एफिसी 5

1टुह्र परमेश्‍वरक प्रिय सन्‍तान हुइलकओर्से उहाँक देखासिकी करुइयन होओ। 2ख्रीष्‍ट हमन प्रेम कैक सुगन्‍धित धूप ओ बलिअस अपन्‍हेह परमेश्‍वरक आघ हमार लाग अर्पण कर्ल। ओसहेँक टुन्‍हक जीवन फे प्रेमम चलपर्ठा।#प्रस २९:१८; भज ४०:६

3टुह्र परमेश्‍वरक जनहुँक्र हुइलकओर्से टुन्‍हक बीचम व्‍यभिचार, सब किसिमक फुहर बात, ओ लोभलालचक नाउँऽ जिन लेहो। 4अश्‍लील, मूर्ख ओ असभ्‍य बात जिन बटोइहो, यी सुहैना बात नैहो। बेनसे टुह्र त परमेश्‍वरह धन्‍यवाद देहपर्ठा। 5व्‍यभिचार कर्ना या शरमलग्‍टिक काम कर्ना मनैया त ख्रीष्‍ट ओ परमेश्‍वरक राज्‍यम हक नैपउइया हो कना बात टुह्र जन्‍लरहपर्ठा। ल्‍वाभ करुइया फे मूर्तिपूजा कर्नाअसक पाप हुइलकओर्से ऊ फे कुछु हक नैपउइया हो।

6बिना अर्थक गफ लगाक टुँहन कुई फे छल कर जिन पाए। अस्‍तह बातले करबेर अट्‌टेरीन्‍हकम परमेश्‍वरक रिस पर्ठा। 7उहओर्से असिन मनैनसे सङ्‌गतऽ जिन करो। 8पैल्‍ह टुह्र अन्‍धकारम रलहो तर आब प्रभुक जन बन्‍क टुह्र अजरारम आरलो। अजरारम रना मनैअस जीवन जिओ। 9काकरकि ज्‍योतिक फारा त भलाइ कर्ना, इमान्‍दार हुइना ओ सत्‍य बोल्‍ना हो। 10प्रभुह मनपर्ना बात सिख्‍ना कोसिस करो। 11अन्‍धकारम रहुइयन्‍हकअस बेकार काम कर्बो-कर्बो जिन करो। तर उ काम गलत हो कैक देखादेओ। 12हिँक्र गुपचुपम करल कामक बात त बटोइना फे लाजलग्‍टिक बा। 13जब कौनो चिज अजरारम आनजैठा, तब उ स्‍पष्‍ट देखपर्ठा। 14धर्मशास्‍त्रम लिखल बा,

“रै निन्‍दाइल मनैया उठ्

ओ मुवलमसे जाग,

ओ ख्रीष्‍ट ट्‌वारम चम्‍कहीँ।”

15उहओर्से कौन हिसाबले चलपर्ना हो, उ बातम मजासे ध्‍यान देओ, मूर्खअस जिन होओ, बुद्धिमान् होओ। 16टुँहार आघ अइना हरेक मौकाह पूरा सदुपयोग करो, काकरकि दिन खराब बा।#कल ४:५ 17उहओर्से मूर्ख जिन होओ, तर प्रभुक इच्‍छा का बाटन, उ बात बुझो। 18मद पिक मत्‍वार रना नाहीँ, उहिँले त जिन्‍दगी बिग्रठा, तर पवित्र आत्‍मले भरिपूर्ण होओ। 19एक-औरजहनसे स्‍तुति, भजन ओ पवित्र आत्‍मक देहल गीत गाओ ओ प्रभुह आपन हृदयसे मीठ गीतले स्‍तुति करो। 20हमार प्रभु येशू ख्रीष्‍टक नाउँम परमेश्‍वर बाबह सब बातम सड्‌डभर धन्‍यवाद देओ।#कल ३:१६-१७

21ख्रीष्‍टह देना टुन्‍हक आदरक कारणले एक-औरजन्‍हक अधीनम रहो।

गोस्‍या-गोसिन्या

22टुह्र गोसिन्यहुँक्र, प्रभुक अधीनम रहलअस आपन-आपन गोस्‍यन्‍हक अधीनम रहो।#कल ३:१८; १ पत्र ३:१ 23काकरकि गोस्‍या आपन गोसिन्यक शिर हुइट, कसिक कलसे ख्रीष्‍ट मण्‍डलीक शिर हुइट। वास्‍तवम मण्‍डली उहाँक शरीर हो, ओ उहाँ मुक्ति देहुइया हुइट। 24मण्‍डली ख्रीष्‍टक अधीनम रहलअस गोसिन्यहुँक्र फे सब बातम आपन-आपन गोस्‍यन्‍हक अधीनम रहपर्ठा।

25टुह्र गोस्‍यहुँक्र, ख्रीष्‍ट मण्‍डलीह आपन जीउज्‍यान देक प्रेम करलअस आपन-आपन गोसिन्यन प्रेम करो।#कल ३:१९; १ पत्र ३:७ 26ख्रीष्‍ट मण्‍डलीह पानीले धुइलअस आपन वचनद्वारा शुद्ध ओ पवित्र बनैल। 27यी मण्‍डलीह पवित्र, निर्दोष, दाग नैरहल, नैचिम्‍स्‍याइल, कौनो खोट नैरहल चह्‍कार मण्‍डली बनाक आपनसँग ढरक लाग उहाँ असिन काम कर्ल।

28ओसहेँक गोस्‍यहुँक्र फे आपनऽ शरीरह प्रेम करअस आपन-आपन गोसिन्यन प्रेम करपर्ठा। आपन गोसिन्यह प्रेम करुइया अपन्‍हेह प्रेम कर्ठा। 29कुई फे आपन शरीरह हेल्‍हा नैकरट्‍, तर याकर पालनपोषण कर्ठा। ओसहेँक ख्रीष्‍ट आपन मण्‍डलीक पालनपोषण कर्ठ। 30काकरकि हम्र उहाँक शरीरक अङ्‌ग हुइटी। 31धर्मशास्‍त्रम लिखल बा, “उहओर्से मनैया आपन डाई-बाबह छोर्क आपन गोसिन्यसे मिल्‍ठा ओ हुँक्र दुनु जन एकठो शरीर हुइठ।”#उत २:२४ 32यी एकठो महान रहस्‍यक बात हो, ओ मै यी बातह ख्रीष्‍ट ओ मण्‍डली एक हुइना अर्थम हेर्ठुं। 33जे होस, टुह्र हरेक जन आपन गोसिन्यह अपन्‍हेहअस प्रेम करपर्ठा, ओ गोसिन्या फे आपन गोस्‍यक आदर करपर्ठा।

Currently Selected:

एफिसी 5: thl

Highlight

Copy

Compare