प्रेरित 11

पत्रुसक स्‍पष्‍टिकरण

1गैरयहूदीहुँक्र फे परमेश्‍वरक वचनम विश्‍वास करल बात प्रेरितहुँक्र ओ सारा यहूदिया क्षेत्रम रहल विश्‍वासीहुँक्र सुन्‍ल। 2तर जब पत्रुस यरूशलेमम पुग्‍ल, तब यहूदी विश्‍वासीहुँक्र#११:२ यहूदी विश्‍वासीहुँक्र: ग्रीक भाषक स्रोतमसे शाब्‍दिक अनुवाद कर्लसे यी ठाउँम “खतना करल मनै” हुइठा। तर याकर मतलब कि त (क) हुँक्र ख्रीष्‍टियन हुइल् यहूदीहुँक्र हुइट, कि त (ख) हुँक्र यहूदी ख्रीष्‍टियनमध्‍येक कुछ मनै हुइट जे एकदम कट्‌टर हिसाबले व्‍यवस्‍था ओ यहूदी रीतिभाँति मन्‍ठ। यी समयम यहूदी ख्रीष्‍टियनहुँक्र यहूदी धर्मक रीतिभाँति कट्‌टर हिसाबले मानँट्‍। यहूदी रीतिभाँति अनुसार एकठो यहूदी मनैया गैरयहूदीहुँकनसे सँग खाना नैखाइट्‍। गैरयहूदी मनैयह यहूदी हुइक लाग खतना करपरन। हुँकहीन दोष लगैल, 3“अप्‍न गैरयहूदीन्‍हक घरम जाक हुँकन्‍हकसँग काजे खानपिन कर्ली?”

4तबदोस्र पत्रुस सब घटना जस्‍तक तस्‍त हुँकन सुनाइ लग्‍ल, 5“मै योप्‍पा सहरम प्रार्थना कर्टीरनहुँ। मै ध्‍यान-मग्‍न हुइल् ब्‍याला परमेश्‍वरसे एकठो दर्शन देख्‍नु। मै एकठो बरानक तन्‍नाअसक चिज चर्‍यौ खुट्‍लम पकर्क स्‍वर्गमसे झराजाइट्‍ देख्‍नु। उ चिज म्‍वारठे आइल। 6जब मै निहार्क हेर्नु, तब उ तन्‍नम सब जातिक जनावर देख्‍नु। उहिँम घरपालुवा जनावर, जङ्‌गली जनावर, घस्रना जनावर, ओ चिरैँचुरुङ्‌गन रलह। 7तबदोस्र मै असिन आवाज सुन्‍नु, ‘पत्रुस, उठो, ओ मार्क खाओ।’

8“मै कनु, ‘नाही प्रभु, मै अशुद्ध या अपवित्र चिज कबु फे नैखैलहुँ।’

9“तर स्‍वर्गसे फेदोस्र आवाज आइल, ‘परमेश्‍वरक शुद्ध पारल चिजह टुँ अशुद्ध जिन कहो।’ 10तीनचो अस्‍तह हुइल्। तबदोस्र सब चिज तन्‍नासैँट स्‍वर्गम उठागैल्।

11“उहब्‍याला कैसरियासे महीह बलाए पठागैल् तीनठो मनै मै रहल घरम आपुग्‍ल। 12नैहिच्‍किचाक हुँकन्‍हकसँग जाओ कैक पवित्र आत्‍मा महीह कल। हिँक्र छ जन यहूदी विश्‍वासीहुँक्र फे म्‍वारसँग रलह, ओ हम्र एकठो मनैयक घर गैली। 13उ मनैया आपन घरम एकठो स्‍वर्गदूत देखपर्लक बात हमन सुनैल। स्‍वर्गदूत हुँकहीन कल, ‘योप्‍पा सहरम रहल पत्रुस कैजिना सिमोनह बलाए मनैन पठाओ। 14पत्रुस आक टुँ ओ टुँहार सलघरक मनै कसिक मुक्ति पैना कैक वचन टुँहीन सुनैहीँ।’

15“जब मै ब्‍वाल लग्‍नु, तब सुरुम हमारम आइलअस हुँकन्‍हकम फे पवित्र आत्‍मा अइलन। 16तबदोस्र मै प्रभुक कहल वचन सम्‍झनु, ‘यूहन्‍ना पानीक बप्‍तिस्‍मा देल तर टुह्र पवित्र आत्‍मक बप्‍तिस्‍मा पैबो।’#प्रे १:५ 17हम्र प्रभु येशू ख्रीष्‍टम विश्‍वास कर्ली ओ जौन वरदान पैली, परमेश्‍वर उह वरदान गैरयहूदीहुँकन देल। परमेश्‍वर अपन्‍हे हुँकन वरदान देडर्ठ कलसे, उहाँह रोकुइया मै के हुइटुँ?”

