U̍ku̍rɔ̍ yī Alɛrɔ̄ 16
16
Iti̍mōti yɛ tāa Ipɔ̍ɔli ba̍la Isa̍yi̍lāasi
1Ipɔ̍ɔli wā ge̍ ga ga Idɛ̍bɛ ba̍la Ili̍si̍tra bɛ̍ɛ̄nɛ̄. A̍chi̍kpo̍ yī Iji̍sɔ̄ɔsi ɔha̍ nīi re̍ka Iti̍mōti ma̍ hɔ̄ abɔ̍ɔ. Ɛ̍nɛ̍ yī nū - Iju̍u nɛ; ɔ̄chɛ yī Iji̍sɔ̄ɔsi i̍ngi̍ngɔ̍ɔ nɛ. A̍dā yī nū ma̍ - Igri̍iki nɛ. 2Āchɛ yī Iji̍sɔ̄ɔsi abɔ̍ɔ la Ili̍si̍tra ba̍la Iko̍nīyum wa̍a̍ ē ka ɔnɛ̄ɛhɛhi yī Iti̍mōti. 3Ipɔ̍ɔli chikpo̍ ge̍ē bī Iti̍mōti ku iyī nū; wu̍chē yī ɔla̍ā, o̍ de ɔ̍ twɔ̍wu̍. Wu̍chē lɔkɔ nīi Iju̍u yī ɛbɛ ɛla̍ā wa̍a̍ jo̍ōkū hīka a̍dā yī ɔ̍lɔ - Igri̍iki nɛ ma̍, ohu̍ nīi o̍ ya̍ i̍ngɔ̍ɔ a̍nɛ. 4E̍ ta̍ ipwo̍gra ta̍, kɛlā de āchɛ yī Iji̍sɔ̄ɔsi, koko̍o yī lɛlā nīi alɛrɔ̄ ba̍la ɛgabɔ̄ yī ogrēeyī yī āchɛ yī Ɔwɔ abɔ̍ɔ la Ijɛru̍sālɛm ka ka ɛ̍lɛ ge̍ e̍e ya̍ ni̍ ma̍ de wa̍. O̍ ka de wa̍ ka ɛ̍lɛ ge̍ gbō lihɔ ɔla̍ā i̍ngɔ̍ɔ wa̍a̍. 5E̍ ya̍ nīi ogrēeyī yī āchɛ yī Ɔwɔ ɛla̍ā wa̍a̍ lɛ brii la ɔtū ode che Ɔwɔ ga iyɔ̄bū iyɔ̄bū. Āchɛ ē ngma̍ tū wā mɔ̄chīmɔ̄chī.
Yɛ̍ma̍ ɔlɛbɛ̍bi̍ nīi Ipɔ̍ɔli ma̍ ma̍
6Ipɔ̍ɔli ba̍la Isa̍yi̍lāasi ga la ajɛ yī Ifri̍jiya ba̍la Igale̍siya. Uhu Ɔnɛ̄ɛhɛhi yī Ɔwɔ ka de wa̍ hīka ɛ̍lɛ ge̍ e̍e ka ɛrɔ̄ yī Ɔwɔ la ɔcha yī E̍siya ni̍. 7E̍ gbajɛ ga ɔcha yī Imi̍siya ma̍, e̍ yɛ ge̍ē gāa ajɛ yī Ibiti̍niya; Uhu Ɔnɛ̄ɛhɛhi yī Ɔwɔ i̍ chɛ̄ de wa̍ ni̍. 8Wu̍chē yī ɔla̍ā, e̍ ga la Imi̍siya pīya ga Ipwo̍gra ɔha̍ nīi re̍ka Itro̍asi ma̍. 9Ipɔ̍ɔli myɛ̍ma̍ ɔlɛbɛ̍bi̍ ɔha̍ la otu̍ ɔha̍. O̍ ma̍ Olimɛsɛdo̍niya ɔha̍ nīi rɛ abɔ̍ɔ ē ka ē grāa anu̍ hīka ɔ̍lɔ ge̍, “Ipɔ̍ɔli be̍e! Ga wā amu la Imɛsɛdo̍niya wā ge̍ tū alɔ wɔbɔ̄ oo.” 10Ipɔ̍ɔli jiya lɛlā nūma̍ ma̍ wa̍a̍ ma̍, alɔ tībi̍īyē yī oge̍ pīya yī Imɛsɛdo̍niya ɔpɔ̄ɔpɛ̄. Wu̍chē oji̍ nɛ, alɔ de jo̍ōkū mɛ̍ hīka Ādā ɔlɔjā hī alɔ ɛra̍ ka aɛ̍lɛ ge̍ gāa ge̍ kā Wɔ̄kā Ɔlwɔnyɛ yī anu̍ abɔ̍ɔ a̍nɛ.
