प्रेरित 21

यरूशलेमक यात्रा

1हम्र हुँकनसे विदावारी होक पानीजहाजम चिहुर्ली ओ सरासर कोस टापुम पुग्‍ली। द्वासर दिन हम्र रोडस टापुम गैली, दोस्र उहाँसे पटारा सहरम गैली। 2उहाँ हम्र फोनिकेम जैना एकठो पानीजहाज भेँटैल ओ ओइहेँम चिहुर्ली। 3पानीजहाज जाइट-जाइट साइप्रस टापुह द्‍याख सेक्‍ना ठाउँम पुगल त, उ टापुह बाउँओर पार्क गैल्। ओ सिरिया क्षेत्रक टुरोस सहरम मालसामान उतारक लाग र्‍वाकल ब्‍याला हम्र फे उत्रली। 4हम्र उ ठाउँम विश्‍वासीहुँकन भेँटैली ओ सात दिनसम हुँकन्‍हकसँग रली। हुँक्र पवित्र आत्‍मक अगुवाइम पावलह यरूशलेमम जिन जाई कैक बिन्‍ती कर्ल। 5तर फे हम्र उहाँ जाइक लाग पानीजहाज पक्र घुम्‍ली। हुँक्र आपन-आपन जहानपरीवार लर्कापर्का सबजहन लेक हमन पठाए सहरसे बाहर समुद्र किनारसम अइल। हम्र उहाँ ठिहुन टेक्‍क प्रार्थना कर्ली। 6तबदोस्र हुँकनसे बिदावारी होक हम्र पानीजहाजम चिहुर्ली, ओ हुँक्रजुन आपन-आपन घर गैल।

7हम्र टुरोससे पानीजहाजम चिहुर्क टोलेमाइस सहरम गैली। हम्र उहाँक विश्‍वासीहुँकन भेँटाए गैली ओ एक दिन हुँकन्‍हकसँग बैठ्‍ली। 8द्वासर दिन हम्र उहाँसे बिदावारी होक कैसरिया सहरम गैली, ओ खुशीक खबर प्रचार करुइया फिलिपक घरम बैठ्‍ली। उ फिलिप यरूशलेमम खाना बँट्‍ना कामम रोजगैल् सात जनमध्‍ये एकठो रलह।#प्रे ६:५; ८:५ 9हुँकहार चारठो भ्‍वाज नैहुइल् छाईन् रलहन। हुँक्र अगमवाणी ब्‍वालँट्‍।

10हम्र कैसरियम कुछ दिनसम पलरहल समयम यहूदियासे अगाबस नाउँ रहल एकठो अगमवक्ता अइल।#प्रे ११:२८ 11ऊ हमारठे अइल ओ पावलक फाँर कस्‍ना लुगले आपन हाँठ-ग्‍वारा अपन्‍हे बाहान्‍क कल, “पवित्र आत्‍मा असिक कठ, ‘यी फाँर कस्‍ना लुगा ज्‍याकर हो, ओहीह यरूशलेमम यहूदीहुँक्र असहेँक बन्‍धहीँ ओ गैरयहूदीन्‍हक हाँठम सुम्‍पदेहीँ।’”

12यी बात सुन्‍क, हम्र ओ उहाँक विश्‍वासीहुँक्र सबजन पावलह यरूशलेमम जिन जाई कैक बिन्‍ती कर्ली। 13तर पावल जवाफ देल, “टुह्र काजे असिक रो-रोक म्‍वार मनह दुःखीत बनादेहटो? प्रभु येशूक लाग त, यरूशलेमम कैदम पर्ना केल नैहोक, मै मुना फे तयार बाटुँ।” 14हम्र हुँकहीन मनाइ नैसेक्‍ली त “प्रभुक इच्‍छा पूरा ह्‍वाए” कैक चूप लग्‍ली।

15तबदोस्र हम्र सरसामान तयार पर्ली ओ यरूशलेमओर लग्‍ली। 16हमारसँग कैसरियक कुई-कुई विश्‍वासीहुँक्र फे गैल। हुँक्र हमन साइप्रस टापुसे आइल मनासोन कना एकठो पुरान विश्‍वासीक घरम बैठक लाग लैगैल।