18यी बात सुन्‍क यहूदी विश्‍वासीहुँक्र पत्रुसह दोष लगाइ छोर्ल, ओ “परमेश्‍वर गैरयहूदीन फे आपन-आपन पापी मन परिवर्तन कैक परमेश्‍वरकठे घुम्‍ना ओ अनन्‍त जीवन पैना निगाहा देरख्‍ल” कैक परमेश्‍वरक महिमा कर्ल।

एन्‍टिओखियक मण्‍डली

19स्‍तिफनसक हत्‍या हुइलन त, विश्‍वासीहुँक्र सतावट हुइलक कारण यरूशलेमसे तितरबितर हुइल। कुई-कुई फोनिके क्षेत्रम, कुई-कुई साइप्रस टापुम, ओ कुई-कुई सिरिया क्षेत्रक एन्‍टिओखिया सहरसम पुग्‍ल, ओ हुँक्र सुरुम यहूदीन केल वचन प्रचार कर्ल।#प्रे ८:१-४ 20तर पाछ साइप्रस टापु ओ कुरेनी सहरसे एन्‍टिओखियम आइल चेलावँ ग्रीक जातिक मनैन फे खुशीक खबर प्रचार करलग्‍ल। 21हुँकन्‍हकठे प्रभुक शक्ति रलहन, ओ विश्‍वास करुइयन धेर जन प्रभुकओर घुम्‍ल।

22यी खबर यरूशलेमक मण्‍डलीम पुगल त, मण्‍डलीक अगुवाहुँक्र बारनाबासह एन्‍टिओखियम पठैल। 23जब ऊ एन्‍टिओखियम पुग्‍ल, तब परमेश्‍वर हुँकन कृपा करल देख्‍क ऊ खुशी हुइल ओ हुँकन सारा हृदयले प्रभुकम भरोसा कर्लरहहो कैक उत्‍साह देल। 24बारनाबास असल, पवित्र आत्‍मले भरल, ओ विश्‍वासम बलगर व्‍यक्ति रलह। हुँकहार कारण धेर मनै प्रभुकम विश्‍वास कर्ल।

25तबदोस्र बारनाबास शाऊलह ख्‍वाज टार्सस सहरम गैल। 26शाऊलह भेँटैल त, ऊ हुँकहीन एन्‍टिओखियम अन्‍ल। हुँक्र दुनु जन प्रभुकम विश्‍वास करुइयन्‍हकसँग वर्ष दिनसम सङ्‌गति कर्टी धेर जहन सिखैल। येशूक चेलावँ एन्‍टिओखियम सबसे पैल्‍ह ख्रीष्‍टियन कैगिलह।

27उह समयम कुछ अगमवक्ताओँ यरूशलेमसे एन्‍टिओखियम अइल। 28हुँक्रमध्‍येम अगाबस नाउँ रहल एकठो अगमवक्ता रलह। ऊ मण्‍डलीम उठ्‌ल ओ सारा संसारम#११:२८ सारा संसारम: बाइबलक धेर अनुवादम यी ठाउँम “सारा संसारम” लिखल बा। धेरजसिन बाइबल विद्वानहुँक्र यहीह रोमी साम्राज्‍य हो कैक विचार कर्ठ, ओ और जनजुन यहीह इस्राएल देश हो कैक विचार कर्ठ। क्‍लौडियसक शासनकालम रोमी साम्राज्‍यम कयौचो अनिकाल पर्लहा। जे होस, एन्‍टिओखियक विश्‍वासीहुँक्र यहूदियम रना विश्‍वासीन्‍हक लाग भेटी उठाइल बातले का देखैठा कलसे, एन्‍टिओखियम (यी फे रोमी साम्राज्‍यक एक भाग रह) अनिकाल नैपरल। उहओर्से अगाबसक अगमवाणी इस्राएल देशम लक्ष्‍यित रह जसिन देखपर्ठा। भारी अनिकाल परी कैक पवित्र आत्‍माद्वारा अगमवाणी बोल्‍ल। (पाछ रोमी शासक क्‍लौडियसक शासनकालम उ अगमवाणी पूरा हुइल्।)#प्रे २१:१० 29हुँकहार अगमवाणी सुन्‍क एन्‍टिओखियक विश्‍वासीहुँक्र आपन-आपन औकात अनुसार यहूदिया क्षेत्रम रना विश्‍वासीन्‍हक लाग भेटी उठैना विचार कर्ल। 30हुँक्र असिक उठाइल पैँसा बारनाबास ओ शाऊलक हाँठ यरूशलेमक मण्‍डलीक एल्‍डरन्‍हक लाग पठादेल।

Currently Selected:

प्रेरित 11: thl

Highlight

Copy

Compare