Ili̍diya de pīya ɔ̄chɛ yī Iji̍sɔ̄ɔsi abɔ̍ɔ la Ifili̍pāyi
11Alɔ tū wɔwu̍ bū abɔ̍ɔ la Itro̍asi, hɛ̍ yenyi ārɛ̄ ga ajɛ yī Isa̍mōtresi. Ɔ̄chī ɔmɛpa, alɔ pīya ga lɛga yī Iniya̍pɔ̄lisi. 12Alɔ ngmɛ̍ɛchɛ abɔ̍ɔ pīya ga ipwo̍gra nīi re̍ka Ifili̍pāyi ma̍ bɛ̍ɛ̄nɛ̄. Anu̍ re̍ka ipwɔ̍ɔ̄lɛ̍ ɔlamu ɔlamu la wāā ɔla̍ā yī Imɛsɛdo̍niya a̍nɛ. Ipwo̍gra nīi Aliro̍om ke̍e̍ lwɔ̄lɛ̍ gblāa abɔ̍ɔ ma̍ nɛ. Alɔ gblāa abɔ̍ɔ kpɛɛ la ipwo̍gra ɔla̍ā. 13La Ɔ̄chī Ɔmyɛ̍nyɛ̍, alɔ wā ge̍ ngmɛ̍ɛchɛ hī ipwɔ̍ɔ̄lɛ̍ ga oko̍o yī ɔkpa̍ ɔha̍ la ɛbɛ nīi alɔ gbɛri̍ya̍ ka Iju̍u ē grēeyī ē jɔhā ma̍. Anyā ɛha̍ wā gblāa abɔ̍ɔ ma̍, alɔ pīya hɔ̄ hyāhɔ̄ abɔ̍ɔ ē kɛlā de wa̍. 14Ɔnyā ɔha̍ nīi re̍ka Ili̍diya ma̍ hɔ̄ abɔ̍ɔ ē darɔ̄ku. O̍ bū la Itiya̍tīra. O̍ ē bī ɔ̄pa̍ ɔnɔ̄a̍ ɔha̍ nīi ē lwɔ̍la̍ ka̍ka̍ ma̍ ē ra̍. Ɔ̄chɛ ɔya̍ otūlichō yī Ɔwɔ nɛ. Ādā lwāa anu̍ ūkpɔ̄tū tɔ̍ɔ̄ta̍ lā ke̍e̍ nīi o̍ yɛ ē darɔ̄ku lɛlā nīi Ipɔ̍ɔli yɛ ē ka ma̍ a̍nɛ. 15Anu̍ ba̍la alwɔlɛ̍ yī nū wa̍a̍ de hu yenyi bɛ̍ɛ̄nɛ̄. O̍ ra̍ābɔ̄ de alɔ hīka aɛ̍lɛ ge̍ chɛ̄ lēchi̍ lēchi̍ hīka anɔ̍lɔ - ɔ̄chɛ yī Ɔwɔ, ɔ̍lɔma̍ aɛ̍lɛ ge̍ pīya wā ge̍ hɔ̄ la wɔlɛ̍ yī anu̍. O̍ i̍ chɛ̄ nīi alɔ hi̍hi̍yo̍ ni̍ kpɛkpɛ.
Abɔ̍ɔ lipu̍ yī igbakɔbɔ la Ifili̍pāyi
16I̍chi̍chɛ ɔha̍, alɔ yɛ gāa ɛbɛ ɔjɔhā ma̍, alɔ grāa ɔɔ̍pɛ̄ ɔnɔ̄nyā ɔha̍ nīi - ɔfiyɛ ma̍. O̍ ku̍ yapri̍ija ɔdwɔ̄bi̍ nīi ē ya̍ nīi o̍ mwɔ̍ɔmu ma̍. O̍ ē ya̍ okpo ē de abā yī nū la wɔmu ɔmɔ̍ɔ̄ma̍ ɔla̍ā kpɛ̍ɛji. 17O̍ de ku Ipɔ̍ɔli ba̍la alɔ la u̍tu yɛ abɔ̍ɔ ē tɔ̍ɔna gbōō hīka, “Āchɛ nūma̍ - āchɛ yī Ɔwɔ Ɔnɔ̄kɔ̄kū nɛ oo! E̍ yɛ ē koko̍o ē de ala̍ lɔkɔ nīi ala̍ ge̍ē lɛ ɔhɛ̍ta̍ ma̍!” 18Ɔlyapri̍ija ɔla̍ā yɛ̍ɛ̄lā nūma̍ i̍ngi̍ngɔ̍ɔ gbajɛ la ɔ̄chī ɛmɛ̍ɛmla̍a. O̍ de wu̍ Ipɔ̍ɔli ɔtū ji bɛ̍ɛ̄nɛ̄. O̍ pīya kpa̍ta̍ ka tāa yapri̍ija nīi ku̍ ɔyi̍ ɔnɔ̄nyā ɔla̍ā ma̍ hīka, “Bū la riyī yī Iji̍sɔ̄ɔsi Ikra̍yisi, n ge̍ē koko̍o ē de wɔ! Ngmɛ̍ɛchɛ hī ɔyi̍ ɔnɔ̄nyā ɔla̍ā ibi̍īyē!” Yapri̍ija ɔdwɔ̄bi̍ ɔla̍ā ngmɛ̍ɛchɛ hī ɔyi̍ ɔla̍ā ɔpɔ̄ɔpɛ̄. 