पावल यरूशलेम पुग्‍लक

17हम्र यरूशलेमम पुग्‍ली त, उहाँक विश्‍वासीहुँक्र हमन खुशीसे स्‍वागत कर्ल। 18द्वासर दिन हम्र पावलकसँग याकूबह भेँटाए गैली। उहाँ यरूशलेम मण्‍डलीक सब एल्‍डरहुँक्र जम्‍मा होरलह। 19हुँकन अभिवादन कैक पावल अप्‍न गैरयहूदीन्‍हक बीचम खुशीक खबर प्रचार करबेर परमेश्‍वर कसिन-कसिन काम कर्ल, सब बात एक-एक कैक बयान कैदेल।

20यी सुन्‍क हुँक्र परमेश्‍वरक महिमा कर्ल। तबदोस्र हुँक्र पावलह कल, “हेरी भाइ, यिहाँ फे हजारौँ यहूदीहुँक्र प्रभु येशूम विश्‍वास कैरख्‍ल, ओ व्‍यवस्‍थम लिखल बात फे एक-एक कैक मन्‍ठ। 21हुँक्र अप्‍नक बारेम फे थोरबहुत सुनरख्‍ल। उ का हो कलसे, गैरयहूदीन्‍हक समाजम बैठ्‍ना यहूदीहुँकन अप्‍न ‘मोशक देहल व्‍यवस्‍था पालन कर नैपरट्‍, लर्कन्‍हक खतना कर नैपरट्‍ ओ यहूदी रीतिभाँति कुछु मान नैपरट्‍’ कैक सिखैठी हुँ। 22अप्‍न यिहाँ यरूशलेमम आरली कैक हुँक्र पक्‍क फे सुनुइयाबाट। आब हम्र का करी? 23उहओर्से हमार कहल मानी। शुद्ध हुइना भाकल करल मनै यिहाँ हमारसँग चार जन बाट।#गन्‍ती ६:१३-२१ 24हिँकन लेक मन्‍दिरम जाई ओ शुद्ध हुइना कामम सँगसँग सहभागी हुई। हुँकन्‍हक शुद्ध हुइना कपार खौरबेर लग्‍ना खर्च फे अप्‍न तिरदी। असिक अप्‍नह व्‍यवस्‍था पालन करल देख्‍क अप्‍नक बारेम फैलल् हल्‍ला सब झूट हो कैक सबजन थाहाँ पैहीँ। 25गैरयहूदी विश्‍वासीन्‍हक हकम भर, हुँक्र पालन करपर्ना बात ‘मूर्तिपूजा करल अशुद्ध चिज जिन खैहो, केक्रो रगत जिन खैहो, घ्‍याँचा डाब्‍क मुवाइल पशुक शिकार जिन खैहो ओ अनैतिक क्रियाकलाप जिन करहो’ कैक हम्र चिठीम लिख्‍क पठारख्‍ली।”#प्रे १५:२९

26द्वासर दिन पावल उ चारजहन लैजाक हुँकन्‍हक सँगसँग शुद्ध हुइना कामम सहभागी हुइल। तबदोस्र ऊ शुद्ध हुइना भाकल पूरा कैक हरेकजन्‍हक लाग बलि चह्रैना दिनिक जानकारी पूजारीह देहक लाग मन्‍दिरम गैल।

