توریت شریف: پَیدایش 49
49
1فِر حضرت یعقُوب اپݨے پُتراں کی بُلائی کے اے آخیا، «تُساں سارے جمع ہوئی جاؤ، تانکہ میں تساں کی دَساں کہ اچھݨے آلیاں دیہاڑیاں وِچ تُساں نال کے ہوسی۔
2اے مہاڑے پُترو! جمع ہوئی کے سُݨو!
تے مہاڑے در کَن تَہرو!
3اے رُوبِن! توں مہاڑا پہلیٹھی نا مُنڈا ایں،
تے مہاڑی طاقت تے شہزوری نا پہلا پھل ایں.
تُوں زیادہ عزت تے زیادہ طاقت آلا ایں۔
4تُوں پاݨِیئے نی طرح رُڑنے آلا ایں،
تے تُکی کوئی اُچا مقام نی لبݨا،
کِیئانکہ توں اپݨی مَتریری ماؤ نال مُونہ کالا کیتا،
تے اِس طرح تُوں مہاڑی بے عزتی کِیتی۔
5شمعُون تے لاوی، تُساں دوئے سکے پہراہ اِکے جئے او.
تُساں نیاں تلواراں ظُلم نے ہتھیار اݨ۔
6تے میں تُساں نی جماعت وِچ شریک ناں ہوواں۔
میں تُساں نی مَجلس وِچ وی شامل ناں ہوݨ لغا،
کِیئانکہ تُساں اپݨے غصے وِچ اچھی کے بندیاں نے خونے نال اپݨے ہتھ رنگے،
تے غرور وِچ اچھی کے دانداں نے پیراں نیاں رگاں کپی شوڑیاں۔
7تُساں نے غصے پر لعنت ہووے، جیہڑا بہُوں سخت اے،
تے تُساں نے قہرے پر وی، جیہڑا تیز اے!
میں تُساں کی پورے اسرائیل مُلخے وِچ بکھیری شوڑساں۔
8اے یہُودہ ! تُہاڑے پہرآ تُہاڑی تعریف کرسݨ؛
تُہاڑا ہتھ تُہاڑیاں دُشمݨاں نے گلے پر ہوسی؛
تہاڑے پیؤ نے پتر تہاڑے اگے چُکھی جاسݨ۔
9یہوداہ، توں شیر ببر نا بچہ ایں،
تے مہاڑیا پُترا! تُوں شکار کری کے آیا ایں.
تُوں شیر بلکہ شیرنی نی طرح چُپ کری کے بہی گیا ایں۔
تے کوݨ تُکی چھیڑے؟
10یہوداہ، تہاڑی بادشاہی کدے ختم نی ہوݨ لغی،
بلکہ شاہی اِختیار اُس ویلے تک تُہاڑی اولاد کول رہسی
جدوں تک او حاکم نی آئی جاݨا
جِس نے تابع ساریاں قوماں رہسݨ۔
11اِتنی کثرت ہوسی کہ تُوں اپݨا جوان کھوتا انگوراں نیاں بیلاں نال
تے اپݨی کھوتی نا بچہ چنگے انگوراں نیاں بیلاں نال بݨیا کرسیں.
اپݨے کپڑے انگوراں نی شراب وِچ
تے اپݨا کُرتا انگوراں نے رس نال تَہویا کرسیں۔
12تُہاڑیاں اکھیاں انگوراں نی شراب نی طرح رتیاں
تے تہاڑے دند دُدھے نی طرح چِٹھے ہوسݨ۔
13زبُولُون، تُوں سمندرے نے کِنارے پر رِہسیں،
جتھے جہازاں واسطے بندرگاہ ہوسی.
تے تُہاڑی حد شہر صیدا تک بڑی ہوسی۔
14اِشکار، تُوں تغڑے کھوتے نی طرح سخت جان ایں،
جیہڑا دوآں پہاراں نے بشکار بیٹھا وا اے۔
15تُوں اِک چنگی ارام گاہ
تے چنگی زِیمی تکی کے
اپݨے مونڈے کی وزن چُکݨے واسطے تھلے کرسیں،
تے تُکی اِک غلام نی حیثیت نال کم کرنے واسطے مجبُور کیتا جاسی.
