तीतस 3
3
ख्रीष्टियन चालचलन
1सरकार ओ सरकारी मनैन्हक अधीनम रहपर्ठा, कहल मानपर्ठा, ओ हरेक असल काम करक लाग तयार रहपर्ठा कैक विश्वासीहुँकन सम्झाओ। 2केक्रो बदनाम नैकरपरट्, किहुसे झग्रा नैकरपरट्, तर सबजहनसे मिलनसार ओ नम्र व्यवहार करपर्ठा कैक हुँकन कहो।
3काकरकि हम्र अपन्हे फे एक समयम मूर्ख ओ कहल नैमन्ना रलही। हम्र भूलम परलरलही, ओ कामवासनम ओ सुखविलासम फँसल रलही। हमार जीवन दुष्टता ओ बिह्र मुनाले भरल रह। मनै हमन हेल्हा करँट्, ओ हम्र फे हुँकन हेल्हा करी।
4तर जब हमन मुक्ति देहुइया परमेश्वरक दया ओ प्रेम प्रकट हुइल्, 5तब उहाँ हमन मुक्ति देल। यी मुक्ति हम्र धार्मिक काम कर्लक कारण नाहीँ, तर हमन दया कर्लक कारण मुक्ति देलह। उहाँ पवित्र आत्माद्वारा हमार पाप धोक हमन लौव जन्म ओ लौव जीवन देल। 6उहाँ यी आत्मा हमन मुक्ति देहुइया येशू ख्रीष्टसे हमारम प्रशस्तसे खन्ह्यादेल। 7असिक उहाँक अनुग्रहले हम्र धर्मी ठह्राजाइसेकी ओ हमार आशा करल अनन्त जीवनक हकदार हुइसेकी। 8यी जाट्टिक बात हो। परमेश्वरम विश्वास करुइयन ध्यान देक असल कामम लग्लरह्हीँ कैक टुँ यिह शिक्षम जोड देओ कना म्वार इच्छा बा। यी शिक्षा सबजन्हक लाग असल ओ फाइदाजनक बा।
9तर ठरनाठेगानक बातम, वंशावलीक बातम, ओ यहूदी व्यवस्थक बारेम नैहुइल् वादविवाद कैक झग्रा परैना बातसे दूर रहो। ओसिन कामनाकाजक बेकार बात बट्वाक 10मण्डली फुटाइ खोज्ना मनैन एक दुइचो चेताउनी देओ। यदि नैमनहीँ कलसे, हुँकन्हक कुछु मतलब जिन करहो। 11ओसिन मनैन्हक आचरण भ्रष्ट रठन कना बात टुँ जन्लबाटो। हुँकन्हक आपनऽ पाप हुँकन दोषी ठह्रैठन।
आखिरी सल्लाह ओ अभिवादन
12मै अर्तिमासह या तुखिकसह टुँहारठे पठैना विचार कर्टिबाटुँ। हुँक्रमध्ये एक जन टुँहारठे पुगहीँ त, टुँ स्याकलसम झट्ट निकोपोलिस सहरम म्वारठे अइहो, काकरकि मै यी साल जार दिन उहँ रना विचार कैरख्नु।#प्रे २०:४; एफि ६:२१-२२; कल ४:७-८; २ तिमो ४:१२ 13जेनास नाउँक वकील ओ अपोल्लोस यात्रम जाइ लगहीँ त स्याकलसम हुँकन सहयोग करहो। हुँकन आवश्यक पर्ना सब चिज जुटादेहो।#प्रे १८:२४; १ कोर १६:१२ 14हमार मनै कुछु चिजिक धेर आवश्यक परल समयम सहायता देह सेकहीँ कैक असल कामम लग्लरहपर्ठा। हुँक्र बिना कामक जीवन जिय नैपरट्।
15यिहाँ म्वारसँग रहुइयन सबजन टुँहीन अभिवादन पठारख्ल। हमन प्रेम कर्ना उहाँ रहल विश्वासीन हमार अभिवादन कैदेहो।
परमेश्वर टुह्र सबजहन अनुग्रह देहीँ कना म्वार प्रार्थना बा।
Currently Selected:
तीतस 3: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
