Zeremi 7
7
Naaŋmɩn na ìr'ɩ a bɛlɩ dem na de a ʋ yir k'ʋ ɩ nyãnyuwr sɔwlʋ zie a ƴãw
1A Sore tɩ ƴɛ̀r'ɩ a Zeremi zie à ŋá: 2Àr a Ŋmɩn-yir-kpɛ̃ɛ dɩ̃dɔr ƴãw, ɛ́ hieri a ƴɛ̀rʋ á ŋá a be: «Nyɩ bɛrɛ wone a Sore ƴɛ̀rʋ, a nyɩɩm Zuda tẽw nɩbɛ za na tuur a dɩ̃dɔr ŋa ƴãw kpɩɛr a ɩ̃ puoru a. 3À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: Nyɩ ɩ a nyɩ cenu nɩ a nyɩ ɩ-ɩrɩ a vɩɛl. Lɛ n'a ɩ̃ na tʋ̃ɔ́ bɛr nyɩ nyɩ kpɩɛr a tẽw ŋa. 4Nyɩ ta sàw bɛ̀lɛ nyɩ tʋɔra nɩ a ƴɛ̀rʋ á ŋá ɩ: “A ka n'ɩ a Sore yir! A Sore yir! A Sore yir a, a ka n'a.” 5Nyɩ nɩ̃ɛ ɩ a nyɩ cenu nɩ a nyɩ ɩ-ɩrɩ a vɩɛl dɔwlɩ. A nyɩ cara pʋɔ a, nyɩ mɩ́ ɩrɛ a lɛ-na-tu-sɔr-a. 6Nyɩ ta nɛbr a nʋʋra, a bi-kpieb, a pɔw-kʋɔr ɛ. Nyɩ bɛr a nɩbɛ na bɛ tɛr sãwna a kʋb a ka. Nyɩ ta tuur ŋmɩn-yoru a nyɩ faa ƴãw ɛ. 7Lɛ n'a ɩ̃ na bɛr nyɩ nyɩ kpɩɛr a zie ŋa pʋɔ, a tẽw ŋa ɩ̃ na tɩ kʋ̀ a nyɩ sãàkʋm-kore a koro kãw za nɩ kʋralɛ a.
8Ɛcɛ nyɩ bɛ̀lɛ nɩ nyɩ tʋɔra nɩ ƴɛ̀r-ziri na bɛ tɛr pɛr a. 9Ŋmɩŋmɩn za n'a nyɩ na zure, kʋrɛ, maalɛ pɩ̃ɔ-yele, pɔrɛ pɔ-ziri, maalɛ bagɛ kʋ̀rɛ a Báàl, zɔrɛ tuur ŋmɩn-yoru nyɩ na bɛ bãw a, 10ɛ́ a pùorí nyɩ wa a ɩ̃ niŋé, a yir ŋa ɩ̃ na so a pʋɔ, wa yere: “Tɩ nyɛ̃ nɩ faafʋ!” Ɛ́ cãà cow ɩrɛ a ɩ-faar á ŋá za? 11A yir ŋa ɩ̃ na so a, nyɩ de ʋ na k'ʋ ɩ nyãnyuwr sɔwlʋ zie ʋ#7:11 Nyãnyuwr sɔwlʋ zie: Nyɛ̃ Mat 21.13.? Mãa ƴãw a, ɩ̃ nyɛ̃ na kɛ́ lɛ n'a. A mãa Sore n'ʋ yel.
