Jẹnẹsisi 9
9
Isi Nke Itenẹi
Nkwa Osolobuẹ Kwe Nụa
1Osolobuẹ nọ gọzi Nụa lẹ ụmụ a, sị wẹ, “Mụ nị ụmụ; ba nị ụba; jun ni ụwa. 2Egun ụnụ k'a rị a tụ anụ ile, a tụ wẹ ọda-ọda, kẹ anụ ile a kpa alị kẹ nnụnụ ile e fe elu kẹ ihiẹn ile a rịhunmẹ akpakalị kẹ azụn ile rị imẹ ohimin; m rị e bu wẹ ile e che okpuru ụnụ. 3Ihiẹn ọwụlẹ a ghahunmẹni lẹ ihiẹn ọwụlẹ rị ndụn k'a wụrụ ihiẹn-oriri ụnụ: kẹ m dọn ye ụnụ ihiẹn ile e pu alị hụn e nwun ẹhụhụọ-oyiyi ẹhụhụọ-oyiyi, e ri, ẹrịra kẹ m dọn nwan ye ụnụ ihiẹn ile nị ụnụ e ri.
Kẹ Ndụn Rịhan Mkpa
4“Kanị, erikwọlẹ ni anụ lẹ ẹdeke ẹ hụn wụ ndụn a.
5“Onyẹ gbu ịhịan, m k'a jụ a ukwere ẹdeke; anụ gbu ịhịan, m k'a jụ a ukwere ẹ; ịhịan gbu ịhịan, m k'a jụ a ukwere ẹ; onyẹ ọwụlẹ gbu ibe ẹ, m k'a jụ a ukwere ẹ. 6Onyẹ gbu ịhịan, ịhịan k'e gbu ẹ, makẹni Osolobuẹ ke ịhịan n'o yi Osolobuẹ lẹ enwẹn ẹ.
7Ụnụ nwẹn, mụba nị, mụba nị ọhụnma-ọhụnma elu-ụwa.”
8Chuku nọ sị Nụa lẹ ụmụ a ya lẹ wẹ rị, 9“M rị e kwe nkwa k'a rị ẹgbata mmẹ lẹ ụnụ lẹ ụmụ ụnụ lalanị 10lẹ ihiẹn ile rị ndụn ụnụ lẹ wẹ rị, kẹ nnụnụ kẹ anụ-ụlọ kẹ anụ-ọfịa ile; anụ ile gha imẹ ụgbọ hụ pụha lẹ anụ ile jẹnkọ d'a rị imẹ ụwa — 11ẹghẹẹ, m rị nwan e kwe ụnụ nkwa nị onwọnkọzị ogẹn okẹn-mirin e gi gbuchanrịn ihiẹn ile rị ndụn, onwọnzikwọnị ogẹn okẹn-mirin e gi tikpọ ụwanị.”
12Osolobuẹ nọ sị, “Ọnwan wụ ahịma nkwa m rị e kwe ụnụ lẹ ihiẹn ile rị ndụn hụn ụnụ lẹ ịya rị — nkwa hụn k'a rịsọnmẹni agbọ ile lalanị: 13e bugụọ m ekọn-lẹ-ogugu m che imẹ orukpu. Ịya k'a wụrụ ahịma nkwa m kwe hụn rị ẹgbata mmẹ lẹ elu-ụwa. 14Ya wụ, ogẹn ọwụlẹ m gi mẹ mirin rumẹ elu-ụwa, nị ekọn-lẹ-ogugu a pụha, 15a nyanhan m nkwa m kwe yụ lẹ ihiẹn ile rị ndụn. Onwọnkọzị ogẹn mirin e gi họnrin okẹn-mirin, tikpọ ihiẹn ile rị ndụn. 16Ekọn-lẹ-ogugu pụha imẹ orukpu, m k'e legha a, gi ẹ nyanhan nkwa itẹbitẹ Chuku kwe ihiẹn ile rị ndụn rị elu-ụwa.” 17Chuku nọ sị Nụa, “Ịya wụ ahịma nkwa m kwe ihiẹn ile rị ndụn rị elu-ụwa.”
Nụa Lẹ Ebọn Ẹ
18Ụmụ Nụa hụn gha imẹ ụgbọ ahụn pụ-ichẹn pụha wụ Shẹm lẹ Ham lẹ Jafẹtị. Ham wụ nẹdi ndị Kenaanị. 19Wẹ ẹtọ wụ ụmụ Nụa; ndị ile rị ichẹn-ichẹn rị elu-ụwa gha ẹhụ wẹ pụha. 20Nụa wụ onyẹ ugbo. Ọ nọ rụn alị vaịnị. Ịya bu ụzọ rụnma alị vaịnị.
21Omẹgụ, Nụa nọ ra manya vaịnị ahụn, ra a, ọ tụma a. Ọ nọ gbarị ọtọ dinẹ alị imẹ ụlọ iwe ẹ. 22Ya kẹ Ham hụn wụ nẹdi ndị Kenaanị nọ hụn ọtọ nẹdi ẹ. Ọ nọ jẹnmẹ d'a gwa umunẹ ẹ ẹbụọ ebe wẹ rị ihun-ezi. 23Ya kẹ Shẹm lẹ Jafẹtị nọ kịrị ẹkwa, wẹ ẹbụọ nọ kọn ẹ ye isi-uvun wẹ, gi azụụn-azụụn jẹn d'e kpumẹ nẹdi wẹ ọtọ; wẹ bupụ ihun wẹ, ahụnnị wẹ ọtọ nẹdi wẹ.
24Ogẹn manya gi nwan fọngụ Nụa ẹnya, ogẹn o gi marịn ihiẹn nwa mbi ẹ mẹ ẹ, 25ọ nọ sị,
“M rị a bụ Kenaanị ọnụ:
igbọn kachanrịn igbọn a wụ
k'o k'a wụ ẹka umunẹ ẹ.”
26Nụa nọzị sị,
“Ịja-mma ya rịnị Osolobuẹ, Chuku Shẹm!
Kenaanị ya wụrụ igbọn Shẹm.
27Chuku ya mẹ Jafẹtị gha ihun;
Jafẹtị ya sọn Shẹm ri ihiẹn ẹ.
Kenaanị ya wụrụ igbọn Jafẹtị.”
28Mgbe okẹn-mirin ahụn gi bigụ, Nụa nọzị tọ ahụa iri kwasị ọgụn-mmẹsa. 29Ya wụ, ahụa iri kwasị ọgụn-ẹsa kwasị nnụnaị (950) kẹ Nụa tọ.
Currently Selected:
Jẹnẹsisi 9: ikkBI
Highlight
Share
Copy
Want to have your highlights saved across all your devices? Sign up or sign in
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.
Videos for Jẹnẹsisi 9
Episode 36:Are We Near the End? The Bible’s Hidden Pattern
Under The Hood
EP 25. Why Do So Many Cultures Have Flood Myths? The Truth Behind the Stories
Under The Hood
Ep 34. Genesis 10: How Noah’s Sons Shaped the World & God's Redemption Story
The Bible Show
Episode 19: Feeding of Four thousand with the Syrophonecian woman
The Bible Show