Axwɛwɛwa 15

Ɔha Mɛ Beshishe Nɛ Yerusalɛm

1Banyɛ teli alɔ ede Yuɖia ede ku Antiɔkɛ klɛ la kasɛ baga yɛkɛ aŋa nɛ dɔ sɛ: “Dzaa sɛ be bhui bunyɛnyɛakɔ wɔ ansɛ gɛ Mose akasɛ nɛɛ ɔtɛ bɔ mɔ tɛyɛyɛkɛ.” 2Bunyɛnyɛ bhubhui bui nɛ ba dzi kehe gɛganɛɛ nɛ Paolo anɛ Banabasɛ kishi. So be be bu Paolo anɛ Banabasɛ, ɔyɛkɔ plɛnɔ baga yɛkɛ aŋa na sɛ ba vɛ Yerusalɛm tɛ ba da mɔ Yesu Banɔkpɛkpɛ anɛ banɔ shishe nɛ kibui nɛ shu. 3Busɔlɛɔha nɛ ɔkpɛ alɛ dzo, klɛ gɛ ba ga Foenisia anɛ Samaria aafla, ba ɖɔ kana gɛ bagɛ di nu Yuɖanɛ nɛ be tsyina ku ɔha nɛm. Kibui nɛ bhɛtɛ ɔha mɛanɛ petee la mɔ same mɔmɔ. 4Gɛ be be ku Yerusalɛm, busɔlɛɔha nɛ banɔkpɛkpɛ nɛ beshishe na yɛkɛalɛ mɔɔ mɔ. Ba ɖɔ kibuinyɛbui gɛ Kpaya abhɛtɛ aganɔ balɛa bha nɛ etsre alɛ.

5Ɔkɛlɛ bagɛ bayɛkɛaŋa nɛ teli gɛ be nu Farisianɛ ɔha mɛ elete nɛ vu alɔ klɛ la ɖɔ asɛ, “Alasɛ tɛ be bhui bunyɛnyɛ akɔ bagɛ edi nu Yuɖanɛ tɛ ba bhɛtɛ atrɔ Mose ɛshã nɛa bha.”

6Banɔkpɛkpɛ anɛ beshishe nɛ ba tsya sɛ tɛ banyɛna tɛbibisi nɛ edi. 7Nɛ ebui nyɛnyɛnadi gelee de, Petro ebe vu alɔ klɛ aɖɔ kaɖɔ akɔa lɛ asɛ: “Badzya mɔ, no nyi ɔsɛ, nɛ kibe tili gɛ ba fla nɛ mɛ Kpaya ebu anɔ teli edenɔ wɔnɔm sɛ tɛ baga dɛ nu Yuɖanɛ nɛ tsyɛ be nu edenɔ mɛ onugbu mɛ kɛgɛ kibui dzyɔgo nɛ vunɔ tɛ ba yɛkɛ aŋa. 8Kpaya, gɛ enyi idzyi mɛ, nɛ ebu akasɛ asɛ ayɛkɛ balɛ aganɔ Ɔfufɔɛ Dzyɔgo nɛ tɛyɛyɛkɔ kɔalɛ mɛ, ansɛ gɛ abhɛtɛ akɔ lɔ. 9Adɛ kpɛ ɔtɔgɛga nɛ bulɔ nɛ balɛ kishi, alasɛ eplu balɛ idzyi nɛm nɛ tɛyɛyɛkɛŋa. 10Nɛ Ɔtsɔ̃ nɛɛ, kide gɛ kɔ sɛ ɔbhɛtɛ sɛ tɛ ofeke Kpaya odi ganɔ ɔkpakasi tɛyɛyɛkɔ kpɛ badɔkpasɛ nɛ oli, gɛ bulɔ ɔdɔgɔsɛ bulɔakalɛ nɛ tsyɛ adɛ na tuku? 11Owo! Bɔyɛkɛ ŋa sɛ ganɔ Apalete Yesu eshutukubui tɛ didi mɛ klɛ lɔ mɔ tɛyɛyɛkɛkɔ, ansɛ gɛ balɛ tsyɛ amɔ.”