पावल पक्राउ पर्लक

27शुद्ध हुइना कामक सात दिन पूरा हुइ-हुइ करटह। तब एशिया क्षेत्रसे आइल कुछ यहूदीहुँक्र पावलह मन्‍दिरम देख्‍ल। हुँक्र मनैन्‍हक भीडह सुर्‍याक हुँकहीन पक्रल, 28ओ एकदम बरा सोरले कहलग्‍ल, “इस्राएलीहुँक्र, सहायता करो! हमार जातिक विरोधम सारा दुनियक मनैन प्रचार करुइया, ओ मोशक व्‍यवस्‍था पालन कर नैपरट्‍ कैक सबजहन कटी नेङ्‌गुइया यिह मनैया हो। अत्र केल नैहोक, यी गैरयहूदीहुँकन मन्‍दिरम आन्‍क पवित्र ठाउँह समेत अपवित्र बनादेराखल।” 29(हुँक्र काजे असिक कल कलसे, हुँक्र पावलह ओ त्रोफिमसह यरूशलेम सहरम सँग रहल देखरख्‍लह। त्रोफिमस एफिसस सहरक गैरयहूदी मनैया रलह। पावल पक्‍क फे उह मनैयह मन्‍दिरभित्तर लैगिल कैक हुँकन लग्‍लन।)#प्रे २०:४

30तब सारा सहरम तहल्‍का मच्‍गैल्, ओ मनै चारिओर्से दगुर्टी आगैल। हुँक्र पावलह पक्रल ओ घँस्‍यैटी मन्‍दिरमसे बाहर निक्रैल, ओ मन्‍दिरक गेट डामडुम लगादेल। 31हुँक्र त पावलह सिध्‍यादेना हिसाबम लागलरह। तब सारा यरूशलेमम हूलदङ्‌गा मच्‍गैल् कैक रोमी पल्‍टनक सेनापतिकठे खबर पुग्‍गैल्। 32ऊ तुरुन्‍त सिपाहीन ओ कप्‍तानहुँकन लेक मनैन्‍हक भीडओर दगुर्टी अइल। भीडक मनै सेनापति ओ सिपाहीहुँकन आइट्‍ देख्‍ल त, पावलह पिट छोर्ल।

33तब सेनापति पावलह पक्रल ओ सिपाहीन दुइठो सिक्रीले हुँकहीन बान्‍ध लगैल। ऊ मनैन पुछ्‌ल, “यी के हो? यी का बिगार करल?” 34भीडमसे घाँटीक नस फुला-फुला कुई कुछु कल, कुई कुछु कल। तहल्‍का मच्‍लक कारण सेनापति सत्‍य बात का हो कैक थाहाँ पाइ नैसेक्‍ल त, पावलह ब्‍यारेकम लैजैना आदेश देल। 35जब पावल ब्‍यारेकम जैना भर्‍याङ चिउह्रलग्‍ल, तब तहल्‍का मच्‍चुइयन अत्रा जोश्‍यागैल, कि सिपाहीहुँक्र पावलह कन्‍धेम बोक्‍क लैजाइपर्लन। 36भीडक मनैजुन “पावलह, सिध्‍यादेओ! सिध्‍यादेओ!!” कैक पाछपाछ कर्रसे नारा लगाइटलह।

पावलक सम्‍बोधन

37सिपाहीहुँक्र पावलह ब्‍यारेक भित्तर छिराइलग्‍ल त, ऊ सेनापतिह ग्रीक भाषम कल, “हजुर, मै कुछु ब्‍वाल पैम कि?”

ऊ कल, “का टैँ ग्रीक भाषा जन्‍ठ्‌या? 38का टैँ कुछ समय आघ विद्रोह मच्‍चुइया ओ चार हजार आतंकवादीन उजार ठाउँम लैजुइया मिश्रदेशक नेता नैहुइट्‍या?”

39पावल जवाफ देल, “मै कहाँ हुइम? मै त किलिकिया क्षेत्रक टार्सस सहरम जन्‍मल यहूदी हुइटुँ। मै चानचुन्या सहरक मनैया नैहुइटुँ। बिन्‍ती बा, यी मनैन्‍हक आघ कुछु बोल्‍ना मै अनुमति पाऊँ।”

40सेनापतिसे अनुमति पैल त, पावल भर्‍याङम ठह्र्‍याक हाँठले मनैन शान्‍त हुइना इशारा कर्ल। भीडक मनै एकदम शान्‍त हुइल त, ऊ हुँकन्‍हक आपन हिब्रू भाषम ब्‍वाल लग्‍ल।

Currently Selected:

प्रेरित 21: thl

Highlight

Copy

Compare