12Nyɩ cen a zi-sõw ɩ̃ na tɩ dãw tɛr a Silo#7:12 Nyɛ̃ 1Sa 1.3 nɩ a manʋ. a pʋɔ. Be n'a ɩ̃ tɩ dãw kpɩɛr. Nyɩ nyɛ̃ a lɛ ɩ̃ na ɩ ʋ a ɩ̃ nɩ-bʋʋrɛ Ɩsɩrayɛl ɩ-faar zũú a. 13Ɛcɛ ƴɛrɛŋa a, a mãa, a Sore, ɩ̃ yere na: nyɩ maal'ɩ faa mɛ̃ a bɛl a. Ɩ̃ kpaalɩ nyɩ nɩ lɛɛ tɩ bàl, ɛ́ nyɩ bɛ bɛr wõ ɩ, ɩ̃ bʋɔlɩ nyɩ na, ɛ́ nyɩ bɛ sàw ɛ. 14Nyɩ ƴãw nɩ a nyɩ tɩɛrʋ a Ŋmɩn-yir-kpɛ̃ɛ ŋa ƴãw. Mãa so ʋ, ɛ́ kʋ̀ nyɩ, nyɩɩm nɩ a nyɩ sãàkʋm-kore. A na ɩ à ŋá a, ɩ̃ na ɩ n a zie ŋa mɛ̃ a lɛ ɩ̃ na tɩ ɩ a Silo zi-sõw a. 15Ɩ̃ na diw nyɩ na bɛr nyɩ zãá nɩ mɛ̃, mɛ̃ a lɛ ɩ̃ na diw a nyɩ yɛbr, a Efarayim#7:15: A Efarayim n'ʋ tɩ ɩ a Ɩsɩrayɛl saa-pɛrɩ́-gʋba-lowr dɔwlʋ kpɛ̃ɛ. A ʋ yúor'ʋ bɛ tɩ de kʋ̀ a Ɩsɩrayɛl naalʋ-tẽw za. A Yeezu Kɩrɩta na bɛ tɩ wa sɛr a yome 721 vuo pʋɔ a, a naalʋ-tẽw ŋa tɩ bɔr'a. A ʋ bɔrʋ yome kʋba pùorí n'a a Zeremi tɩ lɩɛbɩ a naaŋmɩn-ƴɛ̀r-manɛ. tẽw dem a.»
Puoru Naaŋmɩn na kʋ̃ bɛr wõ a
16A fʋ̃ʋ Zeremi a, taa zɛlɛ bom kãw za a nɩbɛ bɛ ŋa vla ƴãw ɛ, taa puore bɩɩ lɔbr nuru a bɛ ƴãw ɛ, taa wa dɩ tuo bàlɛ fʋ tʋɔra a ɩ̃ zie ɩ, bʋ̃ʋ n'ʋ vɛ̃, ɩ̃ kʋ̃ bɛr wo b ɛ. 17Fʋ bɛ nyɛ̃ a lɛ za bɛ na ɩrɛ a Zuda tẽ-bɛrɛ pʋɔ nɩ a Zerizalɛm tẽw sɛ́ɛ pʋɔ a ɩ? 18A bibiir wobr'ɩ dali, a sãà mɩnɛ gbɔwr vũu, ɛ́ a pɔwbɛ nawr zɔ̃ kɛ́ bɛ maal'ɩ gato kʋ̀ a salom zu Pɔw-nãà#7:18 Salom zu Pɔw-nãà: A ŋmɩn-pɔw Ɩsɩtaar bɛ mɩ̀ na bʋɔlɛ Asɩtarte a n'ʋ.. Al pùorí bɛ dier divɛ̃ kʋ̀rɛ ŋmɩn-sãanbɛ, ɩrɛ a kpɩɛr mɛ̃. 19A Sore yere na: «Mãa n'ʋ bɛ ɩrɛ a kpɩɛr ɩ? Aɩ, a bɛl tɛɛ za nɛbɛ, ɛ́ a tɩ sɛw na k'aa ɩrɛ bɛ vĩ.»
20Al zũú, nyɛ̃ a lɛ a Sore Naaŋmɩn na yere a: «A ɩ̃ su-tʋlʋ kpãkpã na ìr'ɩ a tẽ-kpɛ̃ɛ ŋa ƴãw, a nɩsaalbɛ, a dʋn, a póru pʋɔ tɩɩr nɩ a bome a tẽsɔw na mɩ́ tɩr a ƴãw. Ʋ na ɩ na mɛ̃ vũu na dɩrɛ bɛ tɛr kpiiru daar a.»
