توریت شریف: پَیدایش 47
47
1فِر حضرت یُوسف اچھی کے فرعون کی خبر دِتی، «مہاڑا پیؤ تے مہاڑے پہرآ اپݨے سارے مال مویشی کہنی کے مُلخے کَنعان تُوں آئی گئے اݨ، تے ہُݨ او جَوشن نے علاقے وِچ اݨ.» 2فِر اُنہاں اپݨے پہراواں وِچوں پنجاں کی اپݨے نال کِہندا، تے اُنہاں کی فرعون نے سامݨے حاضر کِیتا۔
3فرعون اُنہاں نیاں پہراواں کولوں پُچھیا، «تُساں نا کے پیشہ اے؟»
اُنہاں فرعون کی جواب دِتا، «اساں تُساں نے خادم بکروال آں، جِس طرح اَساں نے پیؤ دادے سݨ۔» 4فِر اُنہاں اے وی فرعون کی آخیا، «اَساں اِس مُلخے وِچ مسافراں نی طرح رہݨے واسطے آئے آں، کِیئانکہ مُلخے کَنعان وِچ سخت قحط پَیݨے نی وجہ نال اساں تُساں نے خادماں نے ڈنگراں واسطے کہاہ ختم ہوئی گیا. تُساں مہربانی کرو تے اپݨے خادماں کی جوشن نے علاقے وِچ رہݨ دیو۔»
5فِر فرعون حضرت یُوسف کی آخیا، «چیونکہ تُہاڑا پیؤ تے تہاڑے پہرآ تہاڑے کول آئی گئے اݨ 6تے مصر نا مُلخ تہاڑے اگے اَے، اِس واسطے اِتھے نے چنگے توں چنگے علاقے وِچ اپݨے پیؤ تے پہراواں کی بَسائی شوڑ، مطلب جوشن نے علاقے وِچ اُنہاں کی رہݨ دے۔ جے تہاڑے خیالے وِچ اُنہاں وِچ کوئی سیاݨے بندے اݨ، تے اُنہاں کی مہاڑے ڈنگراں نی دیخ بھال واسطے رخی شوڑ۔»
7فِر حضرت یُوسف اپݨے پیؤ حضرت یعقُوب کی اندر کہنی آئے، تے اُنہاں کی فرعون اگے حاضر کِیتا، تے حضرت یعقُوب فرعون کی دُعاواں دِتیاں۔
8فرعون حضرت یعقُوب کولوں پُچھیا، «تُساں نی کتنی عمر اَے؟»
9حضرت یعقُوب جواب دِتا، «مہاڑی زندگی نا سفر اِک سو تری سال ہوئی گیا۔ مہاڑی زندگی نے دیہاڑے تے تھوڑے رِہی گئے اݨ، تے دُکھاں نال پہرے وے اݨ. تے آلے تک اے اِتنے ہوئے وی نی، جتنے مہاڑے پیؤ دادے نی زندگی نے سݨ۔» 10اے گلاں کری کے حضرت یعقُوب فرعون کی دُعاواں دِتیاں، تے اُس کولوں ٹُری گئے۔
11حضرت یُوسف فرعون نے آخݨے پر اپݨے پیؤ کی تے اپݨے پہرواں کی مُلخ مصر وِچ اِک بہُوں چنگا علاقہ دیئی کے اُنہاں کی رعمسِیس، یعنیٰ جوشن، نے علاقے وِچ بسائی شوڑیا۔ 12تے حضرت یُوسف اُنہاں نی، تے اُنہاں نیاں ساریاں کہرے نیاں بندیاں تے اُنہاں نیاں بچیاں نی ضرورت نے مطابق غلہ وی دیݨے رہے۔
13کِسے جغہ وی کھاݨے واسطے کُج وی نی رہیا، کِیئانکہ قحط بہُوں ہی سخت سی. مُلخ مصر تے ملخ کَنعان نے لوک پُکھ نال بہُوں کمزور ہوئی گئے. 14جتنے پیسے مصر تے کَنعان مُلخاں نے وِچ سݨ، او سارے حضرت یُوسف اُس کݨکے نے بدلے جمع کری کِہندے، تے فرعون نے محل وِچ پُہنچائی شوڑے۔ 15فِر جس ویلے سارے پیسے جیہڑے مصر تے کَنعان نیاں مُلخاں وِچ سݨ ختم ہوئی گئے، او سارے مصری لوک حضرت یُوسف کول اچھی کے آخݨ لغے، «اساں کی غلہ دیو، کِیئانکہ اَساں کول پیسے نی رہے! تُساں نے سامݨے اساں کِیئاں مَراں؟»
16حضرت یُوسف آخیا، «جے پیسے تساں کول نی، تے تُساں اپݨے ڈنگر دیو، تے میں تُساں کی اُنہاں ڈنگراں نے بدلے غلہ دیساں۔» 17فِر او حضرت یُوسف کول اپݨے ڈنگر آݨنے رہے، تے حضرت یُوسف کہوڑے، پہڈاں، بکریاں، گاںئیاں، داند تے کھوتیاں نے بدلے وِچ اُنہاں کی غلہ دیݨ لغی پئے۔ تے پُورا سال حضرت یُوسف اُنہاں کی ڈنگراں نے بدلے غلہ دیݨے رہے۔
