रोमी 11
11
इस्राएलक पाप ओ परमेश्वरक दया
1ओसिन हो कलसे का परमेश्वर इस्राएलीहुँकन छोरदेल त? नाही! मै फे त अब्राहामक वंशम जन्मल् बेन्यामीनक घरानक इस्राएली हुइटुँ।#फिलि ३:५ 2परमेश्वर सुरुहसे चिन्हल आपन मनैन नैछोर्लहुइट। धर्मशास्त्रम एलिया अगमवक्तक बारेम बट्वाइल बात त टुँहन थाहँ बा। इस्राएलीन्हक विरोधम एलिया परमेश्वरसे असिक कैरख्लह, 3“प्रभु, हिँक्र अप्नक अगमवक्तन मुवैल ओ बलि चह्रैना अप्नक वेदी भस्कादेल, मै केल बाँचल बाटुँ ओ महीह फे हुँक्र मुवाइ ख्वाजट।”#१ राज १९:१०-१४ 4परमेश्वर हुँकहीन कल, “मै आपन लाग सात हजार मनैन ढर्लबाटुँ, हुँक्र बाल दिउँतह ढ्वागक् लाग आपन ठिहुन नैटेक्लहुइट।”#१ राज १९:१८ 5असहँक आब फे इस्राएलीहुँक्रमध्ये विश्वास कर्ना बाँकी रहल डान्चे मनै बाट, हुँकन परमेश्वर आपन अनुग्रहले रोजरख्ल। 6यी बात परमेश्वरक अनुग्रहले हुइलक हो, धर्मकर्मले नाही, नकि त परमेश्वरक अनुग्रह त अनुग्रह जो नैरनेरह।
7ओसिन हो कलसे याकर अर्थ का हो त? सब इस्राएलीहुँक्र आपन ख्वाजल बात नैपैलसे फे परमेश्वरक र्वाजल डान्चे इस्राएलीहुँक्र पैल। और इस्राएलीहुँक्र कठोर होक पलरल। 8धर्मशास्त्रम फे लिखल बा,
“परमेश्वर हुँकन चेतनाहीन आत्मा देरख्ल।
हुँकन असिन आँख ओ कान देरख्लन कि
हुँक्र देख्ना फे नैदेख्ट, सुन्ना फे नैसुन्ट
ओ आजसम फे हुँक्र अस्तह दशम पलबाट।”#व्य २९:४; यशै २९:१०
9असहँक दाऊद राजा फे कठ,
“हुँकन्हक भ्वाजभत्यार हुँकन्हक्के लाग
पासा ओ धराप बनस,
हुँकन्हक पतन ओ दण्डक कारण बनस।
10हुँक्र नेदेखहीँ कैक हुँकन्हक आँखह अन्धकारले छ्वापस
ओ हुँकन्हक कुब्बर नैसोझ्रनागरी कुप्रो परलरहस।”#भज ६९:२२-२३
कलमी करल हङ्ग्या
11उहओर्से मै कहटुँ, का हुँक्र ठ्यास लाग्क नाश हुइनागरी गिर्लक हुइट त? अहँ नैहुइट! असिक हुँक्र अविश्वासले गिरबेर और जातिक मनै मुक्ति पैलकम इस्राएलीहुँक्र यी देख्क अप्न फे मुक्ति पाइक लाग डाहा करँट् कना परमेश्वरक इच्छा रलहन। 12आब यदि इस्राएलीहुँन्हक अविश्वासमसे जो संसारक आशिष्, ओ हुँकन्हक पतन जो और जातिक मनैन्हक आशिष् हुइल् कलसे, हुँक्रमध्ये रोजगैल् सबजन विश्वास कर्ना हो कलसे झन् कसिन आशिषमय हुई!
