प्रकाश 2
2
एफिससक मण्डलीह सन्देश
1“एफिसस मण्डलीक हेरविचार कर्ना दूतह यी बात लिखो:
सातठो तोरैँया आपन दाहिन हाँठम लेहुइया ओ सातठो स्वानक सामदानक बीचम नेङ्गुइया व्यक्तिक बात यिह हो:
2टुँ परिश्रमसे करल काम ओ टुँहार धीरज महीह थाहाँ बा। दुष्ट मनैन टुँ सह नैसेक्टो कैक फे महीह थाहाँ बा। प्रेरित नैरलसे फे प्रेरित हुइटी कहुइयन टुँ जाँच कैक हुँक्र झूटा रहल बात पत्ता लगारख्लो कैक फे महीह थाहाँ बा। 3टुह्र धीरजी बाटो ओ म्वार लाग टुह्र दुःख भोग्लो ओ महीह छोर्ल नैहुइटो।
4तर फे एकठो बातभर मै टुन्हक विरुद्धम कहपर्ठा। टुह्र महीह पैल्ह करलअस प्रेम आब कर छोररख्लो। 5टुँ कत्रा गिरल बाटो, अपन्हे विचार करो। आपन पापी मन परिवर्तन करो ओ टुँ पैल्ह करलअस महीह प्रेम करो। नकि त मै टुन्हकठे अइम ओ टुँहार सामदान वाकर ठाउँमसे हटादेहम। 6तर टुँहारम एकठो असल गुण बा, अर्थात् मै हेल्हा करल ऊ निकोलाइटस कैजउइयन्हक कामह टुह्र फे हेल्हा कर्ठो।
7ज्याकर कान बा, पवित्र आत्मा मण्डलीहुँकन कहल बात सुन! जे जिती, ओहीह परमेश्वरक फुलर्यम रहल जीवनक रूक्खोक फारा मै खाइदेहम।”#उत ३:९; प्रका २२:२; इज २८:१३; ३१:८
स्मुर्नक मण्डलीह सन्देश
8“स्मुर्ना मण्डलीह हेरविचार कर्ना दूतह यी बात लिखो:
जे शुरू ओ अन्तिम हुइट ओ मुवलमसे फेदोस्र जीवित हुइल व्यक्ति असिक कठ:#यशै ४४:६; ४८:१२; प्रका १:१७; २२:१३
9टुँहार दुःखकष्ट महीह थाहाँ बा, टुँ गरीब बाटो कैक फे मै जन्ठुँ, तर वास्तवम टुँ धनी बाटो! यहूदी हुइटी कैक बहाना करुइयन टुँहार विरुद्धम करल नैमजा बात महीह थाहाँ बा, हुँक्र त शैतानक बगालिक हुइट। 10टुन्हकम परी अइना कौनो संकटसे जिन डराओ। टुह्रमध्ये कौनो-कौनोजहन शैतान झ्यालखानम डारदेनेबा, उ ठाउँम टुँहार विश्वासक जाँच हुइनेबा। तर टुँहार कष्ट दश दिनसम केल हुइनेबा। मुवपर्लसे फे म्वारम विश्वास कर जिन छोरो ओ मै टुँहन इनामक रूपम जीवनक मुकुट देहम।
11ज्याकर कान बा, पवित्र आत्मा मण्डलीहुँकन कहल बात सुन! जे जिती, ओहीह द्वासर मृत्यु कुछु हानि कर्ने नैहो।”#प्रका २०:१४; २१:८
पर्गाममक मण्डलीह सन्देश
12“पर्गामम मण्डलीक हेरविचार कर्ना दूतह यी बात लिखो:
ज्याकरठे धर्यार दुइधार्या तरवाल बा, उहाँ असिक कठ:
13टुह्र शैतानक सिंहासन रहल ठाउँम बास बैस्ठो कना बात महीह थाहाँ बा। तर टुह्र म्वार भक्त हुइटो ओ म्वारम विश्वास कर नैछोर्लहुइटो कना मै जन्ठुँ। म्वार विश्वासी साक्षी एन्टिपासह शैतानक बैस्ना ठाउँम मुवागैल् ब्यालम फे टुह्र विश्वास नैछोर्लो।