19Aa̍ abā yī nū wā ge̍ ma̍ hīka ɔpɔ̄pū obī ya̍ okpo yī aa̍ ɔ̍lɔ i̍ hɔ̄ gɛ ni̍ ma̍, e̍ ku̍ Ipɔ̍ɔli ba̍la Isa̍yi̍lāasi, bī āā pīya ge̍ de alihiyo abɔ̍ɔ la o̍gra. 20E̍ bī āā wā ge̍ de alihiyo ma̍, e̍ koko̍o hīka, “Āchɛ nūma̍ - Iju̍u nɛ. E̍ yɛ amu ē ta̍tu̍tu̍ yī lɛlā ogbōgbo amu la ipwo̍gra nūma̍ kpɛ̍ɛji. 21E̍ gblāa amu ē ngū āchɛ lɛlā nīi lihɔ yī alɔ i̍ chikpo̍ ni̍ ma̍. Alɔ - āchɛ yī Iro̍om nɛ ma̍, alɔ i̍ ge̍ē yɛ̍ɛ̄lā yī wā ɔla̍ā ni̍.” 22Āchɛ wa̍a̍ nīi gblāa abɔ̍ɔ ta̍kakatū wā ma̍ nyɔ̄ duu tū Ipɔ̍ɔli ba̍la Isa̍yi̍lāasi bɛ̍ɛ̄nɛ̄. Alihiyo ɛla̍ā ku̍ ɛjā otūlibi̍īyē yī aa̍ Ipɔ̍ɔli hi̍ya. E̍ ka ka ɛ̍lɛ ge̍ gwō Ipɔ̍ɔli ba̍la Isa̍yi̍lāasi lijē la a̍grɛ̄chi̍. 23E̍ gwō wā lijē ka̍ka̍ka̍ ma̍, e̍ ku̍ wā tū ga igbakɔbɔ, koko̍o de ɔ̄chɛ odeyīrɛ igbakɔbɔ ka ɔ̍lɔ ge̍ gwō ɔpu tū ɛ̍lɛ brii. 24Ɔ̄chɛ odeyīrɛ igbakɔbɔ ɔla̍ā po̍ i̍ngɔ̍ɔ bɛ̍ɛ̄nɛ̄ ma̍, o̍ bī aa̍ Ipɔ̍ɔli ge̍ tū la ɔgba̍rigba̍ri, kpo̍ wā ikpo̍ pla̍tū la wɔ̄gɔ̄ yī ɔchi̍ brii, de igbɔ̄gɔ̄rɔ̄ tū ɔ̄.
25La iyārōtu̍ ɔha̍ātā, Ipɔ̍ɔli ba̍la Isa̍yi̍lāasi gblāa abɔ̍ɔ ē jɔhā, ē gwe̍ejē, kā Ɔwɔ ɔkɔ̄kā. Aligbakɔbɔ ehēhī wa̍a̍ gblāa abɔ̍ɔ ē darɔ̄ku. 26Ɔpɔ̄ɔpɛ̄, ajɛ wa̍a̍ he̍ejē wɔhɔ̍hu̍, ya̍ nīi u̍nu̍ yī igbakɔbɔ ɔla̍ā he̍ejē mɔri̍mɔri̍ pɛtɛɛ ge̍ ku̍ la owu̍tu yī wɔlɛ̍. Ɔpɔ̄ɔpɛ̄, ɔpu yī igbakɔbɔ wa̍a̍ ku̍ lwāa tɔ̍ɔ̄ta̍; agba̍ nīi e̍ de tū aligbakɔbɔ wa̍a̍ ma̍ ku̍ wī hī wā. 27Ɔ̄chɛ odeyīrɛ igbakɔbɔ ɔla̍ā hye̍ēyī ge̍ ma̍ nīi ɔpu yī igbakɔbɔ ɔla̍ā lwāa tɔ̍ɔ̄ta̍ wa̍a̍ gblāa amu ma̍, o̍ je̍ka aligbakɔbɔ wa̍a̍ ɛ̍lɛ de gwɛ̍ɛnya mɛ̍. O̍ pi oge hi̍ya̍a̍ yɛ ge̍ē de iyī nū ngmo̍ mɛ̍. 28Ipɔ̍ɔli gbo ɔ̍ yakpla̍ ka ɔ̍lɔ ge̍ pi̍ye̍mā! Ɔ̍lɔ ge̍ e̍e ya̍ iyī ɔ̍lɔ ɔjɔ̄jā ni̍; ma̍a aɛ̍lɛ gblāa amu wa̍a̍!
29Ɔngrɔ̄ɔ ɔla̍ā tɛ̄rɔ̄ yī otīnīkā ɔpɔ̄ɔpɛ̄. O̍ chɛ̄ ga ɔgba̍rigba̍ri ge̍ ngma̍ ta̍gbo la ajɛ la ikpo̍ yī Ipɔ̍ɔli ba̍la Isa̍yi̍lāasi; ibi̍īyē hɛ̍ ɔ̄ ejē bāa ɔkpa̍kpa̍ ma̍ la uhwi otōtū. 30O̍ bī Ipɔ̍ɔli ba̍la Isa̍yi̍lāasi ngmɛ̍ɛchɛ wā ge̍ che wa̍ ikpo̍ hīka, Ādā, oji̍ nīi anɔ̍lɔ ge̍ē ya̍ obū nīi anɔ̍lɔ ge̍ē lɛ ɔhɛ̍ta̍ ma̍?
