BONAA 4

Luda Musa gbana daboyãkɛna zɛ́

1Musa wèa à pì: Tó odi ma náani kɛro, akũ odi ma yã maro, tó ò pì mɔkɔ̃n mɛ́ n bo n sumaro sɔ̃ bi? 2Akũ Dikiri a là à pì: Bɔ́n ń kũna gwee? À wèa à pì: Gòomɛ. 3Dikiri pìnɛ: Ǹ gòo pì pãtɛ zĩtɛ. Kũ à pã̀tɛ, akũ à lì mlɛ̃̀ ũ, akũ Musa a zĩda gà gwe. 4Dikiri pìnɛ: Ǹ ɔ bo ǹ a kũ a vlãa. Kũ à kũ̀, akũ à ɛ̀ra à lì gò ũ a ɔĩ. 5Dikiri pìnɛ: Lɛn ĩni kɛ lɛ, de ò sí kũ makũ Dikiri ń dizinɔ Ibrahĩ kũ Isaakuo kũ Yakubuo Luda mɛ́ à bò à sùmma.

6Dikiri ɛ̀ra à pìnɛ dɔ: Ǹ n ɔ sɔtɔ n utan. Akũ à sɔ̀tɔn. Kũ à bò, à è a ɔ lì kusu ũ, à kɛ̀ púu lán buu bà. 7Dikiri pìnɛ: Ǹ ɛra ǹ n ɔ sɔtɔ n utan. À ɛ̀ra à sɔ̀tɔn. Kũ à bò, à è à kɛ̀ a gbɛ̀n. 8Dikiri pìnɛ: Tó odi n náani kɛ ò sèeda káaku sìro, ò kpɛkpɛ pɔ́ sí. 9Tó odi sèeda pla pìnɔ sí ò n yã mà sɔ̃ro, ǹ Nili í tɔ́ ǹ kɔ́tɛ zĩtɛ, ani li aru ũ.

10Akũ Musa pìnɛ: N yã nna Dikiri! Zaa zĩ yã'onaa araga kũmaoro. Bee zaa gɔrɔ kũ n yã òmɛnɛ, ma lɛ́ tìkisimɛ. 11Akũ Dikiri pìnɛ: Dí mɛ́ à lɛ́ dɔ̀ bisãsirinɛɛ? Dí mɛ́ àdi a nɛ́nɛ natɛ ke àdi a sãto kũu? Dí mɛ́ àdi tó à gu e ke àdi a vĩ̀na kũu? Makũ Dikiri, makũroo? 12Ǹ gɛ́! Mani kpányĩ kũ yã'onaao, mani yã kũ ĩni o dannɛ. 13Akũ à pì: N yã nna Dikiri! N yã nna! Ǹ gbɛ̃ pãnde zĩ. 14Akũ Dikiri pɔ fɛ̃̀ kũ Musao à pì: N vĩ̀ni Haruna Levi buri kunloo? Má dɔ̃ kũ yã'ona zĩ'ũ kãaoro. Àtɛn su danlɛ. Tó á wɛ́ kɛ̀ pla, a pɔ ni kɛ nna. 15Ǹ yã o kãao ǹ yã kũ ani o danɛ. Makũ, manigɔ̃ kpái kũ yã'onaao, manigɔ̃ yã kũ áni kɛ daárɛ. 16Ani yã o gbɛ̃nɔnɛ n gɛ̃nɛ ũ, anigɔ̃ de n lɛ́gbɛkpari ũ, ĩnigɔ̃ denɛ lán Luda bà. 17Ǹ gò dí sɛ́ ǹgɔ̃ kũna ǹ sèedanɔ kɛo.

Musa ɛrana Misila

18Musa tà a anzure Yɛtoro kĩnaa à pìnɛ: Ǹ ma gba zɛ́ mà tá ma gbɛ̃nɔ kĩnaa Misila, mà e tó ò kpɛ́ kú kũ wɛ̃̀ndiio ari tera. Yɛtoro pìnɛ: Ǹ kipa aafia. 19À sù à lè Dikiri ò Musanɛ Midiã bùsun à pì: Ǹ futɛ ǹ tá Misila, zaakũ gbɛ̃ kũ òtɛni n wɛtɛ ò n dɛ yãnɔ gàga ń pínki. 20Akũ Musa a nanɔ sɛ̀ kũ a nɛ́gɔ̃gbɛ̃nɔ à ń dí zaakia, à ɛ̀ra àtɛn tá Misila à Luda gòo pì kũna. 21Akũ Dikiri pìnɛ: Tó n ka Misila, ǹ daboyã kũ ma a gbãna kpàmmanɔ kɛ Firi'auna arɛ pínki. Ama mani a kùgbãna kũ, ani gí gbɛ̃nɔ gbarɛi. 22Ǹ onɛ makũ Dikiri ma pì, Isaraila burimɛ ma daudu ũ, 23akũ ma pìnɛ à ma daudu gbarɛ à gɛ́ donyĩ kɛmɛnɛ. Lákũ à gì a gbarɛi nà, mani a daudu dɛ sà.

24Zɛ́ gũn Musa tɛn i gukea, akũ Dikiri a lè gwe à ye à a dɛ. 25Akũ Zipora gbɛ̀ fɛ̃nɛ sɛ̀ à a nɛ́ tɔ̃̀ɔ zɔ̃̀o à a gyɔfɔrɔ nà Musa gbáa à pì: Yãpuramɛ, ń demɛnɛ gɔ̃ arude ũ. 26Tɔ̃̀zɔ̃na bire yãin à pìnɛ gɔ̃ arude. Akũ Dikiri Musa tò.

27Dikiri pì Harunanɛ: Ǹ gɛ́ da Musalɛ gbárannan. Akũ à gɛ̀ɛ à a lè Luda kpi kĩnaa, à lɛ́ pɛ̀a. 28Musa yã kũ Dikiri a zĩ à o bàba Harunanɛ kũ sèeda kũ à pìnɛ à kɛnɔ. 29Akũ Musa kũ Harunao tà Misila ò Isaraila gbɛ̃ zɔ̃kɔ̃nɔ kàkara. 30Haruna yã kũ Dikiri ò Musanɛ bàbańnɛ ń pínki, akũ Musa daboyã pìnɔ kɛ̀ Isarailanɔ wára. 31Ò yã pìi sì. Kũ ò mà Dikiri mɛ́ à sù ń gwa à ń yã'ũmmanaa è, akũ ò kùtɛ ò donyĩ kɛ̀nɛ.

Currently Selected:

BONAA 4: BB2005

Highlight

Copy

Compare

Want to have your highlights saved across all your devices? Sign up or sign in

Bisã Bible © SIM International, 2005.

Learn More About Bisã Bible 2005