16دان، تُوں بنی اسرائیل نیاں قبیلیاں وِچوں اِک قبیلہ ایں،
تے اپݨے لوکاں نال انصاف کرسیں۔
17تُوں او سپ ایں جیہڑا راہ جُلݨے
دُشمݨ نےکہوڑے نی پچھلی اڈی کی
اِس طرح ڈنگ مارنا،
کہ کہڑ سوار پِچھے ٹئی پَیسی۔
18اے رب! میں تُہاڑی ہی نجات نا راہ تکݨا آں۔
19جد، تہاڑے پر ڈاکُو حملہ کرسݨ،
پر تُوں مُڑی کے اُنہاں پر حملہ کری چھوڑسیں۔
20آشر، تُوں اتنا زرخیز رزق
تے اِتنیاں لذتیلیاں چیزاں پیدا کرسیں
جہڑیاں بادشاواں نیاں پسندیدہ ہوسݨ۔
21نفتالی، تُوں آزاد چھوڑی وی ہِرنی ایں،
جیہڑی سوہنے بچّے پَیدا کرنی اے.
22یُوسف، تُوں پھلدار بیل ایں.
تُوں پاݨی نے چوئے پر لغی وی پھلدار بیل ایں،
جِس نیاں ٹالیاں دیوارے پر چڑھنیاں پئیاں.
23تیر اندازاں تُہاڑے پر تیر چلائی کے تُکی تنگ کیتا،
تے تُہاڑے پر ہملہ کیتا.
24پر تُوں کمان کِنہی کے مظبوطی نال کھلتا رہیا،
تے تُہاڑیاں باں یعقُوب نے طاقت آلے خُدا نی وجہ نال طاقتور رہیاں،
خُدا، جیہڑا چرواہا تے بنی اِسرائیل نی چِٹان اے.
25اے تہاڑے پِیؤ نا خُدا اَے جیہڑا تُہاڑی مدد کرسی،
اللّٰہ تعالیٰ جیہڑا تُکی آسمان وِچوں بارِش،
زمین نی گہرایئاں وِچوں پاݨی،
تے اولاد نی برکت دیسی.
26تُہاڑے پِیؤ نیاں برکتاں قدیم پہاڑاں نیاں برکتاں کولوں زیادہ عظیم اݨ،
تے ابدی پہاڑاں کولوں زیادہ بے حِساب.
اے ساریاں برکتاں یُوسف نے سِر پر ہوݨ،
اُس بندے نے متھے پر جیہڑا اپݨے پہراواں پر شہزادہ اے.
27بن یامِین، تُوں چِیرنے آلا پگیہاڑ ایں. تُوں سویرے اپݨا شکار کھاسیں،
تے شامی لُٹیا نا مال بنڈسیں۔»
28اے بنی اِسرائیل نے کُل بارہ قبیلے اݨ، تے اے او کُج اے جیہڑا اُنہاں نے پِیؤ اُنہاں کی برکت دیݨیاں آخیا. اُنہاں ہر اِک کی اُس نی اپݨی برکت دِتی.
29فِر حضرے یعقُوب اُنہاں کی آخیا، «میں مرنے آلا آں. مِکی مہاڑے پیؤ دادے کول اُس غارے وِچ دَبی شوڑیائے، جیہڑی ہتی قبِیلے نے عِفرون نامی بندے نی باڑی وِچ اے. 30او غار اُس باڑی وِچ اے جیہڑی مُلخ کَنعان نے مکفیلہ نامی علائقے وِچ ممرے نے سامݨے اَے . حضرت اِبراہِیم اپݨے لوکاں کی دفݨاݨے واسطے اُس غارے کی باڑی سمیت عِفرون کولوں خریدی کِہندا سی۔ 31اُتھے حضرت اِبراہِیم تے اُنہاں نی زناݨی بی بی سارہ دفݨائے گئے سݨ، اُتھے حضرت اِسحاق تے اُنہاں نی زناݨی بی بی رِبقہ وی دفݨائی گئے سݨ، تے اُتھے ہی میں مہاڑی زناݨی لیاہ کی دفن کِیتا سی. 32او باڑی تے اُس نا غار ہتی قبِیلے کولوں خریدیا گیا سی.“
33جس ویلے حضرت یعقُوب اپݨے پُتراں کی وصیت کری رہے، تے اُنہاں اپݨے پَیر بِسترے اپر کہٹھے کری کہندے تے انتقال کری گئے۔
Currently Selected:
توریت شریف: پَیدایش 49: phr
Highlight
Share
Compare
Copy
Want to have your highlights saved across all your devices? Sign up or sign in
Text (c) 2021 Noor-e-Kashmir
Audio (p) 2021 Noor-e-Kashmir