31E̍ koko̍o de ɔ̍ ka, “Chɛ̄ ku Ādā Iji̍sɔ̄ɔsi Ikra̍yisi gɛ; ma̍a a ge̍ē lɛ ɔhɛ̍ta̍, awɔ ba̍la alwɔlɛ̍ yī wɔ wa̍a̍!” 32Aa̍ Ipɔ̍ɔli ka ɛrɔ̄ yī Ādā de ɔngrɔ̄ɔ ɔla̍ā ba̍la alwɔlɛ̍ yī nū wa̍a̍. 33La iyārōtu̍ ɔla̍ā, ɔngrɔ̄ɔ odeyīrɛ igbakɔbɔ ɔla̍ā gāa ge̍ na wa̍ ɔjā nīi ya̍ wā yɛ̄grāa nīi e̍ gwō wā lijē ma̍. Anu̍ ba̍la alwɔlɛ̍ yī nū wa̍a̍ de hu yenyi bɛ̍ɛ̄nɛ̄. 34O̍ bī Ipɔ̍ɔli ba̍la Isa̍yi̍lāasi ga u̍nu̍ yī nū ge̍ de ojōre̍ de wa̍. Anu̍ ba̍la alwɔlɛ̍ yī nū wīyā kpɛ̍ɛ, wu̍chē lɔkɔ nīi o̍ de ɔtū che Ɔwɔ bɛ̍ɛ̄nɛ̄ ma̍.
35La eyī ɔnyɔ̄nyā yī nū, alihiyo yī ipwo̍gra ɔla̍ā tū idege̍ri yī wā ɛrɔ̄ hu ɔ̄chɛ odeyīrɛ igbakɔbɔ ɔla̍ā ka ɔ̍lɔ ge̍ tū hī āchɛ ɛla̍ā nīi ɛ̍lɛ ge̍ pīya gɛ!
36Ɔngrɔ̄ɔ odeyīrɛ igbakɔbɔ ɔla̍ā gāa ge̍ ka de Ipɔ̍ɔli bɛ̍ɛ̄nɛ̄ hīka “Alihiyo de āchɛ tɛ̄rɔ̄ wā amu ka ala̍ ɔ̍lɔ ge̍ pīya gɛ! O̍ de lɛ i̍ngɔ̍ɔ ma̍, ala̍ ā ge̍ pīya gɛ! Ala̍ ā pīya la ibi̍īyē ogbodɔ̍dɔ̍ gɛ!”
37Ipɔ̍ɔli koko̍o de idege̍ri ɛla̍ā bɛ̍ɛ̄nɛ̄ hīka, “Alɔ āchɛ yī Iro̍om nɛ; e̍ chī ku̍ alɔ gwō lijē la ɔgbādu ji. E̍ i̍ mɔ̍ɔ̄ma̍ hīka alɔ yɛ̍ɛ̄lā abi̍ o̍bū ni̍, e̍ chī ku̍ alɔ tū igbakɔbɔ ji. U̍ma̍ama, e̍ chikpo̍ ge̍ē wu̍ alɔ ē ngmɛ̍ɛchɛ fi̍yɛ̍ɛ̍ bɛ̍ɛ̄nɛ̄. Īchāha̍ īchāha̍! Alihiyo ɛlɛjā ge̍ wā amu ge̍ wu̍ alɔ ngmɛ̍ɛchɛ la abɔ̄ yī wā!”
38Idege̍ri ɛla̍ā pīya ge̍ de koko̍o de alihiyo ɛla̍ā i̍ngɔ̍ɔ wa̍a̍. E̍ tūuhwi kpɛ̍ɛji nīi e̍ po̍ hīka Ipɔ̍ɔli ba̍la Isa̍yi̍lāasi ɛ̍lɛ - āchɛ yī Iro̍om nɛ ma̍. 39E̍ pīya gāa ge̍ ra̍ābɔ̄ de aa̍ Ipɔ̍ɔli, o̍bū bī wā ngmɛ̍ɛchɛ hī igbakɔbɔ. E̍ ra̍ābɔ̄ de aa̍ Ipɔ̍ɔli ka ɛ̍lɛ ge̍ pīya hī ipwo̍gra nūma̍ bɛ̍ɛ̄nɛ̄. 40E̍ ngmɛ̍ɛchɛ la igbakɔbɔ ma̍, e̍ pīya ga wɔlɛ̍ yī Ili̍diya. E̍ ma̍ āchɛ yī Iji̍sɔ̄ɔsi abɔ̍ɔ kɛlā nīi ge̍ē tū wā wɔbɔ̄ nīi e̍ ge̍ē lɛ brii ma̍ de wa̍. Ipɔ̍ɔli ba̍la Isa̍yi̍lāasi wā ge̍ pīya bɛ̍ɛ̄nɛ̄.
