प्रेरित 4

पत्रुस ओ यूहन्‍ना महासभक सामुन्‍ने

1पत्रुस ओ यूहन्‍ना मनैन्‌से बट्‍वैटीरलह त पूजारीहुँक्र, मन्‍दिरक द्वरपालेन्‍हक कप्‍तान, ओ सदुकीहुँक्र अइल। 2हुँक्र रिसले चूर होरलह, काकरकि पत्रुस ओ यूहन्‍ना “येशू मुवलमसे जिरल, ओ और मुवल मनै फे जिउइयाबाट” कैक मनैन सिखाइटलह। 3उहओर्से हुँक्र हुँकन पक्रल, ओ सन्‍झ्‍या हुइलओर्से हुँकन् रातभरीक लाग थुन्‍देल। 4तर वचन सुनुइयामध्‍ये धेर जन विश्‍वास कर्ल। असिक येशूम विश्‍वास करुइया पुरुष मनै लगभग पाँच हजार पुग्‍ल।

5द्वासर दिन शासकहुँक्र, अगुवाहुँक्र ओ शास्‍त्रीहुँक्र यरूशलेमम जम्‍मा हुइल। 6सभम प्रधान पूजारी हन्‍नास रलह, ओ और जन कैयाफा, यूहन्‍ना, अलेक्‍जेन्‍डर ओ प्रधान पूजारीक खलकक् मनै फे रलह। 7हुँक्र पत्रुस ओ यूहन्‍नह सभम अन्‍ल ओ पुछ्‌ल, “यी नाङ्‌गर मनैयह चोखैना शक्ति या अधिकार टुँहन के देहल?”

8तब पवित्र आत्‍मले भरिपूर्ण होक पत्रुस हुँकन् कल, “आदरणीय जनतन्‍हक माननीय शासकहुँक्र ओ अगुवाहुँक्र! 9हम्र यी नाङ्‌गर मनैयक भलाइ कर्लकम यी मनैया कसिक मजा हुइल् कैक हम्र आज यी महासभक सामुन्‍नेम स्‍पष्‍टिकरण देहपर्ना हो कलसे 10मै अप्‍नहुँकन ओ सारा इस्राएलक मनैन स्‍पष्‍ट रूपले कहटुँ, कि अप्‍नहुँकन्‍हक सामुन्‍नेम ठह्र्‍याइल यी मनैयह नासरत सहरक येशू ख्रीष्‍ट चोखैलह। अप्‍नहुँक्र उहाँह क्रूसम टङ्‌गाक मुवैली तर परमेश्‍वर उहाँह मुवलमसे जियादेल। 11येशू त,

‘घर बनुइयन रद्दी ठह्राक फाँकल् पत्‍थ्रा हुइट,

तर आब कोनोक मुख्‍य पत्थ्रा होरल।’#भज ११८:२२

12उहओर्से येशू केल मनैन् मुक्ति देहसेक्‍ठ काकरकि परमेश्‍वर हमन मुक्ति देहक लाग उहाँह बाहेक और कौनोजहन नैपठैलहुइट।”

13सारा सभक मनै पत्रुस ओ यूहन्‍नक साहस देख्‍क छक्‍क पर्ल, काकरकि उ दुइ जन धेर पह्रल् लिखल नैरलह, तर सर्वसाधारण मनै रलह। ओ सभक मनै हुँक्र येशूकसँग रहँट्‍ कना बात फे थाहाँ पैल। 14तर चोखैलक उ नाङ्‌गर मनैयह पत्रुस ओ यूहन्‍नकसँग ठह्र्‍याइल देख्‍क हुँक्र कुछु कह नैसेक्‍ल। 15उहओर्से हुँक्र पत्रुस ओ यूहन्‍नह महासभमसे बाहर जैना आज्ञा देल ओ अप्‍न-अप्‍न केल होक छलफल कर्ल, 16“आब हम्र हुँकन् का कर सेक्‍बी? हुँकन्‍हक करल अचम्‍मक काम सारा यरूशलेमक मनै थाहाँ पारख्‍ल ओ हम्र फे यी बात इन्‍कार कर नैसेक्‍टी। 17तर यी बात और मनैन्‍हक बीचम फैल नैदेहपरट्। ‘येशूक बारेम आबठेसे किहुसे फे जिन बटोइहो’ कैक हुँकन् चेताउनी देहपरल।”

18तबदोस्र हुँक्र पत्रुस ओ यूहन्‍नह फेदोस्र भित्तर बलैल ओ “आबठेसे येशूक बारेम किहुसे बटोइना फे जिन बटोइहो ओ किहुह सिखैना फे जिन सिखैहो” कैक चेताउनी देल। 19तर पत्रुस ओ यूहन्‍ना हुँकन् कल, “अप्‍नहुँकन्‍हक कहल मन्‍ना कि परमेश्‍वरक कहल मन्‍ना, परमेश्‍वरक नजरम कौन ठीक हो? अप्‍नहुँक्र अपन्‍हे विचार करी ना। 20हम्र आपन द्‌याखल ओ सुनल् बात बिना बोल्‍ल रह सेक्‍बोसेक्‍बोनैकर्टी।”

