प्रकाश 18
18
बेबिलोन सहरक पतन
1तबदोस्र मै और एकठो स्वर्गदूतह स्वर्गसे ओल्हाइट् देख्नु। हुँकहार भारी अधिकार रलहन र हुँकहार तेजले सारा पृथ्वी अजरार हुइल्। 2ऊ असिक कैक कर्रसे चिल्लैल,
“महानगर बेबिलोन नाश हुइल्,
उ महानगर भूतन्हक बैस्ना, हरेक किसिमक दुष्टात्मा,
हरेक अशुद्ध ओ फुहर पंक्षीन्हक बैस्ना ठाउँ होरहल।#यशै १३:२१; २१:९; यर ५०:३९; २१:८; प्रका १४:८
3काकरकि सब जातिक मनै
वाकर व्यभिचारक मद पिक मत्तारल।
संसारक राजाहुँक्र ओहीसे व्यभिचार कैरख्ल
ओ संसारक व्यापारीहुँक्र वाकर
नैमेट्ना भोग-विलासक कारण धनी होरल।”#यशै २३:१७; यर ५१:७
4तब मै आकाशमसे और एकठो आवाज सुन्नु,
“हे म्वार मनै, उहाँसे निक्रो,
नकि त वाकर पापक सँगसँग टुह्र फे पर्बो
ओ वाकर विपत्ति टुँहन फे भ्वागपरी।#यशै ४८:२०; यर ५०:८; ५१:६,४५
5काकरकि वाकर पाप
स्वर्गसम रास लागल बाटस,
परमेश्वर वाकर अपराध नैबिस्रैलहुइट।#उत १८:२०-२१; यर ५१:९
6ऊ टुँहन जसिक कैराखल,
ओहीह फे ओस्तहँ करो।
ऊ टुन्हक लाग ज्या जसिक काम कैराखल
वाकर दुइ गुणा घुमादेओ।#भज १३७:८; यर ५०:९
ऊ टुन्हक लाग मद खोर्यम जत्रा भररख्लह्या
वाकर दुइ गुणा कर्रा लग्नागरी घुमादेओ।
7ऊ जत्रा मानसम्मान पाइल
ओ ऐशआराम करल रह,
ओत्रह ओहीह कष्ट ओ शोक देओ
काकरकि ऊ मनमन कठ्या,
‘मै त महारानी होक बैसलबाटुँ,
मै विधवा नैहुइटुँ,
महीह कबु फे शोक कर नैपरी।’#यशै ४७:७-९
8उहओर्से एक्क दिनम उ सहरम
मृत्यु, शोक, ओ अनिकाल
सारा विपत्ति अइनेबाटस।
आगीले ऊ भसम पारजैनेबा,
काकरकि वाकर न्याय कर्ना परमप्रभु परमेश्वर
शक्तिशाली बाट।”
9उहीसे व्यभिचार करल, वाकरसँग भोग-विलासक जीवन जियल संसारक राजाहुँक्र उ सहर जर्टीरहल धूवाँ देख्क रुइनेबाट ओ शोक कर्नेबाट।#इज २६:१६-१७ 10वाकर दण्डक यातनक डरले दूरसे ठह्र्याक असिक कनेबाट,
“शक्तिशाली बेबिलोन!