Currently Selected:
U̍ku̍rɔ̍ yī Alɛrɔ̄ 16: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
U̍ku̍rɔ̍ yī Alɛrɔ̄ 16
16
Iti̍mōti yɛ tāa Ipɔ̍ɔli ba̍la Isa̍yi̍lāasi
1Ipɔ̍ɔli wā ge̍ ga ga Idɛ̍bɛ ba̍la Ili̍si̍tra bɛ̍ɛ̄nɛ̄. A̍chi̍kpo̍ yī Iji̍sɔ̄ɔsi ɔha̍ nīi re̍ka Iti̍mōti ma̍ hɔ̄ abɔ̍ɔ. Ɛ̍nɛ̍ yī nū - Iju̍u nɛ; ɔ̄chɛ yī Iji̍sɔ̄ɔsi i̍ngi̍ngɔ̍ɔ nɛ. A̍dā yī nū ma̍ - Igri̍iki nɛ. 2Āchɛ yī Iji̍sɔ̄ɔsi abɔ̍ɔ la Ili̍si̍tra ba̍la Iko̍nīyum wa̍a̍ ē ka ɔnɛ̄ɛhɛhi yī Iti̍mōti. 3Ipɔ̍ɔli chikpo̍ ge̍ē bī Iti̍mōti ku iyī nū; wu̍chē yī ɔla̍ā, o̍ de ɔ̍ twɔ̍wu̍. Wu̍chē lɔkɔ nīi Iju̍u yī ɛbɛ ɛla̍ā wa̍a̍ jo̍ōkū hīka a̍dā yī ɔ̍lɔ - Igri̍iki nɛ ma̍, ohu̍ nīi o̍ ya̍ i̍ngɔ̍ɔ a̍nɛ. 4E̍ ta̍ ipwo̍gra ta̍, kɛlā de āchɛ yī Iji̍sɔ̄ɔsi, koko̍o yī lɛlā nīi alɛrɔ̄ ba̍la ɛgabɔ̄ yī ogrēeyī yī āchɛ yī Ɔwɔ abɔ̍ɔ la Ijɛru̍sālɛm ka ka ɛ̍lɛ ge̍ e̍e ya̍ ni̍ ma̍ de wa̍. O̍ ka de wa̍ ka ɛ̍lɛ ge̍ gbō lihɔ ɔla̍ā i̍ngɔ̍ɔ wa̍a̍. 5E̍ ya̍ nīi ogrēeyī yī āchɛ yī Ɔwɔ ɛla̍ā wa̍a̍ lɛ brii la ɔtū ode che Ɔwɔ ga iyɔ̄bū iyɔ̄bū. Āchɛ ē ngma̍ tū wā mɔ̄chīmɔ̄chī.
Yɛ̍ma̍ ɔlɛbɛ̍bi̍ nīi Ipɔ̍ɔli ma̍ ma̍
6Ipɔ̍ɔli ba̍la Isa̍yi̍lāasi ga la ajɛ yī Ifri̍jiya ba̍la Igale̍siya. Uhu Ɔnɛ̄ɛhɛhi yī Ɔwɔ ka de wa̍ hīka ɛ̍lɛ ge̍ e̍e ka ɛrɔ̄ yī Ɔwɔ la ɔcha yī E̍siya ni̍. 7E̍ gbajɛ ga ɔcha yī Imi̍siya ma̍, e̍ yɛ ge̍ē gāa ajɛ yī Ibiti̍niya; Uhu Ɔnɛ̄ɛhɛhi yī Ɔwɔ i̍ chɛ̄ de wa̍ ni̍. 8Wu̍chē yī ɔla̍ā, e̍ ga la Imi̍siya pīya ga Ipwo̍gra ɔha̍ nīi re̍ka Itro̍asi ma̍. 9Ipɔ̍ɔli myɛ̍ma̍ ɔlɛbɛ̍bi̍ ɔha̍ la otu̍ ɔha̍. O̍ ma̍ Olimɛsɛdo̍niya ɔha̍ nīi rɛ abɔ̍ɔ ē ka ē grāa anu̍ hīka ɔ̍lɔ ge̍, “Ipɔ̍ɔli be̍e! Ga wā amu la Imɛsɛdo̍niya wā ge̍ tū alɔ wɔbɔ̄ oo.” 10Ipɔ̍ɔli jiya lɛlā nūma̍ ma̍ wa̍a̍ ma̍, alɔ tībi̍īyē yī oge̍ pīya yī Imɛsɛdo̍niya ɔpɔ̄ɔpɛ̄. Wu̍chē oji̍ nɛ, alɔ de jo̍ōkū mɛ̍ hīka Ādā ɔlɔjā hī alɔ ɛra̍ ka aɛ̍lɛ ge̍ gāa ge̍ kā Wɔ̄kā Ɔlwɔnyɛ yī anu̍ abɔ̍ɔ a̍nɛ.