Nɩ-bʋʋrɛ na bɛ bɛrɛ wone a bɛ Naaŋmɩn a
21À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: «Nyɩɩm tɛɛ za, nyɩ de a nyɩ nyɩw-a-za-bagɛ nɛnɛ ƴãw pʋɔ a nyɩ bàwr-yoru nɛn ƴãw 'wɔb#7:21 Naaŋmɩn mɩ́ tɩ so a nyɩw-a-za-bàwr bom za, alɛ so bɛ mɩ́ tɩ nyɩw a bàwr bom za cʋmɛcʋmɛ a bàwr-maal-kuur zu. A bàwr-yoru tɛwr bom kãw n'ʋ a nɩsaalbɛ mɩ́ tɩ tʋ̃ɔ́ 'wɔb. A Naaŋmɩn na yel kɛ́ bɛ de a nyɩw-a-za-bàwr nɛnɛ nɩ a bàwr-yoru nɛn 'wɔb a, ɩb'a ʋ ɩrɛ bɛ laar.! 22A lɛn daar ɩ̃ na ɩ a nyɩ sãàkʋm-kore bɛ yi a Eziptɩ tẽw a, ɩ̃ bɛ yel yel za kʋ̀ bɛ ɩ, ɩ̃ bɛ zɛlɩ a nyɩw-a-za-bàwr nɩ bàwr-yoru ɛ. 23À ŋá tɛwr'a ɩ̃ tɩ yel bɛ: “Nyɩ bɛrɛ wone a lɛ ɩ̃ na yere kʋ̀rɛ nyɩ a, ɩ̃ɩ na ɩ n Naaŋmɩn a nyɩ zie, ɛ́ nyɩ ɩ a ɩ̃ nɩbɛ. Nyɩ tuur a sɔ́r ʋl ɩ̃ na wule nyɩ a vla, ɛ́ nyɩ na wone nɩ nʋ̃ɔ̀.” 24Ɛcɛ bɛ bɛ bɛr wõ ɩ, bɛ bɛ cɛlɩ be ɩ, bɛ ɩ n lɛ bɛ na nɔnɛ a, a bɛ zu-kpɛ̃w-faa faa pʋɔ. Bɛ nãá lɩɛbɩ a bɛ niwn cɔw mɛ̃ a, bɛ bɛr'a ɛ́ lɩɛbɩ kpaar cɔw mɛ̃. 25A nyɩ sãàkʋm-kore na yi a Eziptɩ tẽw wa tɔ dɩ̃a a, bibir bɛ cɛ ɩ̃ bɛ tõ a ɩ̃ tõ-tõ-biir, a ɩ̃ ƴɛ̀r-manbɛ, a nyɩ zie ɩ. 26Ɛcɛ nyɩ bɛ bɛr wõ m ɛ, nyɩ bɛ cɛlɩ be ɩ, nyɩ ɩ n zu-kpɛ̃w ɩb. Nyɩ kpɛ n faa zuo a nyɩ sãàkʋm-kore.
27A fʋ̃ʋ Zeremi, fʋ na tɩ yel'ɩ à á ŋá za kʋ̀ bɛ, ɛ́ bɛ kʋ̃ bɛr wõ ɩ. Fʋ na tɩ bʋɔlɩ bɛ na, ɛ́ bɛ kʋ̃ sàw ɛ. 28A na ɩ à ŋá a, fʋ na yel bɛ na: “Nyɩ ɩ n a nɩ-bʋʋrɛ bɛl na bɛ bɛrɛ wone a Sore bɛ Naaŋmɩn a, nɩ-bʋʋrɛ na zawrɛ a ʋ wulu bɛrɛ a. A nyɩ zie a, a yel-mɩŋa kpi na, nɩr za bɛ cãà pore a ʋ yúor ɛ.”»
A kʋ-faa faa bà-fʋɔla
29A Sore yere na: «Zuda tẽw nɩbɛ ɛ,
nyɩ ŋma a nyɩ zukɔbr-wowr
na wule kɛ́ mãa so nyɩ a#7:29: Nyɛ̃ Sɔr-n 6.1-21 baa zuo a za a kan-nɛ́ɛ 5 sob tɩ ta a 9 sob..
Nyɩ lɔb a bɛr.
Nyɩ kone lãw-mʋɔlɛ a tãli-kpalɩ zu.
Nyɩ ɩ n nɩ-bʋʋrɛ na ɩ a ɩ̃ suur ìr a,
ɩ̃ bɛ lɛb bɔbr nyɩ ɛ,
ɩ̃ lɔbr nyɩ na bɛrɛ.»
30A Sore yere na: «Sɩza, a Zuda tẽw nɩbɛ ɩ n a ʋlɩ bom nɛ na bɛ vɩɛl a, a ɩ̃ zie. Bɛ bin nɩ a bɛ tɩb-faar faar a yir ŋa ɩ̃ na so a pʋɔ, dɛw ʋ bɛr. 31A Bɛn-Hinom fʋɔla#7:31: Nyɛ̃ 2.23 nɩ a manʋ. A be a, bibiir'a bɛ mɩ́ maal'ɩ a bagɛ. Nyɛ̃ Lev 18.21. pʋɔ a, bɛ maal'ɩ zi-tuo a Tafɛtɩ, kɛ́ bɛ mɩ́ nyɩw a bɛ bidɛbr nɩ a bɛ pɔwyaar maal'ɩ bagɛ. Ɛcɛ, ɩ̃ bɛ tɩ yel à ŋá towtow ɛ, ɩ̃ bɛ dãw tɛr a tɩɛrʋ ɛ.»
