१ कोरिन्थी 16
16
विश्वासीन्हक लाग भेटी उठैना
1यरूशलेमम रहल विश्वासीन्हक लाग उठैना भेटीक विषयम जुन मै गलातियक सारा मण्डलीह देहल निर्देशन अनुसार करहो।#रोम १५:२५-२६ 2हरेक हप्तक पैल्ह दिन टुह्र सबजन आपन-आपन कमाही अनुसार कुछु धन अल्गाक जम्मा कर्टीरहहो। यदि टुह्र यी कर्बो कलसे, मै टुन्हकठे आइल ब्याला भेटी उठाइ नैपरी। 3मै अइम त, टुन्हक उठाइल भेटी यरूशलेमम लैजाइक लाग टुन्हक र्वाजल मनैन मै सिफारिस कैक पठादेहम। 4यदि महीह फे जाइ परी कलसे, हुँक्र म्वारसँग जाइ सेकहीँ।
पावलक भेटघाट कर्ना योजना
5मै माकेडोनियाओर्से यात्रा करबेर टुँहनसे भेटघाट कर आइकठुँ, काकरकि मै माकेडोनियाओर्से जाइकठुँ।#प्रे १९:२१ 6सायद मै टुन्हकठे कुछ समयक लाग रहसेक्ठुँ, या हिउँदभर फे रहसेक्ठुँ। तबदोस्र मै जहाँ गैलसे फे टुह्र म्वार यात्रक लाग सहायता करसेक्ठो। 7अखिक पाली मै टुँहनसे एकघरी भेटघाट कैक चलजैना नाहीँ, यदि प्रभुक इच्छा रही कलसे, कुछ समय टुन्हकठे रना आशा कैरख्नु। 8तर पेन्तिकोस कना टिहारसम मै एफिससम रहकठुँ।#प्रे १९:८-१०#लेवी २३:१५-२१; व्य १६:९-११ 9म्वार विरोध करुइयन धेर जन रलसे फे प्रभुक महान कामक लाग एकदम असल मौका मिलल् बा।
10तिमोथी टुन्हकठे अइहीँ त, हुँकहीन मजासे स्वागतसत्कार करहो, काकरकि ऊ फे प्रभुक काम म्वारअस कर्टिबाट।#१ कोर ४:१७ 11हुँकहीन दुर्व्यवहार कर किहुह फे जिन देओ। ऊ और विश्वासी भैयन्हकसँग म्वारठे अइहीँ कैक मै आशा करटुँ। ऊ आइलगहीँ त, हुँकहीन शान्तिसे यात्रम पठैहो।
12आब भाइ अपोल्लोसक बारेम कुछ कहटुँ, मै हुँकहीन और विश्वासी भैयन्हकसँग टुन्हकठे भेटघाट कर जैहो कैक बिन्ती कर्नु, तर आब हुँकहीन टुन्हकठे अइना इच्छा नैलग्लन। पाछ मौका पैटीसाइट् ऊ टुन्हकठे अउइयाबाट।
13होसियार होक विश्वासम अर्यैल रहो। साहसी ओ बलगर होओ। 14ज्या काम कर्लसे फे, प्रेमम रह्क करो।
15टुह्र स्तिफनस ओ हुँकहार घरपरिवारक मनैन चिह्न्ठो। हुँक्र अखैयम रहलमध्ये सबसे सुरुक विश्वासीहुँक्र हुइट। हुँक्र परमेश्वरक मनैन सेवा पुगाइक लाग आपन जीवन देरख्ल। भैयौ, मै टुँहनसे बिन्ती करटुँ#१ कोर १:१६, 16असिन मनैन्हक कहल मानो। ओ अस्तह सेवा कर्ना औरजन्हक फे कहल मानो। 17स्तिफनास, फोर्टुनाटस ओ अखाइकस यिहाँ अइल त, मै धेर खुशी हुइनु, काकरकि टुह्र यिहाँ नैरहल ब्यालक सुनसानपना आब हेरारहल। 18हुँक्र टुँहन कराइलअस महीह फे उत्साहित करारख्ल। टुह्र असिन मनैन्हक आदर करपर्ठा।
आखिरी अभिवादन
19एशियम रहल मण्डलीहुँक्र टुँहन अभिवादन पठारख्ल। अकिलास ओ प्रिस्का ओ हुँकन्हक घरम रहल मण्डली प्रभुम टुँहन हार्दिक अभिवादन पठारख्ल।#प्रे १८:२ 20सब विश्वासीहुँक्र टुँहन अभिवादन पठारख्ल। एक-औरजहन पवित्र प्रेमले अभिवादन करहो।
21मै पावल, आपन हाँठले यी अभिवादन लिखटुँ।
22यदि कुई प्रभुह प्रेम नैकरट् कलसे, वाकरम सराप परहीँस्! हे हमार प्रभु, आई।
23प्रभु येशू ख्रीष्टक अनुग्रह टुन्हकसँग रह।
24ख्रीष्ट येशूम म्वार प्रेम टुह्र सबजन्हकसँग रह। आमेन।
Currently Selected:
१ कोरिन्थी 16: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
