Mateo 9
9
O Jesus hi i soor, te lell lo i doosh i menshendar
1Koi djas lo pale an i bero, uleras ap i wawar panjeskri rig, un was an peskro foro. 2Un jon anan i murshes pash leste. Kowa nashte nashell gar un his ap o tchiben tchiddo. Un har o Jesus kolengro patsepen dikas, penas lo ap ko mursheste: “Ma traash, miro tchawo! Me lau tiri doosh tutar.”
3Har i biboldengre tchatchepangre kowa shunan, penan le ap pende kokres: “Kowa krell pes har o Dewel!”
4Un o Jesus haiwas, hoi an lengro shero trujel djas. Un job penas ap lende: “Hoske djal sawo tchilatchepen an tumaro shero trujel? 5Hi kowa phareder, te penap ap leste: Me lau tiri doosh tutar, har te penap: Ste pre un dja khere? 6Me kamau, te djinenn tumer, o Menshengro Tchawes hi koi soor ap i phub, te nai lell lo i doosh#9:6 doosh shulta, sinda i menshendar.” Doleske penas job ap ko mursheste, kai nai nashell gar: “Ste pre, le tiro tchiben un dja khere!”
7Un kowa stas pre un djas khere. 8Un har kol bud menshe kowa dikan, daran le o Deblestar un sharan les, kai das i menshes jaake bud soor.
O Jesus un i pale-tchidde
9Pal kowa djas o Jesus dureder. Un job dikas i murshes pash i kheer beshdo. Kowa his i biboldo, kai las i biboldendar lowe i Remarjenge dren.#9:9 Ap ko tsiro his i Remarja i raja pral i biboldende. Un i bibolde hunte plaissran lenge ko themeskre lowe. Kol bibolde, kai pengre menshendar kol lowe i Remarjenge dren lan, his pale-tchiddo pash i tsele biboldende. Leskro lab hi Mateo. Un o Jesus penas ap leste: “Am, dja mantsa!”
Un job stas pre un djas leha.
10Pal kowa djas o Jesus pash koleste an o kheer. Un har job pash i chapaskri tchiddo his, wan kote ninna bud kolendar khetne, kai lenn i biboldendar kol lowe i Remarjenge dren, un wawar, kai tchilatcho koowa kran un doleske ninna pale-tchiddo hi. Un jon chan o Jesuseha un leskre malentsa khetne.
11Un har i Farisarja kowa dikan, penan le ap i Jesuseskre malende: “Hoske chal tumaro sikepaskro kolentsa, kai lenna i biboldendar kol lowe i Remarjenge dren, un kol wawarentsa, kai ninna pale-tchiddo hi?” 12Un o Jesus shunas kowa, un penas ap lende: “Kolla, kai sasto hi, djan gar pash o dramaskro. Kolla, kai nasselo hi, djan pash leste. 13Kowa hunte djinenn tumer: O Dewel penas: Me kamau gar, te marenn mange viechen. Na-a! Me kamau, te hi tumen i baro dji i wawarenge.
Me wom gar, te dap kolen pash mande gole, kai djan ap o tchatcho drom. Na-a! Me wom, te dap kolen pash mande gole, kai hi ap o tchilatcho drom.”
I newi mool un o phuro gono
14Palle wan o Johanneskre mala pash o Jesuseste, un penan ap leste: “Mer un i Farisarja chah un pijah i tsiro tchi, te mangas o Debles an. Hoske krenn tire mala kowa gar?”
15Penas o Jesus ap lende: “Jaake rah har o bijabeskro ap i bijab hi, hi peskre mala bachtelo. Ko tsiro wella, kai well o bijabeskro lendar lino. Ap ko tsiro chan le un pijenn le tchi, te mangenn le o Debles an.
16Kek siwell i newo kotar than#9:16 than stoffdo ap i phuro ripen. Pash o thopen well o newo kotar tikneder un tserdell pes pale tele, un o phuro ripen djal budeder paash. 17Un kek tchorell i newi mool an i phure moljakre gone. I newi mool krell i phure moljakre gone paash. Un i mool nashell win. I newi mool well tchoredo an i newe moljakre gone. Palle djal i newi mool un i newe moljakre gone gar paash.”
I muli tchai un i nasseli djuwel
18Un har job kowa rakras, was i pralstuno pral i biboldengri kangri pash leste, witsras pes glan leste tele ap i phub, un penas: “Miri tchai meras glan i tikno tsiro. Am mantsa un tchip tiro wast ap late! Un joi wella djido.”
19Un o Jesus stas pre un djas leha. Un leskre mala djan ninna leha.
