२ कोरिन्थी 2
2
1टुन्हकठे चित्त दुःख्ना किसिमक और यात्रा नैकर्ना मै निश्चय कैरख्नु। 2काकरकि यदि मै टुँहन दुःखी बनैम कलसे, के महीह खुशी बनाई? मै दुःखी बनाइल मनै पक्क फे महीह खुशी बनाइ नैसेक्ट। 3मै टुन्हकठे अइम त, महीह आनन्द देना मनैनसे मै दुःखी हुइ जिन पर कैक मै चिठी लिख्नु। काकरकि महीह आनन्द हुइबेर टुँहन फे आनन्द हुई कना म्वार पक्का विश्वास बा। 4टुन्हक चित्त दुःखाइक लाग नाहीँ, तर टुन्हकप्रति रहल म्वार गहिँर प्रेम टुह्र जानो कैक धेर दुःखकष्टम आँस बहैटी टुँहन उ चिठी लिख्नु।
क्षमा देना बारेम
5कुई केक्रो चित्त दुःखाराखल कलसे उ कामसे म्वार नाहीँ तर टुन्हक सबजन्हक कुछ हदसम चित्त दुःखाराखल। मै यी बात टुन्हकप्रति कठोर नैहुइक लाग कनहुँ। 6मण्डलीक बहुमतले देहल सजाय वाकर लाग पुग्ना बाटस। 7तर आब टुह्र ओहीह क्षमा करपर्ठा ओ सान्त्वना देहपर्ठा, नकि त ऊ भारी शोकम परजाई। 8उहओर्से मै टुँहन बिन्ती करटुँ, ओहीह प्रेम करल ऊ थाहाँ पाए। 9म्वार कहल मन्ठो कि नाहीँ कैक टुन्हक जाँच करक लाग मै उ चिठी लिख्नहुँ। 10जेहीह टुह्र क्षमा कर्ठो, मै फे क्षमा कर्ठुं। यदि मै कौनोजहन क्षमा कैरख्नु कलसे, टुन्हक हितक लाग ख्रीष्टक सामनेम क्षमा कैरख्नु, 11ताकि शैतान हमन मौका छ्वाप नैपाए। काकरकि वाकर दुष्ट जुक्तिक बारेम हमन थाहाँ बा।
लौव बाचक सेवक
12त्रोआस सहरम ख्रीष्टक बारेम खुशीक खबर प्रचार कर गैल् ब्याला प्रभु म्वार लाग ड्वार खोलदेल।#प्रे २०:१ 13तर म्वार विश्वासी भैया तीतसह उहाँ नैभेटैनु त नैमजा लागल। उहओर्से मै हुँकन्हकठेसे बिदा होक माकेडोनियाओर लग्नु।
14परमेश्वरह धन्यवाद ह्वाए, उहाँ हमन ख्रीष्ट येशूक बिजय उत्सवम डोर्यैठ। ओ ख्रीष्टक ज्ञानक मीठ वास फैलाइक लाग परमेश्वर हमन कामम लगैठ। 15काकरकि हमार जीवन परमेश्वरकठे पुग्ना ख्रीष्टक मीठ बासअसक हो। तर यी वास मुक्ति पउइयन ओ नाश हुउइयन फरक-फरक तरिकाले लेठ। 16नाश हुउयन्हक लाग हम्र मृत्युक दुर्गन्ध हुइटी, तर मुक्ति पउइयन्हक लाग हम्र जीवन देना सुगन्ध हुइटी। अत्राभारी कामक जिम्मा लिह सेक्ना के बा? 17हम्र आपन फाइदक लाग परमेश्वरक वचन प्रचार कर्ना व्यापारी नैहुइटी। तर हम्र इमान्दार होक ख्रीष्टक सेवकक् रूपम परमेश्वर हमन हेर्टीबाट कना बात जान्क उहाँक वचन प्रचार कर्ठी।
Currently Selected:
२ कोरिन्थी 2: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
