5
Dran o foro Betlehem well o rai, koles o Dewel bitchrell
1Tu foro Betlehem an Efrata,
kai hal tikno mank i forja an o them Juda,
dran tute well mange kowa,
kai hi o rai an o them Israel.
Glan hako tsiro his job.
An i phure diwessa his lo koi.
2Jek tsiro dell o baro Dewel peskre menshen
an i wasta wawar menshendar,
bis te well ko diwes,
kai anell i djuwel ko tchawes ab i phub.
Palle wenn leskre phrala, kai pral atchan,
pale an pengro them pash i wawar Israelitarja.
3Un job, ko newo rai, dell garda ap lende,
har i bakrengro garda dell ap peskre bakren.
Leskro Dewel bitchras les,
un leskri soor well lestar, o baro Deblestar.
An ko tsiro djal leskro railepen un leskri soor
jaake dur har i phub hi.
Un i menshe an leskro them nai djiwenn kek darjah.
4Un job anell lenge i latcho tsiro.
I lurde dran o them Assur wenn dino
Te wenn i lurde dran o them Assur an maro them,
un phagenn an mare khera dren,
tchiwah mer sorele pralstunen un rajen#5:4 wörtlich: efta bakrengre un ochta raja pre,
te rikrenn le len pale.
5Pengre charentsa lenn le o them Assur dren
– ko them o murshestar Nimrod –
un wenn i raja pral lende.
Te phagenn i lurde dran o them Assur an maro them dren,
un kamenn les dren te lell,
palle lell men maro newo rai dran lengre wasta win.
I Israelitarja, kai pral atchan
6Un kolla kai djido atchan o Jakobeskre tchawendar,
djiwenn mank wawar menshende an bud themma.
Lenge hi le har o pani,
hoi mukell o baro Dewel taissarlakro ap o senlepen te perell,
un har o brishin, hoi o senlepen sapeno krell.
Kek mensho hunte penell lenge, hoi te krenn le.
7Kolla, kai atchan pral o Jakobeskre menshendar,
hi i menshenge an i wawar themma
har i lewo mank i wawar viechende an o weesh,
har i terno lewo mank i bakre.
Job perell pral lende,
marell len un dandrell len khetne.
Un kek nai rikrell les pale.
8Israel, hade tiro wast pral halauterende,
kai kurenn pen tuha, te atchell kek lendar djido!
I chochene debla wenn paash dino an Israel
9O baro Dewel penell:
An ko tsiro lau tumare grajen krik,
un tire wurdja dau khetne.
10Un tire forja dau paash,
un tire tsele sorele khera phagau tele.
11Un o tselo bengeskro koowa lau tumendar krik,
kek drawepangre atchenn pash tumende.
12Tumare figure, hoi an-mangenn,
un tumare pre-tchidde barra dau paash,
te mangenn tumer buder gar kowa an,
hoi tumare wastentsa kran.
13Kol kashta, hoi i debletsa Ashera sikrenn,
tserdau win dran i phub,
un tumare forja krau paash.
14Un me dau an miri choli dren an i tsele themma ap kai phub,
kai shunan gar ap mande.
