4. Mose 17
17
I pirja wenn i sikepen
1Un o baro Dewel rakras o Moseha un penas: 2-3“Pen ap o Aroneskro tchaweste, o rashajeste Eleasar, te lell job kol pirja dran i jag, un witsrell koi jag dur krik! Kol tchilatche, kai meran, anan kal pirja glan o baro Debleste. Doleske hi kal pirja o Debleskro un hunte wenn an o Debleskro kheer. Denn kol pirja buchlo, te wenn sane buchle sasterne patria dran lende! Un kolen denn trul o Debleskri chatchepaskri#17:2-3 Debleskri chatchepaskri: altaro , te wenn le i sikepen, te bistrenn i Israelitarja gar, hoi djas!”
4Un o rashai Eleasar las kol sasterne pirja, hoi anan kolla, kai his djides chatchedo, un das i pirja buchlo, te wenn le trul o Debleskri chatchepaskri dino, 5jaake har penas o baro Dewel kowa o Moseske. Kol sane sasterne patria his i sikepen, te denn kol Israelitarja jak, te well kek mursh, kai gar o Aroneskre menshendar hi, un anell sungepaskro koowa glan o baro Debleste, te djal leske gar jaake har o Koracheske un kolenge, kai pash leste his.
I Israelitarja tchingrenn ap o Mose un ap o Aron
6O wawar taissarlakro his kol tsele Israelitarja chojedo ap o Moseste un ap o Aroneste, un penan: “Tumer kran o baro Debleskre menshen mulo.”
7Un har kol tsele menshe trul o Mose un o Aron tardo his, dikan jon pash o Debleskro plachteno kheer. Un ap jek kopo was koi wolka pral o kheer. Un o baro Debleskro railepen was diklo. 8Un o Mose un o Aron djan glan o Debleskro plachteno kheer.
9Un o baro Dewel rakras o Moseha un penas: 10“Djan win kol menshendar. Me kamau len ap jek kopo te marell.”
Un kol dui witsran pen ap pengro mui. 11Un o Mose penas ap o Aroneste: “Le koi piri, dja pash o Debleskri chatchepaskri#17:11 Debleskri chatchepaskri: altaro un tchip jag lestar an koi piri, un tchip sungepaskro koowa koi pre, un dja sik pash i tsele menshende, un chatche ko sungepaskro koowa, te well lengri doosh krik lino! O baro Debleskri choli was ap lende, un lengri phagi hi kai.”
12Un o Aron kras jaake, har o Mose leske penas, un nashas mashkral i tsele menshende un dikas, kai bud menshe mulo his. Koi chatchras job sungepaskro koowa, te dikell o Dewel buder gar ap i menshengri doosh. 13Un job his tardo mashkral kol mulende un kol djidende. Koi djas koi phagi krik.
14Kolla, kai meran ap koi phagi, his 14.700 (deesh-te-star-serja-efta-sheel) menshe. Mank lende his gar kolla, kai meran khetne o Koracheha.
15Un o Aron was pale pash o Moseste pash o wudar glan o Debleskro kheer. Koi phagi his krik.
O Aroneskro kasht
16Un o baro Dewel rakras o Moseha un penas: 17“Rake i Israelentsa un le lendar deesh-te-dui lengste kashta. Le len kol pralstunendar pral kol deesh-te-dui bare familje, kai wenna kol deesh-te-dui Jakobeskre tchawendar: hako pralstunestar jek kasht. Un tchin hakeneskro lab koi dren! 18O Aroneskro lab hunte tchiness an ko kasht, hoi o khereske Levi hi. Hako pralstuneske hunte well jek kasht koi. 19Un tchip kol kashta an o Debleskro plachteno kheer glan ko mochton, kai o Debleskre deesh laba dren hi, kote, kai wau khetne tumentsa.
20Palle sikrau i Israelende, kones me wi-rodau: Koleskro kasht well senelo. Jaake krau, te wenn jon buder gar chojedo ap tumende.”
21Un o Mose rakras kol menshentsa Israel. Un lengre tsele pralstune dan les deesh-te-dui kashta. Hako pralstuno pral i bari familja das les jek kasht. Un o Aroneskro kasht his ninna mank kol kashta.
22Un o Mose tchiwas kol kashta glan o baro Debleste tele an o Debleskro kheer, kai i deesh Debleskre deesh laba dren hi. 23Ap o wawar diwes, har o Mose an o Debleskro kheer djas, dikas job, kai wan patria win dran o Aroneskro kasht, hoi o khereske Levi his. Ninna blume djan pre, un rukengre#17:23 rukengre fruchte, kate: mandle his ap ko kasht. 24Un o Mose hidjras kol kashta halauter win o baro Deblestar, pash kol tsele Israelitarja, te dikenn jon kowa. Un hakeno las peskro kasht.
25O baro Dewel penas ap o Moseste: “Hidje o Aroneskro kasht pale glan ko mochton, kai o Debleskre deesh laba dren hi, te atchell ko kasht koi, te dikenn les kolla, kai kaman gar te shunell, un jon te tchingrenn gar buder ap mande un merenn.”
26Un o Mose kras, har o baro Dewel kowa penas.
I Israelitarja darenn, te merenn le halauter
27-28Un i Israelitarja penan ap o Moseste: “Dik kai, koon pash o Debleskro kheer wella, kowa hunte merella. Sik wella, kai merah halauter un kek mendar atchell pral. Kameh, te djas mer halauter tele?”
Currently Selected:
4. Mose 17: Sint2021
Highlight
Copy
Compare
Share
Want to have your highlights saved across all your devices? Sign up or sign in
© 2021 Romanes-Arbeit-Marburg e.V.
Erste Auflage
Alle Rechte vorbehalten
Die Lizenzvereinbarung erlaubt eine nicht-kommerzielle Nutzung des Textes. Änderungen des Textes sind jedoch untersagt. Der Rechteinhaber, Romanes-Arbeit-Marburg e.V., muss bei jeder Veröffentlichung erwähnt werden. Für jegliche kommerzielle Verbreitung muss ein Herausgeber beim Rechteinhaber eine schriftliche Genehmigung beantragen.
Herausgeber und Vertrieb: Romanes-Arbeit-Marburg e.V., Germany
info@romanes-arbeit-marburg.de
ISBN: 978-3-00-068366-4
Illustrationen von Louise Bass und Horace Knowles © The British amp Foreign Bible Society, 1954, 1967, 1972, 1994, 1995
Farbige Illustrationen mit Erlaubnis von Louise Bass
Kartenmaterial generiert mit Bible Mapper © 2005-2010 von David P. Barret
Alle Rechte an den Karten © 2021, Wycliffe Bible Translators, Inc.