32A Sore yere na: «Bibie waar'a bɛ kʋ̃ mɩ́ cãà yel kɛ́ “Tafɛtɩ” bɩɩ “Bɛn-Hinom fʋɔla” ɩ. Ɛcɛ bɛ na mɩ́ yel'a kɛ́ “kʋ-vãvɩrɩ-taa fʋɔla.” A be n'a bɛ na ũùne a kũuni#7:32: A kũuni na ɩ n a zie ŋa ʋ tɛr dɛwr. Bɛ kʋ̃ mɩ́ tʋ̃ɔ́ maalɩ bàwr a zie ŋa pʋɔ ɩ, mɔ̃ mɩ̀ ŋmɩn-bɛlɛbɛlɛ bàwr kʋ̃ tʋ̃ɔ́ maalɩ a zie ŋa pʋɔ ɩ., a ũùfʋ zie na kʋ̃ cãà ka be a ƴãw. 33A nɩbɛ bɛ ŋa kũuni na lɩɛb'ɩ a sidume nɩ a gbõgbo-cili bʋ̃-dɩrɩ, ɛ́ nɩr za kʋ̃ be be mɩ́ diw a bɛr ɛ! 34A Zuda tẽ-bɛrɛ pʋɔ nɩ a Zerizalɛm tẽw sɛ́ɛ zu a, ɩ̃ na ɩ na a cuwr gɔmɛ, a nʋ̃ɔ̀ cɛlsɩ nɩ a dɛb-sãan nɩ a pɔw-sãan yielu tɛw, bʋ̃ʋ n'ʋ vɛ̃, a tẽw na ɩ n deboru gã.»
Currently Selected:
Zeremi 7: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
Zeremi 7
7
Naaŋmɩn na ìr'ɩ a bɛlɩ dem na de a ʋ yir k'ʋ ɩ nyãnyuwr sɔwlʋ zie a ƴãw
1A Sore tɩ ƴɛ̀r'ɩ a Zeremi zie à ŋá: 2Àr a Ŋmɩn-yir-kpɛ̃ɛ dɩ̃dɔr ƴãw, ɛ́ hieri a ƴɛ̀rʋ á ŋá a be: «Nyɩ bɛrɛ wone a Sore ƴɛ̀rʋ, a nyɩɩm Zuda tẽw nɩbɛ za na tuur a dɩ̃dɔr ŋa ƴãw kpɩɛr a ɩ̃ puoru a. 3À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: Nyɩ ɩ a nyɩ cenu nɩ a nyɩ ɩ-ɩrɩ a vɩɛl. Lɛ n'a ɩ̃ na tʋ̃ɔ́ bɛr nyɩ nyɩ kpɩɛr a tẽw ŋa. 4Nyɩ ta sàw bɛ̀lɛ nyɩ tʋɔra nɩ a ƴɛ̀rʋ á ŋá ɩ: “A ka n'ɩ a Sore yir! A Sore yir! A Sore yir a, a ka n'a.” 5Nyɩ nɩ̃ɛ ɩ a nyɩ cenu nɩ a nyɩ ɩ-ɩrɩ a vɩɛl dɔwlɩ. A nyɩ cara pʋɔ a, nyɩ mɩ́ ɩrɛ a lɛ-na-tu-sɔr-a. 6Nyɩ ta nɛbr a nʋʋra, a bi-kpieb, a pɔw-kʋɔr ɛ. Nyɩ bɛr a nɩbɛ na bɛ tɛr sãwna a kʋb a ka. Nyɩ ta tuur ŋmɩn-yoru a nyɩ faa ƴãw ɛ. 7Lɛ n'a ɩ̃ na bɛr nyɩ nyɩ kpɩɛr a zie ŋa pʋɔ, a tẽw ŋa ɩ̃ na tɩ kʋ̀ a nyɩ sãàkʋm-kore a koro kãw za nɩ kʋralɛ a.
