Romanɛ 15

1Bulɔagɛ gɛganɛ alasɛ tɛ bu di bagɛ ba dɛ gɛganɛ nɛ ɛwɔlɛkɔ nɛ eshutukubui tɛ bu ti ku ishuawɔ̃. 2Alasɛ tɛ bulɔmɛayɛ kanyaka eku yɛɔhayɛ awɔ̃ kɔ yɛ tɛpɛpɛ̃, sɛ tɛ atɔ yɛ ewunɔ. 3Alasɛ Kristo tsyɛ edi ku ishuawɔ̃ pɔ, anasɛ gɛ ba ŋlɔmɛ elu asɛ: “Bagɛ ba kula nɔ nɛ akulatu nɛ awɔlɛ adɔ mɛa bha.” 4Alasɛ kɛdɔnyɛdɔ gɛ ba ŋlɔmɛ elu aba fla ba ŋlɔmɛ kɛlɛ sɛ tɛ ba yɛkɔ akasɛ lɔɛdɔ nɔ, sɛ tɛ ganɔ awɔ̃dzudzu mɛ nɛ Kpayɛbuieplukpa anɛ kemikpɛkpɛ lɔ mɛɛ tɛ bu mɔ kidzoenudidi.

5Kɔ Kpaya nɛ gɛ yɛa kɔ awɔ̃dzudzu anɛ kemikpɛkpɛ nɛ akɔ nɔ terikpo bhɛbhɛtɛ ɔfufɔɛ nɛ wɔnɔɛshi ansɛ gɛ nɔ lɛ Kristo Yesue de, 6sɛ tɛ nɛ idzyi anɛ onugbu torikpo mɛ tɛ nɔ danɛ Kpaya nɛ Aka kɔ bulɔ Apalete Yesu Kristo.

7Nɔ yɛkɛ aglɔ, ka, ansɛ gɛ Kristo ayɛkɛ nɔ, sɛ tɛ nɔ mɛna kabha kpɛkpɛ kɔ Kpaya. 8Alasɛ itsre nɔ sɛ Kristo eti dzi Yuɖanɛ axwɛdɛ nɛ Kpaya kɛgba nɛ nyi mɛ nu, sɛ tɛ ayɛkɔ atrɔ kɛklãgbu nɛ tɛtutrɔ nɛ gɛ abhɛtɛ kɔ bakashishe 9sɛ tɛ bagɛ ba dɛ yɛkɛaŋa nɛ ba danɛ Kpaya shu kɔ yɛ eshutukubui didi, ansɛ gɛ ba ŋlɔmɛ elu asɛ:

“Klɛso ɛba kpɛ wɔ nɛa bha anɛ bagɛ ba dɛ yɛkɛaŋa nɛ shi;

ɛba zha kabhakpɛkpɛ ɛdzɛ kɔ wɔ kinyi.”

10Ɔyɛkɔ plɛnɔ, kɛɛ ɖɔ sɛ,

“Nɔ mɔ same, O Bagɛ ba dɛ yɛkɛaŋa, plɛnɔ yɛ banɔ.”

11Klɛ tɛ ɔflɔ yɛkɔ plɛnɔ,

“Nɔ kpɛ Apalete nɛa bha, wɔnɔ Bagɛ ɔdɛ yɛkɛŋa,

tɛ nɔ zha ɛdzɛ ɔyɛkɔ kpɛ yɛ nɛabha, wɔnɔ banɔa nɛ petee.”

12Klɛ tɛ ɔflɔ yɛkɔ plɛnɔ, Yezaya aɖɔ sɛ,

“Yesse Oku obo koeyi owu,

agɛ yɛ aba lɔ pɛ aba ŋa amadi nɛa bha,

Bagɛ ba dɛ yɛkɛaŋa nɛ be di yɛ dzoenu,”

13Kɔ kidzoenu didi Kpaya nɛ eyuku nɔm nɛ same anɛ ishuyuyɔ ansɛ gɛ nɔ yɛkɛ yɛa bha ɔŋa, sɛ tɛ no bo yuku ɔgbɛgba nɛ kidzoenu didi ganɔ Ɔfufɔɛ Dzyɔgo anɛ kemi mɛ.

Paolo Kpayanɔ Kɔ Bagɛ Ba Dɛ Yɛkɛaŋa

14Madzyalɛ mɔ, mɛnahwɛ nɛ kixuim sɛ, wɔnɔ nahwɛ no yuku nɛ tɛzɛzam dzyɔgo, nɔ na nɛ kibuititim klɛ nɔ na kɔ aglɔɛdɔ kɛkasɛ. 15Ɛtɛ ŋlɔmɛ kɔnɔ wee nɛ ebui teli shu, ansɛ tɛ ɛfla baka nɔ nɛ alɛ shu, alasɛ Kpaya eshutukubui nɛ gɛ edi mɛ 16sɛ idzi Kristo Yesu kibui nɛ aɖuɖɔ kɔ bagɛ ba dɛ yɛkɛaŋa plɛnɔ kpayanɔ axwɛwa kɔ Kpaya kibui dzyɔgo nɛ tɛɖuɖɔ, sɛ tɛ bagɛ ba dɛ yɛkɛaŋa ne be dzi beyi gɛ Kpaya aba yɛkɛ, gɛ Ɔfufɔɛ Dzyɔgo nɛ ɔtrɔahwɛ.