20Ap o drom his i djuwel. Kolat his deesh-te-dui bersha i ratlo nasslepen#9:20 Dran kowa his li pale-tchiddo, dik: 3. Mose 15:25. 21Koja penas peske: “Me te taprau ap leskro ripen, wau sasto.”
Un joi djas pal leste, un tapras ap leskro ripen.
22Un o Jesus rissras pes trujel, dikas lat, un penas ap late: “Romnija ma traash! Tiro patsepen kras tut sasto.” Un ap kau tsiro was koi djuwel sasto.
23Un o Jesus djas dureder, un was pash ko pralstuneskro kheer. Kote his i bashepangre un bud menshe. Har job o merepaskro bashepen un i bari gole shunas, 24penas lo: “Djan tumenge! Kai tchai meras gar. Joi sowella.” Un jon san pral leste.
25Har kol tsele menshe win glan o kheer his, djas lo dren, tapras koi tchakro wast, un koi tchai djiwas pale, un stas pre. 26Un i tsele menshe, kai kote an i forja un gaba djiwan, shunan kowa.
O Jesus krell dui korelen sasto
27Un o Jesus djas dureder. Un dui korele mursha djan leske palla. Kolla dan gole: “Davideskro tchawo, kre men sasto!” 28Un har job an o kheer djas, wan i dui korele pash leste. Un o Jesus penas ap lende: “Patsenn tumer, te nai krau kowa?” Koi penan le: “Awa, rai.”
29Palle tchiwas lo peskro wast ap lengre jaka, un penas: “Jaake har tumer patsan, jaake han tumer kanna sasto.”
30Un jon nai dikan. Un o Jesus penas soreles ap lende: “Te shunell kowa kek!”
31Un jon djan win, un rakran pral kowa, hoi job lenge kras, jaake te shunan le lestar an kol tsele forja un gaba trujel.
I Farisarja rakrenn djungeles pral o Jesuseste
32Un har jon win his, wan menshe pash lende, kai anan i murshes pash o Jesuseste, kai nashte rakras gar. Un les his i beng an leste. 33Un o Jesus tradas o benges win. Har ko beng win his, nai rakras ko mursh pale. Un kol bud menshe, kai kote tardo his, kran bare jaka un penan: “Kek tsireske was sawo koowa an o them Israel diklo.”
34I Farisarja penan: “O pralstuno beng das les koi soor. Doleske nai tradell job kol bengen win.”
I bari budi o Jesuseskre malendar
35Un o Jesus djas an i forja un gaba trujel, un rakras an i biboldengre kangria, un penas i menshenge ko latcho lab, kai o Dewel kamell len dran o tchilatchepen te lell, un kamell lengro rai te well. Un job kras lauteren sasto, kai nasselo hi.
36Un har job kol bud menshen dikas, khaitan le les. Jon his leske har bakre, kai hi len kek bakrengro, kai ap lende garda della. Jon his khino, un len his buder kek soor an lende. 37Un job penas ap peskre malende: “Bud djob hi win tardo, te well lo an o kheer anlo. Jaake hi bud menshe koi, kai kamenn pash o Debleste te well. Un hi gar doha budepangre koi, te anenn le len pash leste.
38Doleske mangenn o Deblestar, te bitchrell lo budepangren, kai leske budrenna!”
Currently Selected:
Mateo 9: Sint2021
Highlight
Share
Copy
Want to have your highlights saved across all your devices? Sign up or sign in
© 2021 Romanes-Arbeit-Marburg e.V.
Erste Auflage
Alle Rechte vorbehalten
Die Lizenzvereinbarung erlaubt eine nicht-kommerzielle Nutzung des Textes. Änderungen des Textes sind jedoch untersagt. Der Rechteinhaber, Romanes-Arbeit-Marburg e.V., muss bei jeder Veröffentlichung erwähnt werden. Für jegliche kommerzielle Verbreitung muss ein Herausgeber beim Rechteinhaber eine schriftliche Genehmigung beantragen.
Herausgeber und Vertrieb: Romanes-Arbeit-Marburg e.V., Germany
info@romanes-arbeit-marburg.de
ISBN: 978-3-00-068366-4
Illustrationen von Louise Bass und Horace Knowles © The British amp Foreign Bible Society, 1954, 1967, 1972, 1994, 1995
Farbige Illustrationen mit Erlaubnis von Louise Bass
Kartenmaterial generiert mit Bible Mapper © 2005-2010 von David P. Barret
Alle Rechte an den Karten © 2021, Wycliffe Bible Translators, Inc.