13टुह्र और जातिक मनैन कहटुँ। मै और जातिक मनैन प्रचार करक लाग ख्रीष्टक प्रेरितक रूपम रोजगैल् मनैया हुइटुँ। मै यी कामह विशेष महत्व देठुँ। 14हुइसेक्ठा, यी कामले म्वार आपन जातिक मनै फे टुँहन देख्क डाहा लाग्क कौनो-कौनो मनै परमेश्वरकओर घुम्जैठ कि? 15काकरकि परमेश्वर हुँकन छोर्ल त, संसार ओ परमेश्वरक मेलमिलाप हुइल् कलसे, हुँकन आपन बनैलसे झन् कत्रा असल हुई! यी त मुवलमसे जीवन पैना बात हुइनेबा! 16सानल पीठमसे परमेश्वरह चह्राइल “पहिल भाग” पवित्र बा कलसे, सानल पीठक सक्कु भाग पवित्र हुइठा। असहँक रूख्वक जर पवित्र बा कलसे, रूख्वक हङ्ग्या फे पवित्र रठा।
17रूख्वक काम नैलग्ना हङ्गेह काट्क फाँकअस परमेश्वर कत्रा यहूदीहुँकन आपन सम्बन्धमसे काट्देल, ओ टुह्र और जातिक मनै जङ्गली जैतूनक हङ्ग्याअस रलसे फे असल जैतूनक रूख्वम कलमी कैगिलो। ओ उह असल ब्वाँटीमसे टुह्र शक्ति ओ जीवनक रस पैठो। 18उहओर्से टुह्र उ काट्गैल् हङ्ग्याअस इस्राएलीहुँकन घृणा नैकरपरट् ओ हुँकनसे अपन्हेह असल जिन सम्झो, काकरकि टुह्र हङ्ग्या केल हुइटो, टुह्र जरह नैठम्ह्लहुइटो तर जर पो टुँहन ठम्ह्लबा। 19टुह्र कहठुइबो, “मै कलमी बाहान्जाइसेकुँ कैक हङ्ग्या काटगैल्रह।” 20यी सत्य हो। तर हुँकन्हक अविश्वासले करबेर जो हुँक्र हङ्ग्याअसक काट्गैलक हुइट, ओ टुह्रजुन विश्वास कर्लकओर्से कलमीम जोरगैलो। यी बातम घमण्ड जिन करो, बेनसे होसियार होओ। 21परमेश्वर आपन मूल हङ्गेह त नैछोर्ल कलसे, टुँहन फे छोरुइया नैहुइट।
22उहओर्से परमेश्वरक दया ओ कठोरता, दुनु बातम ध्यान देओ। उहाँ विश्वास नैकर्ना मनैन्हक लाग कठोर बाट, तर टुह्र उहाँक दयम शरण लेलरबो कलसे उहाँ टुँहन दया देखैनेबाट। नकि त टुह्र फे काटगैल् हङ्ग्याअस फाँक्जैनेबाटो। 23असहेँक यदि इस्राएलीहुँक्र अविश्वास छोर्क विश्वास करहीँ कलसे पहिल रहल ठाउँम हङ्ग्याअस फेदोस्र जोरजैनेबाट। काकरकि परमेश्वर फेदोस्र हुँकन ज्वारसेक्ठ। 24टुह्र और जातिक मनै जङ्गली जैतूनक रूख्वमसे काट्क ल्यानलअस बाटो। टुह्र प्राकृतिक हिसाबले नैमिल्ना रलसे फे बारीम लगाइल जैतूनक रूख्वम जोरगैल्बाटो। इस्राएलीहुँक्र बारीम लगाइल जैतूनक हङ्ग्याअस हुइट। असिन हुइलकओर्से हुँकन फेदोस्र आन्क जोर्ना परमेश्वरक लाग झन् सजिलो हुहीन।
सारा इस्राएलक मुक्ति
25दादुभैयहुँक्र, आब प्रकट कैगिल् सत्य बात टुह्र जन्लरहो कना मै चाहटुँ। उ बात टुँहन थाहाँ हुइ कलसे टुह्र घमण्ड कैक अपन्हेह बुद्धिमान नैसम्झनेहुइटो। यी बात का हो कलसे, आइपर्ना जत्रा और जातिक मनै ख्रीष्टम नैआइट्सम इस्राएलक अधिकांश मनै कठोर हुइनेबाट। 26तबदोस्र सारा इस्राएल मुक्ति पैनेबा। धर्मशास्त्रम लिखल बा,
