याकूब 4
4
परमेश्वरक अधीनम रना
1काजे टुह्र एक-आपसम लडाइँझग्रा कर्टिरठो? टुन्हक स्वार्थी चाहनले नैहो का? जौन हरेक मनैयक मनम हुँकन्हक असल विचारसे लडाइँ कर्टिरठा। 2बिह्र मुना हुइलकओर्से टुह्र लडाइँ ओ झग्रा करभिर्जैठो। टुह्र कौनो चिज पाइक लाग धेर चाहना कर्ठो, ओ यदि टुन्हक चाहना पूरा नैहुइल् कलसे, टुह्र बाधा पुगैना मनैन्हक हत्या कैडर्ठो। टुन्हक चाहना पूरा नैहुइट्, काकरकि टुह्र परमेश्वरसे नैमङ्ग्टो। 3माङ्गीडर्लसे फे, उहाँ टुँहन नैदेट, काकरकि टुह्र मोजमजा करक लाग गल्ती विचारले मङ्ग्ठो।
4टुह्र व्यभिचारी मनै, परमेश्वरह छोर्क यी संसारक खराब चालचलनम लग्ना मनै परमेश्वरक विरोध करुइयन हुइट कना बात टुँहन थाहाँ नैहो का? उहओर्से यदि कुई यी संसारक खराब हिसाबले चल्ठा कलसे, ऊ परमेश्वरक शत्रु हो। 5परमेश्वर हमारम डारल आत्मक लाग धेर बिह्र मुठ#४:५ अर्थात् परमेश्वर हमारम बिह्र मुना आत्मा डारदेरख्ल। कना बात धर्मशास्त्रम बिना अर्थक लिखल बा कैक टुह्र सोँच्ठो का? 6वास्तवम परमेश्वर हमन धेर अनुग्रह देठ, जसिन कि वचनम लिखल बा, “परमेश्वर घमण्डी मनैन्हक विरोध कर्ठ, तर नम्र मनैन अनुग्रह देठ।”
7उहओर्से विनम्र होक परमेश्वरक अधीनम रहो। शैतानक विरोध करो, त उ टुँहन छोर्क भागी।#लूक ४:१-१३ 8परमेश्वरसे लग्घक सम्बन्ध जोरो, त उहाँ फे टुँहनसे लग्घक सम्बन्ध जोरहीँ। टुह्र पाप कर्टिरना मनै, खराब काम कर छोरदेओ। टुह्र दुइ मनक मनै, आपन मन परमेश्वरम केल लगाओ। 9आपन पापी जीवनक बारेम सोँच्क शोक करो ओ रोओ! टुह्र खुशी हुइल् ओ हाँसल से त, दुःखी हुइपर्ठा ओ रुइपर्ठा! 10प्रभुक आघ नम्र होओ, ओ उहाँ टुँहन उठुइयाबाट।
11हेरो भैयौ, केक्रो विरोधम खराब बात जिन बट्वाओ। यदि बटोइठो ओ हुँकन दोषी ठह्रैठो कलसे, टुह्र व्यवस्थक विरोधम खराब बात बटोइठो ओ व्यवस्थह दोषी ठह्रैठो। यदि टुह्र व्यवस्थह दोषी ठह्रैठो कलसे, टुह्र व्यवस्थम लिखल अनुसार चलुइयन नैहुइटो, तर टुह्र अपन्हेह व्यवस्थसे धेर अधिकार रहल न्यायाधीश सम्झटो। 12वास्तवम व्यवस्था देहुइया परमेश्वरकठे केल न्याय कर्ना अधिकार बाटन। प्राण बचैना या नाश कर्ना शक्ति उहाँकठे केल बाटन। टुह्र अपन्हेक का सोँच्ठो ओ औरजहन दोषी ठह्रैठो?
13टुह्र “आज या काल हम्र फलाना सहरम जैबी, ओ उहाँ वर्ष दिन व्यापार कर्बी, ओ धन कमैबी” कैक घमण्ड करुइयन यिहाँ सुनो। 14टुह्र त द्वासर दिन हुइना बात फे नैजन्टो। टुन्हक जिन्दगी का हो जे? टुन्हक जिन्दगी त एकघरी देखपर्ना ओ बिलाजैना वाफअस केल त हो। 15बेनसे टुह्र असिक कहपर्ना हो, “यदि परमेश्वर चहहीँ कलसे, हम्र बच्लरबी ओ असिन-ओसिन कर्बी।” 16तर टुह्र त घमण्डी होक आपन बनाइल योजनम खूब धाक लगैठो। असिक धाक लगैना खराब हो।
17उहओर्से यी बात जन्लरहो: यदि कुई जानजान्क फे असल काम नैकरट् कलसे, ऊ पाप कर्ठा।
Currently Selected:
याकूब 4: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
