प्रेरित 19
19
पावल एफिसस सहरम
1अपोल्लोस कोरिन्थ सहरम रहल समयम, पावल फ्रिगिया क्षेत्रसे पर्वत्वक डगरम नेङ्ग्टी एफिसस सहरम पुग्ल। ऊ उहाँ कुछ विश्वासीहुँकन भेँटैल, 2ओ हुँकन पुछ्ल, “का टुह्र विश्वास कर्लो त, पवित्र आत्मा पैलो?”
हुँक्र जवाफ देल, “पवित्र आत्मा बाट कैक त हम्र सुन्ना फे नैसुन्लहुइटी।”
3ऊ कल, “ओसिन हो कलसे, टुह्र कसिन बप्तिस्मा लेलो त?”
हुँक्र कल, “यूहन्नक सिखाइल अनुसार हम्र बप्तिस्मा लेरख्ली।”
4तब पावल कल, “यूहन्नक सिखाइल बप्तिस्मा त, मनै आपन-आपन पापी मन परिवर्तन कैक परमेश्वरकठे घुमल प्रमाणक रूपम लेना बप्तिस्मा हो। ऊ ‘महीसे पाछ अउइयकम विश्वास करहो’ कल। हुँकहीनसे पाछ अउइया व्यक्ति येशू त हुइट।”#मत्ती ३:११; मर्क १:४,७-८; लूक ३:४,१६; यूह १:२६-२७ 5यी बात सुन्क हुँक्र प्रभु येशूक नाउँम बप्तिस्मा लेल। 6जब पावल हुँकन्हकम हाँठ ढैक प्रार्थना कर्ल, तब पवित्र आत्मा हुँकन्हकम अइलन, ओ हुँक्र अन्यभाषम बोल्ल ओ अगमवाणी फे कर्ल। 7हुँक्र लगभग बाह्र जन रलह।
8पावल तीन मैन्हासम नियमित रूपले सभाघरम जाक निर्धक्कसे प्रचार कर्ल। ऊ परमेश्वरक राज्यक बारेम बहस कर्टी मनैन विश्वासम अन्ना कोसिस कर्ल। 9तर कौनो-कौनो मनै कठोर होक विश्वास नैकर्ल। झन् उल्ट सबजन्हक सामुन्नेम मुक्तिक डगरक बदनाम कर्ल। उहओर्से पावल हुँकन्हक सभाघरम जाइ छोरदेल ओ विश्वासीहुँकन आपनसँग लैगिल। तबदोस्र ऊ हरेक दिन टुरान्नस स्कूलम मुक्ति पैना बारेम मनैनसे तर्कवितर्क करँट्। 10असिक दुइ वर्षसम चल्तीरहल, ओ एशिया क्षेत्रम रना यहूदी, गैरयहूदी सबजन प्रभुक वचन सुन्ल।
11परमेश्वर पावलद्वारा अचम्म-अचम्मक काम कर्ल, 12यिहाँसम कि मनै रूमाल या तौलिया पावलक शरीरम छुवाक बेरम्हेन्हकठे लैजाइँट्। उ लुगा बेरम्हेन छुवैटीसाइट्, हुँक्र चोखाजाइँट् ओ हुँकन्हकमसे भूत फे निकरजाइँट्।
13तर झारफुक कर्टी ठाउँ-ठाउँम घुमफिर कर्ना कौनो-कौनो यहूदीहुँक्र प्रभु येशूक नाउँम मनैन्हकमसे भूतन निक्राइखोज्ल। हुँक्र भूतन कहँट्, “पावलक प्रचार करल येशूक नाउँम मै टोहीह आज्ञा देहटुँ, वाकरमसे निकर।” 14स्केवास नाउँ रहल एकठो यहूदी मुख्य पूजारीक सात भाइ छावन फे ओस्तै करँट्। 15एक दिन हुँक्र ओस्तै कर्ल त, भूत्वा हुँकन कहल, “मै येशूह चिह्न्ठुँ, ओ पावलह फे चिह्न्ठुँ, तर टुह्र के हुइटो?” 16भूत्वा लागल उ मनैया उल्रटी जाक हुँकन झटकदेहल। ऊ हुँकन असिन हिंसात्मक हिसाबले आक्रमण करल, कि ऊ हुँकन्हक लगाइल लुगा सब चिँठचाँठ पार्क हुँकन रक्तारुहुन बनादेहल। तब हुँक्र उ घरमसे नङ्ट भाग्गैल।
17यी घटना एफिससम रना यहूदी ओ गैरयहूदीन्हक बीचम हाली फैलगैल्। सुनुइयन सबजन डरैल, ओ प्रभु येशूक धेर प्रशंसा कर्ल। 18येशूम विश्वास करल मनै धेर जन अइल ओ आपन-आपन करल खराब काम खुल्लमखुल्ला स्वीकार कर्ल। 19हुँक्रमध्ये पैल्ह झारफुक करुइयन मन्त्रतन्त्र लिखल आपन-आपन किताब अन्ल ओ सबजन्हक सामुन्नेम जरादेल। हुँक्र जराइल किताबक म्वाल अड्कल कर्ल त, लगभग पचास हजार चाँदीक पैँसा हुइल्। 20असिक प्रभुक बारेम वचन प्रभावशाली तरिकाले फैलटी गैल्।
21यी घटना हुइल त पाछ, यरूशलेम जैनासे आघ पावलह पवित्र आत्मा हुँकहीन माकेडोनिया ओ अखैया क्षेत्रम जैना कर लगाइल महसुस कर्ल। ऊ कल, “यरूशलेम जाक पाछ मै रोम सहरम जैहीपर्ठा।” 22तबदोस्र ऊ आपन दुइ जन सेवा करुइयन, तिमोथी ओ इरास्तसह माकेडोनियम पठैल, तर ऊ अप्नजुन टनिक दिनसम एशिया क्षेत्रम पलरल।