“मुक्ति देहुइया सियोनसे#११:२६ सियोन कलक यरूशलेमक और नाउँ हो। अउइयाबाट,
ओ याकूबक वंशह नैमजा काममसे घुमैनेबाट।”#यशै ५९:२०
27“हुँकन्हक पाप मेटाक मै हुँकन्हकसँग
बान्धल बाचा पूरा कर्नेबाटुँ।”#यर ३१:३३-३४
28खुशीक खबरम विश्वास नैकर्लक कारण इस्राएलीहुँक्र परमेश्वरक शत्रु हुइल। यी त टुन्हक लाग फाइदक बात हो। तर परमेश्वर अपन्हे हुँकन रोज्लक कारणले ओ हुँकन्हक पुर्खन्हक कारणले, हुँक्र परमेश्वरक प्रिय हुइल। 29काकरकि परमेश्वर आपन देहल दान फिर्ता नैलेट ओ बलास्याकल मनैन नैछोर्ट। 30पैल्ह टुह्र और जातिक मनै परमेश्वरक आज्ञापालन नैकरो, तर आब इस्राएलीहुँक्र आज्ञापालन नैकर्लकओर्से परमेश्वरक दया टुह्र पैलक हुइटो। 31आज अटेर रना इस्राएलीहुँक्र फे एक दिन दया पैहीँ कैक परमेश्वर टुँहन दया देखैल। 32सब मनै दया पैहीँ कैक परमेश्वर सब मनैन हुँकन्हक अटेरीपनम बन्द कैदेल।
परमेश्वरक प्रशंसा
33आहा! परमेश्वरक धन कत्रा धेर,
उहाँक ज्ञान, बुद्धि कत्रा गहिँर बाटन।
उहाँक निर्णयक गहिराइ के बयान करसेक्ठा?
उहाँक काम कर्ना तरिका के पत्ता लगाइसेक्ठा?#यशै ५५:८
34“काकरकि प्रभुक मनह के जानराखल जे?
या उहाँक सल्लाहकार के होरहल जे?”#यशै ४०:१३
35“या कौनोजन उहाँह कुछु देराखल का,
ओ परमेश्वर ओहीह फिर्ता देह परहीन्?”#अयू ४१:११
36काकरकि सब चिज उहाँक सृष्टि हो,
सब चिजह उहाँ जोगैठ,
सब चिज उहाँकऽ लाग बनागैल् हो।
उहाँक महिमा सड्डभर हुइटीरह।#१ कोर ८:६ आमेन।
Currently Selected:
रोमी 11: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
रोमी 11
11
इस्राएलक पाप ओ परमेश्वरक दया
1ओसिन हो कलसे का परमेश्वर इस्राएलीहुँकन छोरदेल त? नाही! मै फे त अब्राहामक वंशम जन्मल् बेन्यामीनक घरानक इस्राएली हुइटुँ।#फिलि ३:५ 2परमेश्वर सुरुहसे चिन्हल आपन मनैन नैछोर्लहुइट। धर्मशास्त्रम एलिया अगमवक्तक बारेम बट्वाइल बात त टुँहन थाहँ बा। इस्राएलीन्हक विरोधम एलिया परमेश्वरसे असिक कैरख्लह, 3“प्रभु, हिँक्र अप्नक अगमवक्तन मुवैल ओ बलि चह्रैना अप्नक वेदी भस्कादेल, मै केल बाँचल बाटुँ ओ महीह फे हुँक्र मुवाइ ख्वाजट।”#१ राज १९:१०-१४ 4परमेश्वर हुँकहीन कल, “मै आपन लाग सात हजार मनैन ढर्लबाटुँ, हुँक्र बाल दिउँतह ढ्वागक् लाग आपन ठिहुन नैटेक्लहुइट।”#१ राज १९:१८ 5असहँक आब फे इस्राएलीहुँक्रमध्ये विश्वास कर्ना बाँकी रहल डान्चे मनै बाट, हुँकन परमेश्वर आपन अनुग्रहले रोजरख्ल। 6यी बात परमेश्वरक अनुग्रहले हुइलक हो, धर्मकर्मले नाही, नकि त परमेश्वरक अनुग्रह त अनुग्रह जो नैरनेरह।