Ili̍diya de pīya ɔ̄chɛ yī Iji̍sɔ̄ɔsi abɔ̍ɔ la Ifili̍pāyi
11Alɔ tū wɔwu̍ bū abɔ̍ɔ la Itro̍asi, hɛ̍ yenyi ārɛ̄ ga ajɛ yī Isa̍mōtresi. Ɔ̄chī ɔmɛpa, alɔ pīya ga lɛga yī Iniya̍pɔ̄lisi. 12Alɔ ngmɛ̍ɛchɛ abɔ̍ɔ pīya ga ipwo̍gra nīi re̍ka Ifili̍pāyi ma̍ bɛ̍ɛ̄nɛ̄. Anu̍ re̍ka ipwɔ̍ɔ̄lɛ̍ ɔlamu ɔlamu la wāā ɔla̍ā yī Imɛsɛdo̍niya a̍nɛ. Ipwo̍gra nīi Aliro̍om ke̍e̍ lwɔ̄lɛ̍ gblāa abɔ̍ɔ ma̍ nɛ. Alɔ gblāa abɔ̍ɔ kpɛɛ la ipwo̍gra ɔla̍ā. 13La Ɔ̄chī Ɔmyɛ̍nyɛ̍, alɔ wā ge̍ ngmɛ̍ɛchɛ hī ipwɔ̍ɔ̄lɛ̍ ga oko̍o yī ɔkpa̍ ɔha̍ la ɛbɛ nīi alɔ gbɛri̍ya̍ ka Iju̍u ē grēeyī ē jɔhā ma̍. Anyā ɛha̍ wā gblāa abɔ̍ɔ ma̍, alɔ pīya hɔ̄ hyāhɔ̄ abɔ̍ɔ ē kɛlā de wa̍. 14Ɔnyā ɔha̍ nīi re̍ka Ili̍diya ma̍ hɔ̄ abɔ̍ɔ ē darɔ̄ku. O̍ bū la Itiya̍tīra. O̍ ē bī ɔ̄pa̍ ɔnɔ̄a̍ ɔha̍ nīi ē lwɔ̍la̍ ka̍ka̍ ma̍ ē ra̍. Ɔ̄chɛ ɔya̍ otūlichō yī Ɔwɔ nɛ. Ādā lwāa anu̍ ūkpɔ̄tū tɔ̍ɔ̄ta̍ lā ke̍e̍ nīi o̍ yɛ ē darɔ̄ku lɛlā nīi Ipɔ̍ɔli yɛ ē ka ma̍ a̍nɛ. 15Anu̍ ba̍la alwɔlɛ̍ yī nū wa̍a̍ de hu yenyi bɛ̍ɛ̄nɛ̄. O̍ ra̍ābɔ̄ de alɔ hīka aɛ̍lɛ ge̍ chɛ̄ lēchi̍ lēchi̍ hīka anɔ̍lɔ - ɔ̄chɛ yī Ɔwɔ, ɔ̍lɔma̍ aɛ̍lɛ ge̍ pīya wā ge̍ hɔ̄ la wɔlɛ̍ yī anu̍. O̍ i̍ chɛ̄ nīi alɔ hi̍hi̍yo̍ ni̍ kpɛkpɛ.
Abɔ̍ɔ lipu̍ yī igbakɔbɔ la Ifili̍pāyi
16I̍chi̍chɛ ɔha̍, alɔ yɛ gāa ɛbɛ ɔjɔhā ma̍, alɔ grāa ɔɔ̍pɛ̄ ɔnɔ̄nyā ɔha̍ nīi - ɔfiyɛ ma̍. O̍ ku̍ yapri̍ija ɔdwɔ̄bi̍ nīi ē ya̍ nīi o̍ mwɔ̍ɔmu ma̍. O̍ ē ya̍ okpo ē de abā yī nū la wɔmu ɔmɔ̍ɔ̄ma̍ ɔla̍ā kpɛ̍ɛji. 17O̍ de ku Ipɔ̍ɔli ba̍la alɔ la u̍tu yɛ abɔ̍ɔ ē tɔ̍ɔna gbōō hīka, “Āchɛ nūma̍ - āchɛ yī Ɔwɔ Ɔnɔ̄kɔ̄kū nɛ oo! E̍ yɛ ē koko̍o ē de ala̍ lɔkɔ nīi ala̍ ge̍ē lɛ ɔhɛ̍ta̍ ma̍!” 18Ɔlyapri̍ija ɔla̍ā yɛ̍ɛ̄lā nūma̍ i̍ngi̍ngɔ̍ɔ gbajɛ la ɔ̄chī ɛmɛ̍ɛmla̍a. O̍ de wu̍ Ipɔ̍ɔli ɔtū ji bɛ̍ɛ̄nɛ̄. O̍ pīya kpa̍ta̍ ka tāa yapri̍ija nīi ku̍ ɔyi̍ ɔnɔ̄nyā ɔla̍ā ma̍ hīka, “Bū la riyī yī Iji̍sɔ̄ɔsi Ikra̍yisi, n ge̍ē koko̍o ē de wɔ! Ngmɛ̍ɛchɛ hī ɔyi̍ ɔnɔ̄nyā ɔla̍ā ibi̍īyē!” Yapri̍ija ɔdwɔ̄bi̍ ɔla̍ā ngmɛ̍ɛchɛ hī ɔyi̍ ɔla̍ā ɔpɔ̄ɔpɛ̄. 