हिब्रू 8
8
येशू लौव बाचक प्रधान पूजारी
1आब हम्र कहख्वाजल बात यिह हो: हमार असिन प्रधान पूजारी बाट, जे स्वर्गम सर्वोच्च परमेश्वरक सिंहासनक दाहिन पाञ्जर बैठलबाट।#भज ११०:१ 2उहाँ महापवित्रस्थानम प्रधान पूजारी होक सेवा कर्ठ। यी महापवित्र ठाउँ त मनैन्हक बनाइल नैहो तर परमप्रभुक बनाइल हो।
3काकरकि हरेक प्रधान पूजारी परमेश्वरह भेटी ओ बलिदान चह्राइक लाग नियुक्त हुइल् रठ। उहओर्से हमार प्रधान पूजारीकठे फे परमेश्वरह चह्राइक लाग कुछु ना कुछु त रहहीपर्ठन। 4उहाँ यी पृथ्वीम पलरट कलसे, पूजारी बन्ने नैरलह, काकरकि व्यवस्था अनुसार भेटी चह्रैना पूजारीहुँक्र त यिहाँ आघहेँसे पलबाट। 5हुँकन्हक कर्ना काम स्वर्गम रहल बातक नकल ओ छैह्याँ केल हो। मोशा पवित्र पाल बनाइबेर परमेश्वरसे असिन आज्ञा पारख्लह, “हेर्, पर्वत्वम टोहीह देखागैल् नमुना अनुसार सब चिज बनाइस।”#प्रस २५:४० 6येशूह देगैल् पूजारी काम और प्रधान पूजारीन्हक कामसे धेर उत्तम बा। ओसहेँक परमेश्वर मध्यस्थकर्ता येशूद्वारा मनैनसे बान्धल लौव बाचा फे पैल्ह बाहान्गैल् पुरान बाचसे उत्तम बा। काकरकि यी बाचा झन् उत्तम बातक प्रतिज्ञम आधारित बा।
7काकरकि यदि पैल्हक बाचम खोट नैरहट् कलसे, फेदोस्र बाचा बहन्ना आवश्यकता पर्नेनैरह। 8तर परमेश्वर आपन मनैन्हकम दोष भेँटैल त कल,
“दिन अइटीबा, परमप्रभु कठ,
जब मै इस्राएल ओ यहूदक घरानासे
लौव बाचा बन्धम।
9यी बाचा हुँकन्हक पुर्खनसे
म्वार बान्धल बाचाअस नैहुइनेहो।
उ ब्याला मै हाँठ पकर्क हुँकन
मिश्रदेशमसे निकार्क अन्नहुँ।
तर मै हुँकनसे बान्धल बाचह हुँक्र भङ्ग कर्ल।
उहओर्से मै फे हुँकन्हक वास्त नैकर्नु।
10परमप्रभु कठ, अइना दिनम
मै इस्राएलक घरानासे यी लौव बाचा बन्धम:
हुँकन्हक मनम म्वार व्यवस्था ढैदेहम,
ओ हुँकन्हक हृदयम उ लिखदेहम।
मै हुँकन्हक परमेश्वर हुइम,
ओ हुँक्रजुन म्वार मनै हुइहीँ।
11उ ब्याला कुई फे ‘परमप्रभुह चिन्हो’
कैक आपन दादुभाइ ओ छरछिमेकीहुँकन
सिखाइ नैपर्नेहो,
छोटीसे लेक बरा मनै
सबजन महीह चिन्नेबाट।
12काकरकि हुँकन्हक सब अपराध
मै क्षमा कैदेहम,
ओ हुँकन्हक पाप फेदोस्र कबु नैसम्झम।”#यर ३१:३१-३४
13परमेश्वर यी बाचह “लौव बाचा” कलकओर्से उहाँ पैल्ह बान्धल बाचह पुरान ठहरैल। पुरान होक खियैटी गैल् बात झट्टहेँ नाश होक जउइयाबा।
Currently Selected:
हिब्रू 8: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
