ma De arubarikaa dàágunɔ, à mɔ́ à kpata kũ à a soru kɛ̀árɛ zaa anduniakatɛna gɔrɔ ble. 35Zaakũ kũ nà tɛni ma dɛ, a pɔ́ble kpàma. Kũ ími tɛni ma dɛ, a í kpàma. Kũ má kun nibɔ ũ, a ma si. 36Kũ má kun punsi, a asiri tàmɛnɛ. Kũ matɛn gyã kɛ, a ma gwa. Kũ ò ma da kpɛ́siran, a su wɛ́ kpàtɛmai.

37Gbɛ̃ mananɔ ni pinɛ: Dikiri, bɔrɛn o è nà tɛni n dɛ o pɔ́ble kpàmma ke ími tɛni n dɛ, o í kpàmmaa? 38Bɔrɛn o n e nibɔ ũ o n si, ke ń kun punsi o asiri tànnɛɛ? 39Bɔrɛn o n e ntɛn gyã kɛ, ke ò n da kpɛ́siran o gɛ wɛ́ kpàtɛnyĩi? 40Kína pì ni weḿma à pi: Yãpuran matɛn oárɛ, yã kũ a kɛ̀ gbɛ̃ kĩanaanɛ ma gbɛ̃ dínɔ tɛ́, makũmɛ a kɛ̀mɛnɛ.

41Abire gbɛra ani pi gbɛ̃ kũ ò kú a ɔzɛinɔnɛ: À gomɛnɛ gwe ákɔ̃nɔ kũ Luda lɛ́ kɛ̀árɛnɔ! À tá tɛ́ kũ àdi garo kũ Luda kɛ̀kɛ Ibilisinɛ kũ a ìbanɔ gũn. 42Zaakũ nà tɛni ma dɛ, ádi pɔ́ble kpámaro. Ími tɛni ma dɛ, ádi í kpámaro. 43Má de nibɔɔ ũ, ádi ma síro. Má kun punsi, ádi asiri támɛnɛro. Matɛn gyã kɛ ke ò ma da kpɛ́siran, ádi su à wɛ́ kpátɛmairo. 44Oni gbasa ò a la ò pi: Dikiri, bɔrɛn o n e kũ nàao ke ímio ke nibɔ ũ ke punsi ke gyãre ke purusuna ũ, akũ ódi kpányĩroo? 45Kína ni weḿma à pi: Yãpuran matɛn oárɛ, lákũ ádi kɛ gbɛ̃ kũ à kĩanaanɛ gbɛ̃ dínɔ tɛ́ro nà, makũmɛ ádi kɛmɛnɛro. 46Gbɛ̃ birenɔ ni tá wɛ́tãmma kũ àdi lákaro gũmmɛ, gbɛ̃ mananɔ sɔ̃ wɛ̃̀ndi kũ àdi lákaro gũn.

Currently Selected:

MATIU 25: BB2005

Highlight

Copy

Compare