19Aa̍ abā yī nū wā ge̍ ma̍ hīka ɔpɔ̄pū obī ya̍ okpo yī aa̍ ɔ̍lɔ i̍ hɔ̄ gɛ ni̍ ma̍, e̍ ku̍ Ipɔ̍ɔli ba̍la Isa̍yi̍lāasi, bī āā pīya ge̍ de alihiyo abɔ̍ɔ la o̍gra. 20E̍ bī āā wā ge̍ de alihiyo ma̍, e̍ koko̍o hīka, “Āchɛ nūma̍ - Iju̍u nɛ. E̍ yɛ amu ē ta̍tu̍tu̍ yī lɛlā ogbōgbo amu la ipwo̍gra nūma̍ kpɛ̍ɛji. 21E̍ gblāa amu ē ngū āchɛ lɛlā nīi lihɔ yī alɔ i̍ chikpo̍ ni̍ ma̍. Alɔ - āchɛ yī Iro̍om nɛ ma̍, alɔ i̍ ge̍ē yɛ̍ɛ̄lā yī wā ɔla̍ā ni̍.” 22Āchɛ wa̍a̍ nīi gblāa abɔ̍ɔ ta̍kakatū wā ma̍ nyɔ̄ duu tū Ipɔ̍ɔli ba̍la Isa̍yi̍lāasi bɛ̍ɛ̄nɛ̄. Alihiyo ɛla̍ā ku̍ ɛjā otūlibi̍īyē yī aa̍ Ipɔ̍ɔli hi̍ya. E̍ ka ka ɛ̍lɛ ge̍ gwō Ipɔ̍ɔli ba̍la Isa̍yi̍lāasi lijē la a̍grɛ̄chi̍. 23E̍ gwō wā lijē ka̍ka̍ka̍ ma̍, e̍ ku̍ wā tū ga igbakɔbɔ, koko̍o de ɔ̄chɛ odeyīrɛ igbakɔbɔ ka ɔ̍lɔ ge̍ gwō ɔpu tū ɛ̍lɛ brii. 24Ɔ̄chɛ odeyīrɛ igbakɔbɔ ɔla̍ā po̍ i̍ngɔ̍ɔ bɛ̍ɛ̄nɛ̄ ma̍, o̍ bī aa̍ Ipɔ̍ɔli ge̍ tū la ɔgba̍rigba̍ri, kpo̍ wā ikpo̍ pla̍tū la wɔ̄gɔ̄ yī ɔchi̍ brii, de igbɔ̄gɔ̄rɔ̄ tū ɔ̄.
25La iyārōtu̍ ɔha̍ātā, Ipɔ̍ɔli ba̍la Isa̍yi̍lāasi gblāa abɔ̍ɔ ē jɔhā, ē gwe̍ejē, kā Ɔwɔ ɔkɔ̄kā. Aligbakɔbɔ ehēhī wa̍a̍ gblāa abɔ̍ɔ ē darɔ̄ku. 26Ɔpɔ̄ɔpɛ̄, ajɛ wa̍a̍ he̍ejē wɔhɔ̍hu̍, ya̍ nīi u̍nu̍ yī igbakɔbɔ ɔla̍ā he̍ejē mɔri̍mɔri̍ pɛtɛɛ ge̍ ku̍ la owu̍tu yī wɔlɛ̍. Ɔpɔ̄ɔpɛ̄, ɔpu yī igbakɔbɔ wa̍a̍ ku̍ lwāa tɔ̍ɔ̄ta̍; agba̍ nīi e̍ de tū aligbakɔbɔ wa̍a̍ ma̍ ku̍ wī hī wā. 27Ɔ̄chɛ odeyīrɛ igbakɔbɔ ɔla̍ā hye̍ēyī ge̍ ma̍ nīi ɔpu yī igbakɔbɔ ɔla̍ā lwāa tɔ̍ɔ̄ta̍ wa̍a̍ gblāa amu ma̍, o̍ je̍ka aligbakɔbɔ wa̍a̍ ɛ̍lɛ de gwɛ̍ɛnya mɛ̍. O̍ pi oge hi̍ya̍a̍ yɛ ge̍ē de iyī nū ngmo̍ mɛ̍. 28Ipɔ̍ɔli gbo ɔ̍ yakpla̍ ka ɔ̍lɔ ge̍ pi̍ye̍mā! Ɔ̍lɔ ge̍ e̍e ya̍ iyī ɔ̍lɔ ɔjɔ̄jā ni̍; ma̍a aɛ̍lɛ gblāa amu wa̍a̍!
29Ɔngrɔ̄ɔ ɔla̍ā tɛ̄rɔ̄ yī otīnīkā ɔpɔ̄ɔpɛ̄. O̍ chɛ̄ ga ɔgba̍rigba̍ri ge̍ ngma̍ ta̍gbo la ajɛ la ikpo̍ yī Ipɔ̍ɔli ba̍la Isa̍yi̍lāasi; ibi̍īyē hɛ̍ ɔ̄ ejē bāa ɔkpa̍kpa̍ ma̍ la uhwi otōtū. 30O̍ bī Ipɔ̍ɔli ba̍la Isa̍yi̍lāasi ngmɛ̍ɛchɛ wā ge̍ che wa̍ ikpo̍ hīka, Ādā, oji̍ nīi anɔ̍lɔ ge̍ē ya̍ obū nīi anɔ̍lɔ ge̍ē lɛ ɔhɛ̍ta̍ ma̍?