21सभक मनै पत्रुस ओ यूहन्‍नह सजाय देना कुछु उपाय नैपैल त, हुँकन् धम्‍की देक छोरदेल। काकरकि हुँकन्‍हक करल अचम्‍मक काम देख्‍क सब मनै परमेश्‍वरक प्रशंसा करटलह। 22ओ अचम्‍म प्रकारले चोखैलक उ नाङ्‌गर मनैया चालीस वर्षसे फे धेर उमेरक रह।

विश्‍वासीन्‍हक प्रार्थना

23छुट्‌कारा पैल त पत्रुस ओ यूहन्‍ना और विश्‍वासीन्‍हकठे गैल, ओ मुख्‍य पूजारीन्‍हक ओ अगुवन्‍हक कहल सब बात हुँकन् सुनैल। 24यी बात सुन्‍ल त हुँक्र सबजन मिल्‍क परमेश्‍वरसे जोरसे प्रार्थना करलग्‍ल, “हे प्रभु, आकाश, पृथ्‍वी, समुद्र ओ उहिँम रहल सब चिज अप्‍न बनैलही।#प्रस २०:११; नहे ९:६; भज १४६:६ 25अप्‍न पवित्र आत्‍माद्वारा आपन सेवक हमार पुर्खा दाऊदक मुहमसे बोल्‍ली,

‘काजे गैरयहूदीहुँक्र झोँक्‍यैठ?

काजे मनै बेकारम जाल जोर्ठ?#भज २:१-२

26परमप्रभुक विरोधम

ओ उहाँक र्‍वाजल ख्रीष्‍टक विरोधम

पृथ्‍वीक राजाहुँक्र

ओ शासकहुँक्र एकसाथ भेला हुइठ।’

27वास्‍तवम अप्‍नक र्‍वाजल सेवक येशूक विरोधम जाल ज्‍वारक लाग हेरोद, पन्‍तियस पिलातस, गैरयहूदीहुँक्र ओ इस्राएलीहुँक्र यिह सहरम जम्‍मा होरलह।#मत्ती २७:१-२; मर्क १५:१; लूक २३:१,७-११; यूह १८:२८-२९ 28हुँक्र त अप्‍नक शक्ति ओ इच्‍छले आघहेँ करल निर्णय अनुसार कर्ल। 29आब हे प्रभु, हुँकन्‍हक धम्‍कीओर अप्‍नक ध्‍यान लगाई ओ अप्‍नक वचन प्रचार करक लाग हमन धेर साहस दी। 30रोग्याबेरम्‍हेन चोखाइक लाग अप्‍नक शक्तिशाली हाँठ फैलाई ओ अप्‍नक पवित्र सेवक येशूक नाउँम अचम्‍मक काम हुइस्‍याक।”

31हुँक्र प्रार्थना कैक सेक्‍ल त हुँक्र जम्‍मा हुइल् ठाउँ हिलल्। तब हुँक्र सबजन पवित्र आत्‍मले भरगैल ओ परमेश्‍वरक वचन साहससे ब्‍वाल लग्‍ल।

विश्‍वासीहुँक्र आपन सम्‍पत्ति बाँट्‌देल

32सब विश्‍वासीन्‍हक एक हृदय एक मन रलहन। हुँकन्‍हकठे रहल चिज हुँक्र आपन निजी सम्‍पत्ति नैसम्‍झँट, उहओर्से हुँक्र आपनठे रहल चिज बाँडचुँड करँट्‍।#प्रे २:४४-४५ 33प्रेरितहुँक्र प्रभु येशू मुवलमसे फेदोस्र जिरल कैक शक्तिशाली तरिकाले गवाही देहँट्‍ ओ हुँक्र परमेश्‍वरसे प्रशस्‍त आशिष पाइँट्। 34हुँक्रमध्‍येम किहुह कुछु चिजिक खाँचो नैरलहन, काकरकि ज्‍याकर-ज्‍याकरठे जग्‍गाजमिन या घरबार रलहन, हुँक्र उ बेँच्‍क आइल पैँसा 35प्रेरितन्‍हकठे आनँट्‍ ओ उ पैँसा मनैन्‍हक आवश्‍यकता अनुसार बाँट्‌देहँट्।

36उदाहरणक लाग, साइप्रस टापुक योसेफ नाउँ रहल लेवी-कुलक एकठो मनैया रलह। प्रेरितहुँक्र हुँकहीन बारनाबास कहँट्‍, ज्‍याकर अर्थ उत्‍साह देना मनैया हो। 37ऊ आपन जग्‍गा बेँच्‍क पाइल पैँसा प्रेरितहुँकन्‍हकठे अन्‍ल।

Currently Selected:

प्रेरित 4: thl

Highlight

Copy

Compare