7ओसिन हो कलसे याकर अर्थ का हो त? सब इस्राएलीहुँक्र आपन ख्वाजल बात नैपैलसे फे परमेश्वरक र्वाजल डान्चे इस्राएलीहुँक्र पैल। और इस्राएलीहुँक्र कठोर होक पलरल। 8धर्मशास्त्रम फे लिखल बा,
“परमेश्वर हुँकन चेतनाहीन आत्मा देरख्ल।
हुँकन असिन आँख ओ कान देरख्लन कि
हुँक्र देख्ना फे नैदेख्ट, सुन्ना फे नैसुन्ट
ओ आजसम फे हुँक्र अस्तह दशम पलबाट।”#व्य २९:४; यशै २९:१०
9असहँक दाऊद राजा फे कठ,
“हुँकन्हक भ्वाजभत्यार हुँकन्हक्के लाग
पासा ओ धराप बनस,
हुँकन्हक पतन ओ दण्डक कारण बनस।
10हुँक्र नेदेखहीँ कैक हुँकन्हक आँखह अन्धकारले छ्वापस
ओ हुँकन्हक कुब्बर नैसोझ्रनागरी कुप्रो परलरहस।”#भज ६९:२२-२३
कलमी करल हङ्ग्या
11उहओर्से मै कहटुँ, का हुँक्र ठ्यास लाग्क नाश हुइनागरी गिर्लक हुइट त? अहँ नैहुइट! असिक हुँक्र अविश्वासले गिरबेर और जातिक मनै मुक्ति पैलकम इस्राएलीहुँक्र यी देख्क अप्न फे मुक्ति पाइक लाग डाहा करँट् कना परमेश्वरक इच्छा रलहन। 12आब यदि इस्राएलीहुँन्हक अविश्वासमसे जो संसारक आशिष्, ओ हुँकन्हक पतन जो और जातिक मनैन्हक आशिष् हुइल् कलसे, हुँक्रमध्ये रोजगैल् सबजन विश्वास कर्ना हो कलसे झन् कसिन आशिषमय हुई!
13टुह्र और जातिक मनैन कहटुँ। मै और जातिक मनैन प्रचार करक लाग ख्रीष्टक प्रेरितक रूपम रोजगैल् मनैया हुइटुँ। मै यी कामह विशेष महत्व देठुँ। 14हुइसेक्ठा, यी कामले म्वार आपन जातिक मनै फे टुँहन देख्क डाहा लाग्क कौनो-कौनो मनै परमेश्वरकओर घुम्जैठ कि? 15काकरकि परमेश्वर हुँकन छोर्ल त, संसार ओ परमेश्वरक मेलमिलाप हुइल् कलसे, हुँकन आपन बनैलसे झन् कत्रा असल हुई! यी त मुवलमसे जीवन पैना बात हुइनेबा! 16सानल पीठमसे परमेश्वरह चह्राइल “पहिल भाग” पवित्र बा कलसे, सानल पीठक सक्कु भाग पवित्र हुइठा। असहँक रूख्वक जर पवित्र बा कलसे, रूख्वक हङ्ग्या फे पवित्र रठा।
17रूख्वक काम नैलग्ना हङ्गेह काट्क फाँकअस परमेश्वर कत्रा यहूदीहुँकन आपन सम्बन्धमसे काट्देल, ओ टुह्र और जातिक मनै जङ्गली जैतूनक हङ्ग्याअस रलसे फे असल जैतूनक रूख्वम कलमी कैगिलो। ओ उह असल ब्वाँटीमसे टुह्र शक्ति ओ जीवनक रस पैठो। 18उहओर्से टुह्र उ काट्गैल् हङ्ग्याअस इस्राएलीहुँकन घृणा नैकरपरट् ओ हुँकनसे अपन्हेह असल जिन सम्झो, काकरकि टुह्र हङ्ग्या केल हुइटो, टुह्र जरह नैठम्ह्लहुइटो तर जर पो टुँहन ठम्ह्लबा। 19टुह्र कहठुइबो, “मै कलमी बाहान्जाइसेकुँ कैक हङ्ग्या काटगैल्रह।” 20यी सत्य हो। तर हुँकन्हक अविश्वासले करबेर जो हुँक्र हङ्ग्याअसक काट्गैलक हुइट, ओ टुह्रजुन विश्वास कर्लकओर्से कलमीम जोरगैलो। यी बातम घमण्ड जिन करो, बेनसे होसियार होओ। 21परमेश्वर आपन मूल हङ्गेह त नैछोर्ल कलसे, टुँहन फे छोरुइया नैहुइट।