31E̍ koko̍o de ɔ̍ ka, “Chɛ̄ ku Ādā Iji̍sɔ̄ɔsi Ikra̍yisi gɛ; ma̍a a ge̍ē lɛ ɔhɛ̍ta̍, awɔ ba̍la alwɔlɛ̍ yī wɔ wa̍a̍!” 32Aa̍ Ipɔ̍ɔli ka ɛrɔ̄ yī Ādā de ɔngrɔ̄ɔ ɔla̍ā ba̍la alwɔlɛ̍ yī nū wa̍a̍. 33La iyārōtu̍ ɔla̍ā, ɔngrɔ̄ɔ odeyīrɛ igbakɔbɔ ɔla̍ā gāa ge̍ na wa̍ ɔjā nīi ya̍ wā yɛ̄grāa nīi e̍ gwō wā lijē ma̍. Anu̍ ba̍la alwɔlɛ̍ yī nū wa̍a̍ de hu yenyi bɛ̍ɛ̄nɛ̄. 34O̍ bī Ipɔ̍ɔli ba̍la Isa̍yi̍lāasi ga u̍nu̍ yī nū ge̍ de ojōre̍ de wa̍. Anu̍ ba̍la alwɔlɛ̍ yī nū wīyā kpɛ̍ɛ, wu̍chē lɔkɔ nīi o̍ de ɔtū che Ɔwɔ bɛ̍ɛ̄nɛ̄ ma̍.
35La eyī ɔnyɔ̄nyā yī nū, alihiyo yī ipwo̍gra ɔla̍ā tū idege̍ri yī wā ɛrɔ̄ hu ɔ̄chɛ odeyīrɛ igbakɔbɔ ɔla̍ā ka ɔ̍lɔ ge̍ tū hī āchɛ ɛla̍ā nīi ɛ̍lɛ ge̍ pīya gɛ!
36Ɔngrɔ̄ɔ odeyīrɛ igbakɔbɔ ɔla̍ā gāa ge̍ ka de Ipɔ̍ɔli bɛ̍ɛ̄nɛ̄ hīka “Alihiyo de āchɛ tɛ̄rɔ̄ wā amu ka ala̍ ɔ̍lɔ ge̍ pīya gɛ! O̍ de lɛ i̍ngɔ̍ɔ ma̍, ala̍ ā ge̍ pīya gɛ! Ala̍ ā pīya la ibi̍īyē ogbodɔ̍dɔ̍ gɛ!”
37Ipɔ̍ɔli koko̍o de idege̍ri ɛla̍ā bɛ̍ɛ̄nɛ̄ hīka, “Alɔ āchɛ yī Iro̍om nɛ; e̍ chī ku̍ alɔ gwō lijē la ɔgbādu ji. E̍ i̍ mɔ̍ɔ̄ma̍ hīka alɔ yɛ̍ɛ̄lā abi̍ o̍bū ni̍, e̍ chī ku̍ alɔ tū igbakɔbɔ ji. U̍ma̍ama, e̍ chikpo̍ ge̍ē wu̍ alɔ ē ngmɛ̍ɛchɛ fi̍yɛ̍ɛ̍ bɛ̍ɛ̄nɛ̄. Īchāha̍ īchāha̍! Alihiyo ɛlɛjā ge̍ wā amu ge̍ wu̍ alɔ ngmɛ̍ɛchɛ la abɔ̄ yī wā!”
38Idege̍ri ɛla̍ā pīya ge̍ de koko̍o de alihiyo ɛla̍ā i̍ngɔ̍ɔ wa̍a̍. E̍ tūuhwi kpɛ̍ɛji nīi e̍ po̍ hīka Ipɔ̍ɔli ba̍la Isa̍yi̍lāasi ɛ̍lɛ - āchɛ yī Iro̍om nɛ ma̍. 39E̍ pīya gāa ge̍ ra̍ābɔ̄ de aa̍ Ipɔ̍ɔli, o̍bū bī wā ngmɛ̍ɛchɛ hī igbakɔbɔ. E̍ ra̍ābɔ̄ de aa̍ Ipɔ̍ɔli ka ɛ̍lɛ ge̍ pīya hī ipwo̍gra nūma̍ bɛ̍ɛ̄nɛ̄. 40E̍ ngmɛ̍ɛchɛ la igbakɔbɔ ma̍, e̍ pīya ga wɔlɛ̍ yī Ili̍diya. E̍ ma̍ āchɛ yī Iji̍sɔ̄ɔsi abɔ̍ɔ kɛlā nīi ge̍ē tū wā wɔbɔ̄ nīi e̍ ge̍ē lɛ brii ma̍ de wa̍. Ipɔ̍ɔli ba̍la Isa̍yi̍lāasi wā ge̍ pīya bɛ̍ɛ̄nɛ̄.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)