14तर फे एकठो बातभर मै टुन्हक विरुद्धम कहपर्ठा। टुन्हक बीचम कुई-कुई बालामक शिक्षा मनुइयन बाट। बालाम त इस्राएलीहुँकन पापम फँसैना बात बालाक राजह कलहा। ऊ खासकैक इस्राएलीहुँकन मूर्तिह चह्राइल चिज खाए ओ व्यभिचार कर लगाक फँसैना बात सिखैलहा।#गन्ती २२:५,७; ३१:१६; व्य २३:४; गन्ती २५:१-३ 15ओसहेँक निकोलाइटसक शिक्षा मनुइयन फे टुन्हक बीचम बाट। 16आपन पापी मन परिवर्तन कैक परमेश्वरकठे घुमो, नकि त मै झट्टहेँ अइम ओ म्वार मुहमसे निक्रना तरवालले उ दुष्ट काम कर्ना मनैन्हक विरोधम लडाइँ करम।
17ज्याकर कान बा, पवित्र आत्मा मण्डलीहुँकन कहल बात सुन! जे जिती, मै हुँकन गुप्तम रहल भोजन देहम। मै हुँकन एकठो उज्जर पत्थ्रा फे देहम, उहिँम एकठो लौव नाउँ लिखल रही। यी उज्जर पत्थ्रा पउइया केल उ नाउँ जन्ठा।”#प्रस १६:१४-१५; १६:३३-३४; यूह ६:४८-५०; यशै ६२:२; ६५:१५
थिआटीरक मण्डलीह सन्देश
18“थिआटीरा मण्डलीक हेरविचार कर्ना दूतह यी बात लिखो:
आगीअस बर्ना आँख ओ खार्क टल्कना पित्तलअस चम्कना पाउ रहल परमेश्वरक छावा असिक कठ:
19टुह्र का-का कर्ठो, महीह थाहाँ बा। टुन्हक करल प्रेम, विश्वास, सेवा ओ धीरज रहल बात मै सब जन्ठुँ। टुह्र पैल्हसे धेर सेवा आब कर्ठो कना फे महीह थाहाँ बा। 20तर फे एकठो बातभर मै टुन्हक विरुद्धम कहपर्ठा, उ ईजेबेल कना जन्नीमनैयह टुह्र ठाउँ देठो। ऊ त मै अगमवादिनी हुइटुँ कठ्या ओ आपन शिक्षाले म्वार सेवा कर्ना मनैन भर्माक व्यभिचार कर ओ मूर्तिह चह्राइल चिज खाइ सिखैठ्या।#१ राज १६:३१; २ राज ९:२२,३० 21ओहीह आपन पापी मन परिवर्तन कैक परमेश्वरकठे घुम्ना मौका मै देरख्नु। तर ऊ व्यभिचार कर छोर्बोछोर्बोनैकरट्। 22हेरो, मै ओहीह रोगले थला पारदेहम ओ ओहीसे व्यभिचार करुइयन एकदम दुःख ओ कष्ट पैनेबाट। हुँक्र आपन पापी मन परिवर्तन कैक दुष्ट काम नैछोरहीँ कलसे मै हुँकन ओसिन सजाय देहम। 23वाकर पाछ लग्ना सबजहन मै खतम करम ओ सबजन्हक मनसाय ओ चाहना देखुइया ओ जनुइया मै हुइटुँ कैक सब मण्डली बुझ्नेबाट। टुह्र सबजहन आपन-आपन काम अनुसार मै इनाम देहम।#भज ७:९; यर १७:१०; भज ६२:१२ 24तर असिन खराब शिक्षम नैलागल ओ शैतानक गहिँर रहस्य नैजानल थिआटीरक मण्डलीम रहल औरजहन कहटुँ, कि मै टुँहन कौनो भार नैलगैम। 25तर मै नैआइट्सम टुन्हकठे रहल विश्वास कर्रसे पक्रलरहो। 26जितुइयह ओ अन्तिमसम म्वार इच्छा पूरा करुइयह,
मै जाति-जातिन्हकम अधिकार कर देहम।
27तबदोस्र हुँक्र एकठो लुहाकिक डण्डले शासन करहीँ
ओ माटीक भाँराअस हुँकन चकनाचूर परहीँ।
मै यी अधिकार बाबकठेसे पाइलअस मै हुँकन देहम।#भज २:८-९ 28मै हुँकन बिहानिक तोरैँया फे देहम। 29ज्याकर कान बा, पवित्र आत्मा मण्डलीहुँकन कहल बात सुन!”
Currently Selected:
प्रकाश 2: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