22उहओर्से परमेश्वरक दया ओ कठोरता, दुनु बातम ध्यान देओ। उहाँ विश्वास नैकर्ना मनैन्हक लाग कठोर बाट, तर टुह्र उहाँक दयम शरण लेलरबो कलसे उहाँ टुँहन दया देखैनेबाट। नकि त टुह्र फे काटगैल् हङ्ग्याअस फाँक्जैनेबाटो। 23असहेँक यदि इस्राएलीहुँक्र अविश्वास छोर्क विश्वास करहीँ कलसे पहिल रहल ठाउँम हङ्ग्याअस फेदोस्र जोरजैनेबाट। काकरकि परमेश्वर फेदोस्र हुँकन ज्वारसेक्ठ। 24टुह्र और जातिक मनै जङ्गली जैतूनक रूख्वमसे काट्क ल्यानलअस बाटो। टुह्र प्राकृतिक हिसाबले नैमिल्ना रलसे फे बारीम लगाइल जैतूनक रूख्वम जोरगैल्बाटो। इस्राएलीहुँक्र बारीम लगाइल जैतूनक हङ्ग्याअस हुइट। असिन हुइलकओर्से हुँकन फेदोस्र आन्क जोर्ना परमेश्वरक लाग झन् सजिलो हुहीन।
सारा इस्राएलक मुक्ति
25दादुभैयहुँक्र, आब प्रकट कैगिल् सत्य बात टुह्र जन्लरहो कना मै चाहटुँ। उ बात टुँहन थाहाँ हुइ कलसे टुह्र घमण्ड कैक अपन्हेह बुद्धिमान नैसम्झनेहुइटो। यी बात का हो कलसे, आइपर्ना जत्रा और जातिक मनै ख्रीष्टम नैआइट्सम इस्राएलक अधिकांश मनै कठोर हुइनेबाट। 26तबदोस्र सारा इस्राएल मुक्ति पैनेबा। धर्मशास्त्रम लिखल बा,
“मुक्ति देहुइया सियोनसे#११:२६ सियोन कलक यरूशलेमक और नाउँ हो। अउइयाबाट,
ओ याकूबक वंशह नैमजा काममसे घुमैनेबाट।”#यशै ५९:२०
27“हुँकन्हक पाप मेटाक मै हुँकन्हकसँग
बान्धल बाचा पूरा कर्नेबाटुँ।”#यर ३१:३३-३४
28खुशीक खबरम विश्वास नैकर्लक कारण इस्राएलीहुँक्र परमेश्वरक शत्रु हुइल। यी त टुन्हक लाग फाइदक बात हो। तर परमेश्वर अपन्हे हुँकन रोज्लक कारणले ओ हुँकन्हक पुर्खन्हक कारणले, हुँक्र परमेश्वरक प्रिय हुइल। 29काकरकि परमेश्वर आपन देहल दान फिर्ता नैलेट ओ बलास्याकल मनैन नैछोर्ट। 30पैल्ह टुह्र और जातिक मनै परमेश्वरक आज्ञापालन नैकरो, तर आब इस्राएलीहुँक्र आज्ञापालन नैकर्लकओर्से परमेश्वरक दया टुह्र पैलक हुइटो। 31आज अटेर रना इस्राएलीहुँक्र फे एक दिन दया पैहीँ कैक परमेश्वर टुँहन दया देखैल। 32सब मनै दया पैहीँ कैक परमेश्वर सब मनैन हुँकन्हक अटेरीपनम बन्द कैदेल।
परमेश्वरक प्रशंसा
33आहा! परमेश्वरक धन कत्रा धेर,
उहाँक ज्ञान, बुद्धि कत्रा गहिँर बाटन।
उहाँक निर्णयक गहिराइ के बयान करसेक्ठा?
उहाँक काम कर्ना तरिका के पत्ता लगाइसेक्ठा?#यशै ५५:८
34“काकरकि प्रभुक मनह के जानराखल जे?
या उहाँक सल्लाहकार के होरहल जे?”#यशै ४०:१३
35“या कौनोजन उहाँह कुछु देराखल का,
ओ परमेश्वर ओहीह फिर्ता देह परहीन्?”#अयू ४१:११
36काकरकि सब चिज उहाँक सृष्टि हो,
सब चिजह उहाँ जोगैठ,
सब चिज उहाँकऽ लाग बनागैल् हो।
उहाँक महिमा सड्डभर हुइटीरह।#१ कोर ८:६ आमेन।
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.