17Klɛso ɛmɔ ishudɛdanɛ nɛ Kristo Yesu mɛ nɛ mɛ kɛxwɛwɛwa kɔ Kpaya mɛ. 18Ɛtɛ ba di sɛ ɛɛɖɔ kaɖɔ denɔ kɛdɔnyɛdɔ shu ɔyɛkɔ dɛ kɛ gɛ Kristo atɛ bhɛtɛ beke ganɔ mɛa bha anɛ bagɛ ba dɛ yɛkɛaŋa nɛ tɛgbɛgbanɔ mɛ sɛ tɛ ba tatɔ nɛ Kpaya ganɔ kɛgɛ kɛlɛ ɛɖɔ klɛ mɛ bhɛtɛ nɛm— 19ganɔ kɛdɔmumɔ anɛ ebuiyiyinɔanɔ kemi nɛa bha, ganɔ Ɔfufɔɛ nɛ kemi mɛ. So denɔ Yerusalɛm kidzo nɛa bha petee ɔvɛnɔ Ilirikumɛ, ɛtɛ bu Kristo kibuidzyɔgo nɛ ɖɔ petee. 20Nɛ kibenyɛbe mɛ ki dzi mɛ tɛpɛpɛɛ sɛ tɛ ɛɖɔ kibuidzyɔgo nɛ ɔkɛlɛ gɛ be ke ti Kristo, sɛ tɛ ɛtɛ ba zɛ bhɔtrɔ anɔbhlatɔ kesikpɛkpɛa bha. 21Kɛlɛso, ansɛ gɛ ba ŋlɔmɛ elu sɛ:

“Bagɛ ba dɛ ɖɔ yɛ bui tsrea lɛ nɛ aba mɔ,

klɛ bagɛ be ke nu nɛ be nu kɛlɛesi.”

22Kɛɛnɛ shu so pɛ nɛ ebe gelee mɛ ɛvɛe de nɛ wɔnɔ ɔbha tɛbɛba mɛ.

Paolo Tɛtutrɔ Sɛ Aba Vɛ Roma

23Pɔ nɛ ɔtsɔ̃ nɛ gɛ, ɔkɔnyɔkɔ ɔvɔma kɔm kɔ kɛxwɛwɛwa nɛ kibee nɛ mɛ, klɛ gɛ ki nu mɛ tɛpɛpɛɛ kukuuku agɔ gelee na sɛ tɛ ɛmɔ nɔ, 24ɛtrɔ sɛ tɛ ɛbhɛtɛ kɛlɛ ana onu gɛ ɛvɛ Speni. Idi kidzoenu sɛ ɛba ga wɔnɔ ɔbha onu gɛ ɛba fla klɛ sɛ tɛ ɛkɔ nɔ plɛnɔ mɛ nɛ kidzogɛga nɛa bha nɛ ɔkɛlɛ, nɛ kibe lɛm gɛ ɛmɔ same nɛ wɔnɔɛ shi bɔɛ beke. 25Ɔtsɔ̃, pɔ nɛɛ, itsri mɛ kidzoa bha vɛ Yerusalɛm kɔ kɛxwɛdɛdɛ kɔ Kpaya banɔnɛna nɛ ɔkɛlɛ. 26Alasɛ kiku Makedonia anɛ Atsyaia busɔlɛha nɛ awɔ̃ sɛ tɛ ba kɔ tɛpɛplɛnɔ betsyutsyuini nɛ gɛ akpasɛ Kpaya banɔnɛna nɛ shi nɛ Yerusalɛm. 27Kɛ za balɛ buli sɛ tɛ ba bhɛtɛ kɛlɛ, klɛ nɛ kɛgbɛagba mɛ badɔ kɛlɛɛ bhɛ nɛ balɛ shu. Alasɛ onu gɛ bagɛ be di nu Yuɖanɛ nɛ baa tɛ mɔ ɔŋakɔ nɛ Yuɖanɛ ɔfufɔɛ tɛyuyula nɛ mɛ, ki nu kɛbhɛ nɛ balɛ shu kɔ Yuɖanɛ sɛ tɛ ba mɔ ɔŋakɔ nɛ balɛ kanɔa nɛm tɛyuyula nɛm. 28Klɛso nɛ kɛlɛede gɛ ɛwa kɛxwɛ nɛ beke pɛ ɛmɔ sɛ ba tɛ yɛkɛ eyuyua nɛɛ, ɛba vɛ Speni klɛ mɛ ba ku wɔnɔ bha nɛ kidzo nɛa bha. 29Inyi sɛ onu gɛ ɛba wɔnɔ bha, ɛba ba nɛ Kristo tɛyuyula anɛ tɛnɛnam petee.

30Madzyalɛ mɔ, itsre nɔ sɛ, ganɔ bulɔ Apalete Yesu Kristo nɛ Ɔfufɔɛ nɛ anɔɖuɖɔ nɛa bha sɛ, nɔ taplɛnɔ mɛ nɛ mɛ tɛwɛwlãkɛ nɛm ganɔ Kpaya kuklum ɔkɔ mɛ. 31No klukpaya sɛ tɛ ɛmɔ tɛbubu denɔ bagɛ ba dɛ yɛkɛaŋa nɛ ahwɛ nɛ Yuɖea, sɛ tɛ mɛ kɛxwɛdɛdɛ nɛ Yerusalɛm nɛ kiku banɔnɛna nɛ awɔ̃ nɛ ɔkɛlɛ, 32sɛ tɛɛ nɛ Kpaya tɛdɛdɛmɛ nu ɛba nanɛ wɔnɔ nɛ same tɛ nɛ tɛxuxogo mɛ nɛ nɔ bu yɛkɛ kɛlɛɛ. 33Ishuyuyɔ Kpaya aza plɛnɔ wɔnɔ petee. Tɛkɛbɛlɛm.

Currently Selected:

Romanɛ 15: tcd

Highlight

Copy

Compare