ट्वारम कसिन दुर्दशा परिआइल,
एकघरी ट्वारम दण्ड परल।”
11संसारक व्यापारीहुँक्र वाकर लाग रुइनेबाट ओ शोक कर्नेबाट, काकरकि कौनोजन फे हुँकन्हक व्यापारक मालसामान फेदोस्र कबु फे किनुइया नैहुइट।#इज २७:३१,३६ 12कौनोजन फे हुँकन्हक स्वान, चाँदी, रत्न, मोती ओ मलमलक लुगा, बैजङ्ग्यार लुगा, रेसमी लुगा, लाल रङ्गक लुगा ओ सब मेह्रिक वास अइना कठ्वा, हाँथीन्हक दाँतले बनल चिज, बहुमूल्य कठ्वा, काँसक चिज, लुहाक ओ सिङ्गमरमरक बनल चिज किन्नेनैहुइट।#इज २७:१२,१३,२२ 13दालचिनी, सब मेह्रिक मसला, वास अइना धूप, मूर्र ओ उज्जर धूप, मद ओ त्याल, मैदा ओ गोहूँ, गोरु-बच्छु ओ छेग्री-भेँरी, घ्वार ओ रथ, कमारा-कमारी कुछु फे नैकिन्नेहुइट। 14व्यापारीहुँक्र ओहीह कनेबाट, “टुँहार इच्छालागल मजा बात सब हेराइल। टुँहार धनसम्पत्ति ओ मानसम्मान सब नाश होगैल्, आब उ कबु फे पैनेनैहुइटो।” 15उ सहरम व्यापार कैक धनी हुइल् व्यापारीहुँक्र वाकरम परिअइना दुःख देख्क दूरहेँ ठह्र्याक असिक कटी बरा स्वरले रुइहीँ ओ शोक करहीँ,#इज २७:३१,३६
16“यी सहरम कसिन दुर्दशा परिअइलस,
यी मलमलक मजा लुगा,
बैजङ्ग्यार लुगा लगाए,
स्वान, हिरा-मोतीक गहना लगाए।
17एक्कघरीम वाकर सारा
सब सखाप होगैलस।”#इज २७:२६-३०
सब पानीजहाजक कप्तानहुँक्र, जहाजम यात्रा करुइया, नावीकहुँक्र ओ सामुद्रिक व्यापारीहुँक्र दूर ठह्र्यैल, 18ओ उ सहर जर्क निक्रल धूवाँ देख्क असिक चिल्लैल, “यीअस भारी सहर त कौनो फे नैरह।”#इज २७:३२ 19हुँक्र आपन कपारिम धूर डार्क रुइटी, विलाप कर्टी असिक कल,
“यी सहरम कसिन दुर्दशा परिअइलस।
यी सहरक धनसम्पत्तिमसे
पानीजहाजक मालिकहुँक्र धनी होरलह।
एक्कघरीम उ नाश होगैल्।#इज २७:३०-३४
20हे स्वर्गम रहल सबजन,
वाकर सब नाश हुइलकम रमाओ।
परमेश्वरक भक्तहुँक्र, प्रेरित ओ अगमवक्ताहुँक्र
सबजन रमाओ काकरकि
ऊ टुँहन ज्या करल
वाकर लाग परमेश्वर ओहीह दण्ड देरख्ल।”#व्य ३२:४३; यर ५१:४८
21तब एकठो शक्तिशाली स्वर्गदूत चक्याअस एकठो भारीनक पत्थ्रा उठाक असिक कैक समुद्रम फँक्ल,
“यी महान सहर बेबिलोन फे
असहँक कर्रसे फाँक्जैनेबा
ओ उ फेदोस्र कबु फे नैदेखपर्ने हो।#यर ५१:६३-६४; इज २६:२१
22वीणा, बश्या, तुरहीक आवाज
ओ गीत गउइन्हक सोर
आबठेसे ट्वारम कबु नैसुन्जैने हो।
कौनो किसिमक शिप रहल मनै
कबु फे नैपाजैने हुइट।
चक्यक आवाज फे
कबु फे नैसुन्जैने हो।#इज २६:१३; यशै २४:८
23दियक अजरार फे
ट्वारम कबु नैचम्कने हो।
दुल्हा-दुल्हीक स्वर फे
ट्वारम नैसुन्जैने हो।
काकरकि ट्वार व्यापारीहुँक्र
पृथ्वीक बराबरा मनै रलह,
ओ ट्वार मन्त्रतन्त्रले
सब जातिक मनैन् ठग्लरलह्या।#यर ७:३४; २५:१०
24बेबिलोन सजाय पाराखल
काकरकि पृथ्वीभरिक अगमवक्ता
ओ परमेश्वरक सब भक्तन्हक रगत
उह सहरम बहाइल पागैल्।”#यर ५१:४९
Currently Selected:
प्रकाश 18: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