12Banɔɛha nɛ petee kɛ dɔ sɛɛ̃ edzi atatɔ nɛ Banabasɛ anɛ Paolo gɛ be dzi aza ɖɔa ɖɔ edenɔ Kpaya kɛdɔmumɔ nɛ gɛ bhɛtɛbi nɛ agɛ eyinɔanɔ nɛ gɛ abhɛtɛ nɛ bagɛ be di nu Yuɖanɛ nɛ kishi ganɔ balɛa bha. 13Gɛ ba bhɛtɛ beke, Yakobo ebu aɖɔ asɛ “Badzya mɔ, nɔ ta mɛ batɔ. 14Simɔn atɛ shrɔ lɔ kana gɛ Kpaya eti putɔ akasɛ kana gɛ ayɛkɔ tili nɛ bagɛ di nu Yuɖanɛ ganɔ anɔ bubu nɛ balɛm akɔa yɛnahwɛ. 15Batɔnu nɛ ebuiɖuɖɔ nɛ asɔnɔ ebuianɛ, ansɛ gɛ ba ŋulɔmɛ:

16“ ‘Nɛ kɛnɛ nɛede ɛba tsodzi ɛba

klɛ ɛba tsodzini Daviti kagba kpɛkpa nɛ idzu.

Bulɛ evukpu ɛba tsodzini ɛbhɔ,

klɛ ɛba tsodzini bulɛ idzuesi,

17sɛ tɛ banɔ gugɔɛ nɛ ba pɛɛ Apalete,

klɛ bagɛ be di nu Yuɖanɛ gɛ ba yɛkɔ mɛ kinyi,

Apalete nɛ aaɖɔ sɛ, gɛ ba bhɛtɛ ebuianɛ’

18gɛ la lɛ tɛtitim kibe gelee.

19“Kɛlɛso, ki nu mɛ kibuim bhubhui, sɛ nɔ tɛ kpɛ bagɛ be di nu Yuɖanɛ nɛ gɛ be tsodzi aaba Kpaya ɔkɔ nɛ butɔ. 20Nɛɛlɛmɛ alasɛ tɛ bu ŋlɔmɛ kɔa lɛ, tɛ bu tsre alɛ sɛ be tsuashɛ̃ nɛ kɛŋɛŋa nɛ gɛ ibuidi nɛ tɛ tutru nɛ shu, anɛ azhuzhɔlɛbui shu, denɔ baga nɛ gɛ be dzyini balɛ ili anɛ dzyosu shu. 21Alasɛ batɛ ɖɔ Mose kibui nɛ ɔmagbla kanyakam denɔ ebe tutɔpu nɛm klɛ ba kla kɛlɛ nɛ ixogokɔevu nɛm nɛ Kimuenewi kanyakɛa bha.”

Keplukpa Gɛ Ba Ŋlɔmɛ Kɔ Bagɛ Edi Nu Yuɖanɛ

22Ɔkɛlɛ Yesu Banɔkpɛkpɛ nɛ beshishe, busɔlɛ nɛ petee, ba trɔ sɛ be be bu balɛ nahwɛ mɛ banɔ tɛ ba sɛsɛ alɛ nɛ Antiɔkɛ ɔyɛkɔ plɛnɔ Paolo nɛ Banabasɛ. Be bu Yuɖas (gɛ be klua sɛ Basabbasɛ) nɛ Silasɛ, gɛ be dzi bagbɛgbanɔ nɛ ɔha nɛ shi. 23Ɔyɛkɔ plɛnɔa lɛ ba sɛsɛ keplukpa sɛ:

