फिलिप्पी 3
3
सत्य धार्मिकता
1अन्त्यम भैयौ, प्रभु टुँहन आनन्द देहीँ। टुँहन यी बात घरीघरी लिख्नाम मै झिँजो नैमन्टुँ। यी त टुन्हक सुरक्षक लाग हो।
2कुक्कुरअस झग्रा कर्ना, खराब काम कर्ना ओ शरीरम खतना करपर्ठा कना मनैनसे होसियार होओ। 3काकरकि सत्य हिसाबले खतना करुइयन त हम्र पो हुइटी काकरकि हम्र पवित्र आत्माद्वारा परमेश्वरक आराधना कर्ठी ओ ख्रीष्ट येशूम हम्र गर्व कर्ठी। हम्र कौनो बाहिरी रीतिथितिम भरोसा नैकर्टी। 4वास्तवम मै अपन्हेह त असिन रीतिथितिम भरोसा कर्ना कारण बा। कौनो मनैया रीतिथितिम भरोसा कर्ना कारण बा कठा कलसे, म्वार त झन् धेर कारण बा। 5मै जन्मलक आठौँ दिनम म्वार खतना कैगिल् हो। मै इस्राएल जातिक, बेन्यामीन कुलक, पक्का हिब्रू हुइटुँ। व्यवस्थक हिसाबले कना हो कलसे मै एकठो फरिसी रनहुँ।#प्रे २३:६; २६:५; रोम ११:१ 6मै जोशिलो होक मण्डलीह सँतैना काम कर्नु। व्यवस्था मान्क परमेश्वरक आघ धर्मी हुइना रलसे त मै ठीक रनहुँ।#प्रे ८:३; २२:४; २६:९-११
7तर उ ब्याला मै आपन लाग फाइदा सम्झल सब बात आब ख्रीष्टक लाग बेकार मन्ठुँ। 8अत्र केल नैहोक, येशू ख्रीष्ट म्वार प्रभु हुइट कना एकदम बहुमूल्य ज्ञान पाक और सब बात बेकार मन्ठुँ। उहाँक लाग मै सब बात छोरदेरख्नु ओ ख्रीष्टह पाऊँ कैक मै यी सब बातह बह्न्वार मानरख्नु। 9ओ मै पूर्ण रूपले उहाँकम रह चहठुँ। व्यवस्था मान्क परमेश्वरक आघ धर्मी हुइना म्वार आपन धार्मिकता नैहो। तर आब त परमेश्वर महीह ख्रीष्टम विश्वास कर्लक कारण धर्मी ठह्रारख्ल। यी धार्मिकता विश्वासम अर्याइल बा। 10मै त ख्रीष्टह जानक लाग ओ उहाँ मुवलमसे फेदोस्र जीवित हुइना शक्तिक अनुभव करक लाग उहाँक दुःखकष्टम सहभागी ह्वाए ओ उहाँक मृत्युसम उहाँअस ह्वाए चहठुँ। 11ओ सम्भव हुइलसे मुवलमसे फेदोस्र जीवित ह्वाए चहठुँ।
लक्ष्यओर आघ जैना
12मै लक्ष्यम आघहेँ पुगरनु या सिद्ध होरनु कैक नैकटुँ। तर मै उ सिद्धता पाइक लाग बल करटुँ, ज्याकर लाग ख्रीष्ट येशू महीह आघहेँ आपन बनारख्ल। 13भैयौ, मै यी पासेक्नु जसिन महीह नैलागट्, तर एकठो काम कर्ठुं, उ का हो कलसे मै बितल समयम हुइल बातह बिस्राक आघओर रहल बात पाइक लाग मै कोसिस कर्ठुं। 14उहओर्से स्वर्गक इनाम जित्ना विचारले मै लक्ष्यओर आघ जाइटुँ। याकर लाग परमेश्वर महीह ख्रीष्ट येशूद्वारा अनन्त जीवनम बलैलह।
15हम्र आत्मिक रूपले परिपक्व हुइल् मनै अस्तह विचार करपर्ठा। कुई-कुई फरक विचार कर्ठ कलसे परमेश्वर टुँहन बात बुझादेहीँ। 16बात ज्या जसिन रलसे फे, आम्हीसम हम्र हासिल करल लक्ष्यह पक्रलरही।
17भैयौ, टुह्र फे म्वारअस करो। हम्र टुन्हक लाग असल नमुना होरली। आब उह नमुना अनुसार चल्ना मनैन्हक पाछ लागो।#१ कोर ४:१६; ११:१ 18मै टुँहन धेर फ्यारा कैरख्नु, आब फे रुइटी कहटुँ, धेर मनै ख्रीष्टक क्रूसक शत्रुअस जीवन जिठ। 19हुँक्र विनाशओर आघ बह्रल बाट, प्याट हुँकन्हक दिउँता हुइटन। लाज मानपर्ना बातम त हुँक्र घमण्ड कर्ठ। हुँकन्हक मन संसारिक बातम लागल बाटन। 20हम्र त स्वर्गक नागरिक हुइटी। मुक्ति देना हमार प्रभु येशू ख्रीष्ट स्वर्गसे आइकठ कैक हम्र उहाँक बट्या हेर्टीबाटी। 21उहाँ आपन शक्तिले सब चिजह आपन अधीनम आनसेक्ठ। उहाँक यिह शक्तिले हमार मरणशील शरीरह आपन महिमित शरीरअस बनुइयाबाट।
Currently Selected:
फिलिप्पी 3: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