18جدوں اے سال لنگی گیا، تے او فِر دوئے سال اُنہاں کول اچھی کے آخݨ لغے، «جناب، اساں تُساں کولوں کُج ناں چھپاݨے، کِیئانکہ اساں نا سارا پیسہ مُکی گیا۔ تے تُساں اَساں نے ڈنگراں تے پہڈاں بکریاں نے مالک وی بݨی گئے او. جناب، ہُݨ اَساں کول اپݨے جسم تے اپݨی زِیمی نے علاوہ کُج وی نی رہیا۔ 19تے بس! ہُݨ اے کِس طرح ہوئی سکݨا کہ اَساں تُساں نے سامݨے فاقے نال تڑفی تڑفی کے مری جاں، تے ساڑی زِیمی اُجڑی جائے؟ اِس واسطے تُساں ہُݨ اساں کی ساڑے تے ساڑیاں زمیناں نے بدلے وِچ غلہ دیو، تے اَساں فرعون نے غلام بݨی جاں تے او ساڑیاں زمیںاں نا مالک بݨی جائے۔ اَساں کی بِیں دیئی شوڑو، تانکہ اَساں مَراں ناں، بلکہ جِیݨے ریاں تے مُلخ وی ناں اُجڑے۔»
20اِس طرح حضرت یُوسف مصر نی ساری زِیمی فرعون نے نائیں پر خریدی کِہندی، کِیئانکہ سخت قحط کولوں تنگ اچھی کے مصریاں وِچوں ہر بندے اپݨیاں باڑیاں بیچی سَٹیاں. تے بس! اِس طرح ساری زِیمی فرعون نی ملکیت ہوئی گئی۔ 21مصر نے اِک سِرے توں کہنی کے دوئے سِرے تک جتنے لوک آباد سݨ، اُنہاں ساریاں کی حضرت یُوسف فرعون نا غُلام بݨائی شوڑیا۔ 22پر پُجاریاں نی زِیمی بکݨے تُوں بچی گئی، کِیئانکہ پُجاریاں کی فرعون نی طرفوں سامان لبھݨا سی. اِس واسطے او اُس راشن پر گُزارہ کرنے سݨ. اِس طرح اُنہاں نی زِیمی بچی گئی۔
23فِر حضرت یُوسف اُنہاں لوکاں کی آخیا، «تکو! میں اَج نے دیہاڑے تُساں کی تے تُساں نیاں زمیناں کی فرعون نے نائیں پر خریدی کہندا. ہُݨ تُساں اپݨے واسطے اَساں کولوں بِیں کہنو، تے باڑیاں وِچ راؤ. 24پر فصلے نا پنجواں حصہ فرعون کی دیو. باقی چار حصے تُساں واسطے رہݨ، کِیئانکہ باڑیاں واسطے فِر وی بِیں لوڑی نا ہوسی، تے تُساں، تے تُساں نیاں کہرے آلیاں تے بال بچیاں نے کھاݨے واسطے وی رہسی۔»
25اے سُݨی کے او آخݨ لغے، «تُساں جان بَچائی اَے. بس، ہُݨ اساں پر جناب نے کرم نی نظر رہے، تے اَساں فرعون نے غلام بݨے رہساں۔»
26فِر حضرت یُوسف اے قانون، جیہڑا حالے تک اَے، ملخ مصر واسطے بݨایا کہ فرعون پیداوار نا پنجواں حصہ کہنیا کرسی، تے صرف پُجاریاں نی زِیمی فرعون نی ملکیت ناں ہوسی۔
27حضرت یعقُوب نی اولاد، یعنی بنی اسرائیلی لوک، مُلخ مصر وِچ جوشن نے علاقے وِچ رہݨے سݨ. اُتھے اُنہاں کی زمین لبھی، تے او بہُوں سارے پَھلے پھولے، تے اُنہاں نی تعداد بہُوں ہی زیادہ ہوئی گئی۔
28مصر وِچ حضرت یعقُوب کی رہݨیاں ستاراں سال ہوئی گئے، تے اُنہاں نی کُل عُمر اِک سو سنتالی سال ہوئی۔ 29جدوں اُنہاں نے مرنے نا ویلا نیڑے آیا، تے اُنہاں اپݨے پُترے حضرت یُوسف کی بُلایا تے آخݨ لغے، «جے تُوں مہاڑے پر مِہربان ایں، تے توں اپݨا ہتھ مہاڑے چوڑے نے تھلے رخی کے پکی پکی قسم چا کہ توں مہاڑے نال رحم تے وفاداری کری کے مِکی مُلخ مصر وِچ ناں دبݨ لغا۔ 30بلکہ جدوں میں مری جاں، تے مِکی مصر وِچوں کڈی کے پیؤ دادے نے قبرستان وِچ دَبیاں.»
حضرت یُوسف جواب دِتا، «جِس طرح تُساں آخیا اَے، میں اُسے طرح ہی کرساں۔»
31فِر حضرت یعقُوب آخیا، «تُوں مہاڑے سامݨے قسم کھا.»
فِر حضرت یُوسف اُنہاں اگے قسم کھادی، تے حضرت یعقُوب اپݨا سِر بسترے پر چُہکائی کے شکر ادا کِیتا۔
Currently Selected:
توریت شریف: پَیدایش 47: phr
Highlight
Share
Compare
Copy
Want to have your highlights saved across all your devices? Sign up or sign in
Text (c) 2021 Noor-e-Kashmir
Audio (p) 2021 Noor-e-Kashmir