Bulɔ, banɔkpɛkpɛ anɛ beshishe nɛ, anɛ wɔnɔa dzyalɛ nɛ ɔkɔ, bu sɛnɛ nɔ bulɔ badzya nɛ petee gɛ be di nu Yuɖanɛ gɛ ba lɛ Antiɔkɛ, Siria anɛ Silisia. 24Bunu sɛ banɔ teli be koeyi nɛ bulɔ mɛ nɛ bulɔ kidzo makɔ makɔa lɛm klɛ ba kpɛ wɔnɔ bunuhu, ba kpɛ wɔnɔ atɔkpum bunuhu nɛ balɛ ebui nɛ gɛ ba ɖɔ. 25Klɛso nɛɛ bulɔ petee ba dɛmɛ sɛ bua bu banɔ teli tɛ bu yɛkɔ sɛsɛ nɔ plɛnɔ blɔ ɛbhɛa dzyɔgo gɛnu Banabasɛ anɛ Paolo, 26banɔ gɛ ba yɛkɔ balɛ ɛkpã ne tsye nɛ bulɔ Apalete Yesu Kristo kinyi nɛ kɛtɔkpu. 27Klɛso nɛɛ bɔ sɛsɛ Yuɖasɛ anɛ Silasɛ tɛɛ ganɔ onugbu kaɖɔ ɖuɖɔ mɛ tɛ ba trɔ kɛklãgbu nɛ kibui nɛ gɛ bɔ ŋlɔmɛ kɔnɔ nɛa bha. 28Edzi ansɛ kɛbɔ kɔ Ɔfufɔɛ Dzyɔgo anɛ kɔ bulɔ sɛ tɛ bu tɛ trɔ wɔnɔa bha nɛ kibuinyɛbui ɔkɔ dɛ ebui bibisia nɛ: 29Alasɛ tɛ nɔ shɛnɔ ahwɛ nɛ kɛŋɛŋa nɛ gɛ ba yɛkɔ akɔ ibuidi nɛ shu, dzyosu, anɛ baga nɛ gɛ be dzyini balɛ ili nɛ kɛdzya, anɛ aglɔbui bhɛbhɛtɛ shu. Nɔ bɔ bhɛtɛ mɔ sɛ tɛ nɔ shɛnahwɛ ebuianɛ shu.

Tɛ nɔ za mɔ.

30Ba kpɛ banɔ nɛ asɛsɛ klɛ ba vɛ ede zhieku Antiɔkɛ, ɔklɛ bede xogo busɔlɛha klɛ ba yɛkɔ keplukpa ŋuŋlɔmɛ nɛ akpɛ ahwɛ kɔa lɛ. 31Banɔ na kla keplukpa klɛ bamɔ same nɛ kemi nɛ gɛ kalɛm kibui nɛ kpɛa lɛ nɛ shu. 32Yuɖasɛ anɛ Silasɛ gɛ balɛ nahwɛ ne nu batɔnu so nɛɛ, baɖɔ kaɖɔ gelee ayɛkɔ akpɛ badzya nɛ kite anɛ bugɛganɛ nɔ. 33Nɛ ɔkɛlɛ tɛzɛza bɔɛ ede nɛɛ, ɔha mɛɛanɛ na kpɛa lɛ dzo nɛ ishuyuyɔ tɛyuyula sɛ tɛ be tsodzi aba bagɛ ba kpaa lɛ nɛ ɔbha. 34Pɔ Silas yɛa ba trɔ sɛ tɛ aza ɔkɛlɛ. 35Pɔ Paolo anɛ Banabasɛ ba wɔ Antiɔkɛ, ɔkɛlɛ balɛ nɛ banɔ gelee gugɔɛ na kasɛ kɛdɔ klɛ ba ɖɔ Apalete nɛ kibui.

Paolo Anɛ Banabas Onugbu Torukpom Mazamaza

36Nɛ kibe gɔgɔɛ tili mɛ Paolo etsre Banabasɛ asɛ, “Kɔ lɔ tsodzi da ga ɔhamɛ anɔ nɛa bha nɛ ɛma nɛ petee mɛ gɛ bu da ɖɔ Apalete nɛ bui tɛ bu di sɛ pɔ klɛ la bhɛtɛ nɛ kibui nɛ dza.” 37Banabasɛ apɛɛ sɛ tɛ agbanɔ Yohanɛsɛ gɛ beke klua sɛ Marko ataa lɛ shu, 38pɔ Paolo yɛ adɛ mɔɛ lɛ sɛ kɛbɔa na, alasɛ ebe tsodzi nɛ balɛe de nɛ Pamfilia klɛ ada ba vɛ kɛxwɛ nɛa bha aplɛnɔa lɛ. 39Ɔtɔgɛga ŋaŋã toli obo ku balɛ kishi klɛ ba ba pɔ aglɔɛm. Banabasɛ aba gbanɔ Marko klɛ ba za kenia bha avɛ Siprɔsɛ, 40pɔ nɛɛ Paolo aba gbanɔ Silasɛ klɛ ba shɛ, ɔha mɛɛanɛ na aɖɔ kaɖɔ dzyɔgo nɛ Paolo anɛ Silasɛ shu akpɛ Apalete nɛ ɛyamyuyɔm. 41Aga Siria anɛ Silisia ekoeyi, klɛ akpɛ busɔlɛha nɛ bugɛganɛ.

Currently Selected:

Axwɛwɛwa 15: tcd

Highlight

Copy