१ कोरिन्थी 12
12
आत्मिक वरदान
1भैयौ, पवित्र आत्मक वरदानक बारेम मै टुँहन सत्य बात बुझल चाहटुँ। 2टुँहन थाहाँ बा, कि प्रभुम विश्वास नैकर्लरलहो त, टुह्र कौनो ना कौनो किसिमले बहकल रलहो ओ बहकलओर्से बोल्बो-बोल्बो नैकर्ना मूर्तिहुँकन पूजा करो। 3परमेश्वरक आत्मक अगुवाइम चल्ना मनै कुई फे येशूह सराप नैदेट, ओ पवित्र आत्मा केल हरेक मनैन येशू जो प्रभु हुइट कैक कह सेक्ना बनैठ।
4पवित्र आत्मक वरदान धेर किसिमक बा, तर वरदान देना पवित्र आत्मा एक्कठो बाट।#रोम १२:६-८ 5सेवा किसिम-किसिमक बा, तर हम्र एकठो प्रभुक सेवा कर्ठी। 6परमेश्वर विभिन्न तरिकाले काम कर्ठ, तर हमार सबजन्हक जीवनम काम करुइया त उह परमेश्वर हुइट।
7सबजन्हक भलाइ ह्वाए कैक हरेक मनैयह पवित्र आत्मक वरदान देगैल् बा। 8पवित्र आत्मा कौनोजहन बुद्धिमान सल्लाह देना वरदान देठ। उह पवित्र आत्मा कौनोजहन विशेष ज्ञानक वरदान देठ। 9उह पवित्र आत्मा कौनोजहन विश्वास कर्ना वरदान देठ। उह पवित्र आत्मा कौनोजहन रोग्याबेरम्हेन चोखैना वरदान देठ। 10उहाँ कौनोजहन अचम्म-अचम्मक काम कर्ना, कौनोजहन अगमवाणी बोल्ना, कौनोजहन आत्मा छुट्यैना, कौनोजहन विभिन्न किसिमक अन्यभाषा बोल्ना, कौनोजहन उ भाषक अर्थ खोल्ना वरदान देठ। 11यी सब उह एकठो पवित्र आत्मक काम हो। उहाँ आपन इच्छा अनुसार सबजहन फरक-फरक वरदान देठ।
एकठो शरीरम विभिन्न अङ्ग
12मनैयक शरीरम धेर अङ्ग बा। यी फरक-फरक अङ्ग मिल्क एकठो शरीर बनल बा। ख्रीष्टक शरीर फे अस्तह हो।#रोम १२:४-५ 13हम्र चाहा यहूदी चाहा ग्रीक रही, चाहा कमारा चाहा स्वतन्त्र रही, हम्र एकठो पवित्र आत्माद्वारा बप्तिस्मा पैलकओर्से एकठो शरीर होरली। ओ हम्र सबजन एकठो पवित्र आत्मा पारख्ली।
14काकरकि हमार शरीर एक्कठो अङ्गले बनल नैहो, तर धेर अङ्ग मिल्क बनल बा। 15यदि ग्वारा “मै हाँठ नैहुइटुँ, उहओर्से मै शरीरक अङ्ग नैहुइटुँ” कहल कलसे, का उ शरीरक अङ्ग नैहुइट् नि? 16ओ यदि कान “मै आँख नैहुइटुँ, उहओर्से मै शरीरक अङ्ग नैहुइटुँ” कहल कलसे, का उ शरीरक अङ्ग नैहुइट् नि? 17यदि सारा शरीर आँख रहट् कलसे, सुन्ना केहीँले? यदि सारा शरीर कान रहट् कलसे, सुँघ्ना केहीँले? 18तर परमेश्वर आपन इच्छा अनुसार शरीरम हरेक अङ्ग मिलाक ढैदेरख्ल। 19यदि सारा शरीर एक्कठो अङ्गले बनल रहट् कलसे, उ शरीर कसिन हुइनेरह? 20अङ्ग धेर बा, तर फे शरीर त एक्कठो बा।
21आँख हाँठह “महीह त्वार जरुरी नैहो” कैक कबु फे कह नैस्याकट्। ओसहेँक कपार ग्वारह “महीह त्वार जरुरी नैहो” कैक कबु फे कह नैस्याकट्। 22वास्तवम शरीरक कमजोर ओ कम महत्वपूर्ण मानजैना अङ्ग झन् आवश्यक पर्ठा। 23हम्र कम महत्व मानजैना अङ्गह झन् धेर आदर देठी। हम्र देखाइ नैमिल्ना अङ्गह झन् धेर वास्ता कर्ठी। 24तर देखाइ मिल्ना अङ्गक धेर वास्ता कर नैपरट्। कम महत्वपूर्ण मानजैना अङ्गह धेर वास्ता करपर्ना हिसाबले परमेश्वर हमार शरीरक सब अङ्ग मिलादेरख्ल। 25शरीरक सब अङ्ग मिल्क सँगसँग मजासे काम करक लाग, ओ एकठो अङ्ग और अङ्गक वास्ता करक लाग परमेश्वर यी कर्लह। 26यदि एकठो अङ्ग दुःख पाइल कलसे, शरीरक सारा अङ्ग दुःख पैठा। ओ यदि एकठो अङ्ग सम्मान पाइल कलसे, शरीरक सारा अङ्ग सँगसँग आनन्द मनैठ।
27टुह्र सबजन ख्रीष्टक शरीर हुइटो, ओ एक-एक जनजुन उह शरीरक अङ्ग हुइटो। 28परमेश्वर मण्डलीम असिक नियुक्त कैरख्ल: पैल्ह प्रेरित, द्वासर अगमवक्ता, तीसर शिक्षक, तबदोस्र अचम्मक काम कर्ना, बेराम मनैन चोखैना, सहायता कर्ना, प्रशासन चलैना, विभिन्न भाषा बोल्ना मनै नियुक्त कैरख्ल।#एफि ४:११ 29का सबजन प्रेरित हुइट? का सबजन अगमवक्ता हुइट? का सबजन शिक्षक हुइट? का सबजन अचम्मक काम कर्ठ? 30का सबजन बेराम मनैन चोखैठ? का सबजन विभिन्न भाषा बोल्ठ? का सबजन अन्यभाषक अर्थ ख्वालसेक्ठ? 31टुह्र उत्तम वरदान पाइक लाग इच्छा करपर्ठा।
आब मै वरदान प्रयोग कर्ना उत्तम तरिकक् बारेम टुँहन कहटुँ।
Currently Selected:
१ कोरिन्थी 12: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
