1. Korintarja 5

I tchilatcho koowa mank i patslende

1Me shunom, te hi pash tumende i mursh, kai peskri dadeskri romjah sowella. Sawo tchilatcho koowa shunom me gomme gar pash kolende, kai gar patslo hi.

2Tumer han pre-phurdo. Tumer hunte rowans pral ko koowa, un hunte tchiwans koles pale, kai kras ko koowa. 3Ninna te hom me gar pash tumende, hi miro dji pash tumende. Un jaake, har te woms pash tumende, rakrom me i phagi pral koleste win, kai sawo koowa kras: 4Te han tumer lauter khetne an o lab maro rajestar, o Jesusestar, un me hom miro djijeha pash tumende, palle krenn kowa jaake: An i soor maro rajestar, o Jesusestar, denn ko murshes an o bengeskre wasta, 5te merell leskro phuro djipen an leste, jaake te djal ko mensho gar nashedo ap ko diwes, kai well maro rai Jesus pale.

6Tumer sharenn tumen. Un kowa hi gar mishto. Djinenn tumer gar, te krell i tikno kotar shutlo jarro ko tselo wawar jarro shutlo? 7Tchiwenn ko shutlo jarro#5:7 O tchilatchepen hi har o shutlo jarro. tumendar krik, te wenn tumer har i newo maro, kai kek shutlo jarro dren hi! Un tchatchepah tumer han har i newo maro! O Jesus Kristo was menge maredo, te lell lo mari doosh mendar krik, jaake har i bibolde maran i bakro ap pengro baro diwes, kai Passa kharella. 8Un jaake har tchiwan jon ko shutlo jarro krik un chan sau maro, kai kek shutlo jarro dren his, jaake hunte djiwas mer maro newo djipen an o djudjepen un an o tchatchepen. Mer hunte mukas maro phuro djipen, un djiwas buder gar an o tchilatchepen.

9Glan i tsiro tchinom me tumenge i liil. Un an ko liil penom tumenge, te wenn tumer gar mala kol menshendar, kai krenn wi-ladjedo koowa. 10An ko liil rakrom me i patslendar un gar lauterendar ap kai phub, kai krenna wi-ladjedo koowa, kai hi boklo pal i lowe, kai hi tchorepangre, un kai mangenn wawar koowa an har o Debles. Kolendar rakrau me kate gar. Te rakroms kolendar, hunte mukans tumer kai phub. 11An ko liil tchinom tumenge, te wenn tumer kek mala kolendar, kai penenn pendar: “Me hom patslo” un krenn wi-ladjedo koowa, hi boklo pal i lowe, mangenn wawar koowa an har o Debles, praassenn i wawaren, hi pipangre un tchorepangre. Te hi jek mashkral tumende, kai krell sawo koowa, koleha chan gar khetne! 12-13Kowa hi gar maro koowa, te rakras o tchatchepen pral kolende win, kai gar patslo hi. Kowa krell o Dewel. Tumer hunte rakrenn o tchatchepen pral kolende win, kai patsle hi. Witsrenn koles dran tumende win, kai krell ko tchilatcho koowa!

Currently Selected:

1. Korintarja 5: Sint2021

Highlight

Copy

Want to have your highlights saved across all your devices? Sign up or sign in

Erste Auflage

Die Lizenzvereinbarung erlaubt eine nicht-kommerzielle Nutzung des Textes. Änderungen des Textes sind jedoch untersagt. Der Rechteinhaber, Romanes-Arbeit-Marburg e.V., muss bei jeder Veröffentlichung erwähnt werden. Für jegliche kommerzielle Verbreitung muss ein Herausgeber beim Rechteinhaber eine schriftliche Genehmigung beantragen.

Herausgeber und Vertrieb: Romanes-Arbeit-Marburg e.V., Germany

info@romanes-arbeit-marburg.de

ISBN: 978-3-00-068366-4

Illustrationen von Louise Bass und Horace Knowles © The British amp Foreign Bible Society, 1954, 1967, 1972, 1994, 1995

Farbige Illustrationen mit Erlaubnis von Louise Bass

Learn More About O Debleskro Drom 2021 (Sinte)