MATIU 19

Yìgidɛna yã

(Maa 10:1-12)

1Kũ Yesu yã birenɔ ò à làka, à bò Galili, à gɛ̀ɛ Yudea bùsu kpado Yoda bara. 2Pari tɛ́i, akũ à ń gyãnɔ wèrekɔ̃aḿma gwe. 3Farisi kenɔ sù ò a yɔ̃ ò gwa, akũ ò a là ò pì: Gɔ̃gbɛ̃ zɛ́ vĩ à yìgi dɛ yã sĩnda pínki yãin yá? 4À wèḿma à pì: Kũ Luda ń kɛ́ gɔ̃gbɛ̃ kũ nɔgbɛ̃o ũ zaa káaku, ádi a kyó kɛ a màroo? 5Luda pì, abire yãin gɔ̃gbɛ̃ ni a de kũ a dao tó, ò nakɔ̃a kũ a nanɔo, ń gbɛ̃nɔn pla ni gɔ̃ mɛ̀ do ũ. 6Ò kun pla doro, sé do. Abire yãi gbɛ̃ kũ Luda ń nákɔ̃anɔ, bisãsiri sún ń kɛ̃kɔ̃aro. 7Akũ Farisinɔ a là ò pì: Bɔ́yãi Musa dìtɛ gɔ̃gbɛ̃ yìgidɛtakada kpá a nanɔa à a gbarɛoo? 8Yesu wèḿma à pì: Á sãgbãna yãin Musa á gbá zɛ́ à á nɔnɔ gbarɛ, ama à de lɛ zaa káakuro. 9Matɛn oárɛ, gbɛ̃ kũ à yìgii dɛ̀ kũ a nanɔo, tó adi kɛ à gɔ̃pose kɛ̀nlo, tó à nɔ pãnde sɛ̀, ade zina kɛ̀n gwe.

10Akũ a ìbanɔ pìnɛ: Tó lɛn gɔ̃gbɛ̃ yã de lɛ kũ a nanɔo, à mana ò nɔ sɛ́ro. 11Akũ Yesu pìńnɛ: Adi kɛ gɔ̃gbɛ̃ sĩnda pínki mɛ́ ani yã pì fɔ̃ro, sé gbɛ̃ kũ Luda ń gbá a zɛ́nɔ. 12Zaakũ gbɛ̃kenɔ dì nɔ sɛ́ro, kũ ò ń í lɛ yãi, gbɛ̃kenɔ dìgɔ̃ kun lɛ kũ ò ń fɛ̀rɛɛ kɛ̀ yãi, gbɛ̃kenɔ ń zĩda kũ̀ lɛ kpata kũ à bò Luda kĩnaa yãi. Gbɛ̃ kũ ani yã pì fɔ̃ à fɔ̃.

Arubarikadana nɛ́nɔgu

(Maa 10:13-16; Luk 18:15-17)

13Òdi su Yesunɛ kũ nɛ́nɔ de à ɔ naḿma à adua kɛńnɛ, akũ a ìbanɔ gìńnɛ. 14Akũ Yesu pì: À tó nɛ́nɔ mɔ́ ma kĩnaa. Àsun gíńnɛro, zaakũ ń takanɔ pɔ́mɛ kpata kũ à bò Luda kĩnaa ũ. 15Kũ à ɔ nànaḿma, akũ à bò gwe.

Aruzɛkɛde

(Maa 10:17-31; Luk 18:18-30)

16Akũ gɔ̃gbɛ̃ ke sù Yesu kĩnaa, à a là à pì: Dannɛri, bɔ́ manan mani kɛ mà wɛ̃̀ndi kũ àdi lákaro lee? 17À wèa à pì: À kɛ̀ dera ntɛni ma la manakɛna yãii? Luda ado mɛ́ à mana. Tó ń ye ǹ gɛ̃ wɛ̃̀ndii pìi gũn, ǹgɔ̃ a yãditɛnanɔ kũna. 18Akũ à a là à pì: A kpatemɛɛ? Akũ Yesu pì: Ǹsun gbɛ̃ dɛro, ǹsun zina kɛro, ǹsun kpãni oro, ǹsun yã di n gbɛ̃dakearo, 19ǹgɔ̃ bɛ̀ɛrɛ lí n de kũ n daoonɛ, ǹgɔ̃ ye n gbɛ̃dakei lán n zĩda wɛ̃̀ndii bà. 20Kɛfɛnna pìi pìnɛ: Má yã birenɔ kũna pínki. A kpate mɛ́ à gɔ̃̀mɛnɛ dɔɔ? 21Yesu pìnɛ: Tó ń ye ǹgɔ̃ papana, ǹ gɛ́ ǹ n pɔ́nɔ yía pínki, ǹ a ɔgɔ kpá takasidenɔa, ǹ mɔ́ ǹ tɛ́mai, ĩnigɔ̃ aruzɛkɛ vĩ ludambɛ. 22Kũ kɛfɛnna pì yã pìi mà, à tà kũ pɔsirao, kũ à aruzɛkɛnɔ vĩ dasi yãi.

23Akũ Yesu pì a ìbanɔnɛ: Yãpuran matɛn oárɛ, à zĩ'ũ aruzɛkɛdenɛ à gɛ̃ kpata kũ à bò Luda kĩnaa gũn. 24Matɛn oárɛ dɔ, lakumi gɛ̃na pɔrɔwɛɛn araga de aruzɛkɛde gɛ̃na kpata kũ à bò Luda kĩnaa gũnla. 25Kũ a ìbanɔ yã pìi mà, akũ à bò ń sarɛ manamana ò pì: Tó lɛmɛ, dí mɛ́ ani fɔ̃ à surabana lee? 26Akũ Yesu ń gwá tíii, à pìńnɛ: Bisãsiri ni fɔ̃ro. Luda kĩnaa bee pɔ́ sĩnda pínki dì sí kɛ.

27Akũ Pita wèa à pì: O pɔ́ sĩnda pínki tò o tɛnyĩ. Bɔ́ mɛ́ ani gɔ̃wɛrɛ sàa? 28Yesu pìńnɛ: Yãpuran matɛn oárɛ: Tó Bisãsiri Nɛ́ vùtɛ a kíblegba gakuridea andunia dufu gũn, ákɔ̃nɔ kũ á tɛ́mainɔ áni vutɛ kíblegba mɛ̀n kuri awɛɛplanɔa, àgɔ̃ yã gɔ̃gɔ̃ Isaraila buri mɛ̀n kuri awɛɛplanɔnɛ. 29Gbɛ̃ kũ à a bɛ ke a vĩ̀ninɔ tò ke a dakũnanɔ ke a de ke a da ke a nɛ́nɔ ke a buranɔ ma yãi, ade ni ɛra à abire taka le lɛu basɔɔro, akũsɔ̃ ani wɛ̃̀ndi kũ àdi lákaro le. 30Ama gbɛ̃ káakunɔ nigɔ̃ gbɛ̃ kpɛdenɔ ũ dasi, gbɛ̃ kpɛdenɔ nigɔ̃ gbɛ̃ káakunɔ ũ dasi.

Currently Selected:

MATIU 19: BB2005

Highlight

Copy

Compare

Want to have your highlights saved across all your devices? Sign up or sign in

Bisã Bible © SIM International, 2005.

Learn More About Bisã Bible 2005