एफिसस सहरम हूलदङ्गा
23उ समयम, मुक्तिक डगर कना बारेम खूब हल्ला चलल् रह। 24डेमेत्रियस नाउँ रहल एकठो मनैया चाँदीक मन्दिर बनैना व्यापार कर। ऊ धेर मनैन आर्तेमिस देवीक छुटीछुटी मन्दिर बनैना कामम लगारख्लहा। 25एक दिन डेमेत्रियस आपन काम लगाइल मनैन ओ ओस्तहँ काम कर्ना और मनैन फे जम्मा कैक कहल, “हेरो भैयौ, हम्र यिह व्यापार कैक पैँसा कमैठी कना बात टुँहन थाहाँ बा। 26तर टुह्र अपन्हे देख्टीबाटो ओ सुन्टीबाटो, कि पावल कना मनैया हाँठले बनाइल दिउँता त दिउँतऽ नैहुइट कैक धेर मनैन भाँरस्याकल। उ मनैया यी काम एफिसस सहरम केल नैहोक सारा एशिया क्षेत्रम कैस्याकल। 27हमार व्यापारक नाउँ गन्धैना केल नाहीँ, तर महान् देवी आर्तेमिसक मन्दिरसमेत बिना कामक हुइसेक्ना खतरा बा। ओ सारा एशिया ओ संसारभरिक मनै पूज्टीआइल देवीक गौरव फे सब हेराजउइया बा।”
28यी सुन्क हुँक्र रिसले चूर हुइल, ओ “एफिसीहुँकन्हक महान देवी आर्तेमिसक, जय!” कटी कर्रसे नारा लगाइलग्ल। 29सारा सहरम हूलदङ्गा मचगैल्। मनै एकजुट होक पावलक सङ्घरेन माकेडोनियासे आइल गायस ओ अरिस्तार्खसह पकर्ल ओ रङ्गशालम घँस्यैटी लैगिल। 30पावल मनैन्हक भीडम जाइक लाग रलह, तर विश्वासीहुँक्र हुँकहीन जाइ नैदेल। 31एशिया क्षेत्रक कुई-कुई हाकिमहुँक्र पावलक सङ्घरेन रलह। हुँक्र फे पावलह “उहओर्से उहाँ जिन जाइ” कैक बिन्ती पठैल।
32रङ्गशालम अत्रा हूलदङ्गा मच्चल रह, कि कुई कुछु कहँट्, कुई कुछु कहँट्। हुँक्र घाँटीक नस फुला-फुला आपन-आपनओरसे लागलरह। धेरजसिन मनैन त, उहाँ काजे भीड लागल बा कैक फे थाहाँ नैरलहन। 33भीडम रहल यहूदीहुँक्र अलेक्जेन्डर नाउँक मनैयह यी अवस्थक बारेम बट्वाइक लाग आघ सर्ल। अलेक्जेन्डर मनैन शान्त रहक लाग हाँठले इशारा कर्ल ओ यहूदीन बचाइक लाग बोल्ना कोसिस कर्ल। 34तर जब भीडक मनै ऊ त यहूदी हो कैक थाहाँ पैल, तब हुँक्र सबजन “एफिसीहुँकन्हक महान देवी आर्तेमिसक, जय! एफिसीहुँकन्हक महान देवी आर्तेमिसक, जय!” कैक करीब दुइ घण्टासम कर्रसे नारा लगैटीरल।
35आखिरम सहरक हाकिम मनैन शान्त कराइ सेक्ल। ऊ कल, “हेरो एफिसस सहरक मनै, महान् देवी आर्तेमिसक मन्दिर ओ स्वर्गमसे झरल देवीक मूर्तिक रक्षा करुइयन हम्र एफिसीहुँक्र जो हुइटी कैक सबजन जन्लबाट। 36यी बात कुई फे इन्कार कर नैसेक्ना सत्यतथ्य रलकओर्से, अप्नहुँक्र शान्त रही ओ सोचविचार बिना कर्ल कुछु जिन करी। 37अप्नहुँकन्हक पकर्क आनल यी मनै ना त हमार मन्दिर लुटरख्ल, ना त हमार देवीक अपमान कैरख्ल। 38यदि डेमेत्रियस ओ हुँकहार कामम लगाइल मनैन्हक, केक्रो विरोधम कुछु चित्त नैबुझल बात बाटन कलसे, हुँक्र अदालतम जाक उजुर करसेक्ठ, हुँकन्हक मुद्दक फैसला करुइया न्यायाधीशहुँक्र पलबाट। 39यदि अप्नहुँकन्हक यहीसे धेर उजुर बा कलसे, वाकर बारेम नागरिक सभा बलाक छलफल कर फे सेक्जाई। 40आझुक यी हूलदङ्गा टुह्र मच्चैलो कैक रोमी सरकार हमन दोष लगाइसेक्ना खतरा बा, काकरकि यी हूलदङ्गा मच्चैना त कुछु कारणऽ नैहो। यदि रोमी सरकार याकर बारेम हमनसे कुछु स्पष्टिकरण मागी कलसे, हमारठे कुछु जवाफ नैहो।” 41ऊ अत्रा कैक मनैन बिदा देल।
Currently Selected:
प्रेरित 19: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
