१ यूहन्ना 5
5
परमेश्वरक छावाद्वारा अनन्त जीवन
1येशू जो ख्रीष्ट हुइट कैक विश्वास करुइया हरेक मनैया परमेश्वरक सन्तान हो, ओ बाबह प्रेम करुइया मनैया उहाँक सन्तानन फे प्रेम कर्ठा। 2यदि हम्र परमेश्वरह प्रेम कर्ठी ओ उहाँक आज्ञापालन कर्ठी कलसे, हम्र परमेश्वरक सन्तानन प्रेम कर्ठी कना बात हम्र जन्ठी। 3परमेश्वरह प्रेम कर्ना कलक उहाँक आज्ञापालन कर्ना हो, ओ उहाँक आज्ञा झन्झट लगैना हिसाबक नैहुइटन।#यूह १४:१५ 4काकरकि जे परमेश्वरक सन्तान हो, ऊ यी दुष्ट संसारह जितदेठ, ओ यी जित हमार विश्वासद्वारा हुइठा। 5संसारह के जितसेक्ठा? येशू त परमेश्वरक छावा हुइट कैक विश्वास करुइया केल जितसेक्ठा।
6एक जन यी पृथ्वीम आक पानीम बप्तिस्मा लेल, ओ उहाँक मृत्युम रगत बहलन। उहाँ त येशू ख्रीष्ट हुइट, जे पानीद्वारा केल नाहीँ, तर पानी ओ रगतद्वारा प्रकट हुइल। ओ यी बातक साक्षी पवित्र आत्मा बाट, काकरकि पवित्र आत्मा त सत्य हुइट।#५:६ यी पदक शाब्दिक अनुवाद: उहाँ उह जो हुइट, जे पानी ओ रगतद्वारा अइल। अर्थात् येशू ख्रीष्ट, जे पानीद्वारा केल नाहीँ, तर पानी ओ रगतद्वारा अइल। ओ यी बातक साक्षी पवित्र आत्मा बाट, काकरकि पवित्र आत्मा त सत्य हुइट। 7तीन तरिकाले उहाँक बारेम साक्षी देगैल् बा: 8पवित्र आत्मा, पानी ओ रगत। यी तीन्यौ तरिकाले एक्क बातक साक्षी देगैल् बा। 9मनैन्हक देहल साक्षी त हम्र विश्वास कर्ठी कलसे, परमेश्वरक देहल साक्षी त झन् विश्वासयोग्य बा। परमेश्वर आपन छावक बारेम साक्षी देरख्ल। 10परमेश्वरक छावकम विश्वास करुइयन सबजन आपन मनम उहाँक देहल साक्षी सत्य हो कैक जन्ठ। तर परमेश्वरम विश्वास नैकरुइयन उहाँह झूट मन्ठ, काकरकि आपन छावक बारेम परमेश्वरक देहल साक्षीम हुँक्र विश्वास नैकर्ट।
11हमन देगैल् साक्षी यिह हो: परमेश्वर हमन अनन्त जीवन देरख्ल, ओ यी जीवनक स्रोत उहाँक छावा हुइट।#यूह ३:३६ 12परमेश्वरक छावा रहुइयकम जीवन बा, परमेश्वरक छावा नैरहुइयकम जीवन नैहो।
अनन्त जीवनक निश्चयता
13टुह्र अनन्त जीवन पारख्लो कना बात जान सेको कैक टुह्र परमेश्वरक छावकम विश्वास करुइयन मै यी चिठी लिखटुँ। 14परमेश्वरक इच्छा अनुसार ज्या मङ्ग्लसे फे उहाँ हमार प्रार्थना सुन्ठ कैक हमन पूरा विश्वास बा। 15यदि हम्र प्रार्थनम ज्या मङ्ग्लसे फे परमेश्वर सुन्ठ कना बात जन्ठी कलसे, हमार माङ्गल सब चिज उहाँ देठ कैक फे जन्ठी।
16यदि कुई आपन भैयह पाप करट् देख्ठा, ओ उ पापक नतिजा मृत्यु#५:१६ यिहाँ उल्लेख हुइल् “मृत्यु” शब्दले सम्भवत: शारीरिक मृत्यु नैजनाइट्, तर अनन्तसम परमेश्वरसे अलग हुइना बात जनैठा। मृत्यु नतिजा अन्ना पाप कलक क्षमा नैहुइना पाप हो, जसिन कि येशू ख्रीष्टम विश्वास नैकर्ना (१ यूहन्ना ५:१२), या सम्भवत: औरजहन प्रेम नैकैक जीवन जिना (१ यूहन्ना ३:१४)। यिहिँले ऊ मनैया परमेश्वरह प्रेम नैकरट् कना बात जनैठा। नैहो कलसे, ऊ वाकर लाग प्रार्थना कैदेहपर्ठा ओ परमेश्वर ओहीह जीवन देहुइयाबाट। तर मृत्यु नतिजा अन्ना पाप फे बा, ओसिन पाप करुइयक लाग प्रार्थना कैदेहपर्ठा कैक मै नैकहठुइटुँ। 17सब खराब काम पाप हो, तर हरेक पाप मृत्यु नतिजा नैआनट्।
18परमेश्वरक सन्तान हुइल् मनैया पाप कर्टीनैरहट् कना बात हमन थाहाँ बा। काकरकि परमेश्वरक छावा वाकर सुरक्षा कर्ठ, ओ शैतान ओहीह छुव नैस्याकट्। 19हम्र परमेश्वरक सन्तान हुइटी, ओ सारा संसार शैतानक अधीनम बा कैक हमन थाहाँ बा। 20परमेश्वरक छावा आरल ओ हमन सत्य परमेश्वरह चिन्ह्ना समझशक्ति देरख्ल कना बात फे हमन थाहाँ बा। हम्र सत्य परमेश्वरम बाटी काकरकि हम्र उहाँक छावा येशू ख्रीष्टम बाटी। मनैन अनन्त जीवन देहुइया सत्य परमेश्वर उहाँ जो हुइट।
21हेरो लर्काओँ, देवीदिउँतनसे#५:२१ यूहन्ना “पाप” जनाइक लाग यिहाँ आलङ्कारिक हिसाबले “देवीदिउँता” शब्द प्रयोग कैरख्ल। असिन आलङ्कारिक प्रयोग पुरान नियमम फे बा। सत्य परमेश्वरसे दूर लैजैना ज्या चिज फे देवीदिउँताअस हो। अलग रहो।
Currently Selected:
१ यूहन्ना 5: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