8Ɛcɛ nyɩ bɛ̀lɛ nɩ nyɩ tʋɔra nɩ ƴɛ̀r-ziri na bɛ tɛr pɛr a. 9Ŋmɩŋmɩn za n'a nyɩ na zure, kʋrɛ, maalɛ pɩ̃ɔ-yele, pɔrɛ pɔ-ziri, maalɛ bagɛ kʋ̀rɛ a Báàl, zɔrɛ tuur ŋmɩn-yoru nyɩ na bɛ bãw a, 10ɛ́ a pùorí nyɩ wa a ɩ̃ niŋé, a yir ŋa ɩ̃ na so a pʋɔ, wa yere: “Tɩ nyɛ̃ nɩ faafʋ!” Ɛ́ cãà cow ɩrɛ a ɩ-faar á ŋá za? 11A yir ŋa ɩ̃ na so a, nyɩ de ʋ na k'ʋ ɩ nyãnyuwr sɔwlʋ zie ʋ#7:11 Nyãnyuwr sɔwlʋ zie: Nyɛ̃ Mat 21.13.? Mãa ƴãw a, ɩ̃ nyɛ̃ na kɛ́ lɛ n'a. A mãa Sore n'ʋ yel.
12Nyɩ cen a zi-sõw ɩ̃ na tɩ dãw tɛr a Silo#7:12 Nyɛ̃ 1Sa 1.3 nɩ a manʋ. a pʋɔ. Be n'a ɩ̃ tɩ dãw kpɩɛr. Nyɩ nyɛ̃ a lɛ ɩ̃ na ɩ ʋ a ɩ̃ nɩ-bʋʋrɛ Ɩsɩrayɛl ɩ-faar zũú a. 13Ɛcɛ ƴɛrɛŋa a, a mãa, a Sore, ɩ̃ yere na: nyɩ maal'ɩ faa mɛ̃ a bɛl a. Ɩ̃ kpaalɩ nyɩ nɩ lɛɛ tɩ bàl, ɛ́ nyɩ bɛ bɛr wõ ɩ, ɩ̃ bʋɔlɩ nyɩ na, ɛ́ nyɩ bɛ sàw ɛ. 14Nyɩ ƴãw nɩ a nyɩ tɩɛrʋ a Ŋmɩn-yir-kpɛ̃ɛ ŋa ƴãw. Mãa so ʋ, ɛ́ kʋ̀ nyɩ, nyɩɩm nɩ a nyɩ sãàkʋm-kore. A na ɩ à ŋá a, ɩ̃ na ɩ n a zie ŋa mɛ̃ a lɛ ɩ̃ na tɩ ɩ a Silo zi-sõw a. 15Ɩ̃ na diw nyɩ na bɛr nyɩ zãá nɩ mɛ̃, mɛ̃ a lɛ ɩ̃ na diw a nyɩ yɛbr, a Efarayim#7:15: A Efarayim n'ʋ tɩ ɩ a Ɩsɩrayɛl saa-pɛrɩ́-gʋba-lowr dɔwlʋ kpɛ̃ɛ. A ʋ yúor'ʋ bɛ tɩ de kʋ̀ a Ɩsɩrayɛl naalʋ-tẽw za. A Yeezu Kɩrɩta na bɛ tɩ wa sɛr a yome 721 vuo pʋɔ a, a naalʋ-tẽw ŋa tɩ bɔr'a. A ʋ bɔrʋ yome kʋba pùorí n'a a Zeremi tɩ lɩɛbɩ a naaŋmɩn-ƴɛ̀r-manɛ. tẽw dem a.»
Puoru Naaŋmɩn na kʋ̃ bɛr wõ a
16A fʋ̃ʋ Zeremi a, taa zɛlɛ bom kãw za a nɩbɛ bɛ ŋa vla ƴãw ɛ, taa puore bɩɩ lɔbr nuru a bɛ ƴãw ɛ, taa wa dɩ tuo bàlɛ fʋ tʋɔra a ɩ̃ zie ɩ, bʋ̃ʋ n'ʋ vɛ̃, ɩ̃ kʋ̃ bɛr wo b ɛ. 17Fʋ bɛ nyɛ̃ a lɛ za bɛ na ɩrɛ a Zuda tẽ-bɛrɛ pʋɔ nɩ a Zerizalɛm tẽw sɛ́ɛ pʋɔ a ɩ? 18A bibiir wobr'ɩ dali, a sãà mɩnɛ gbɔwr vũu, ɛ́ a pɔwbɛ nawr zɔ̃ kɛ́ bɛ maal'ɩ gato kʋ̀ a salom zu Pɔw-nãà#7:18 Salom zu Pɔw-nãà: A ŋmɩn-pɔw Ɩsɩtaar bɛ mɩ̀ na bʋɔlɛ Asɩtarte a n'ʋ.. Al pùorí bɛ dier divɛ̃ kʋ̀rɛ ŋmɩn-sãanbɛ, ɩrɛ a kpɩɛr mɛ̃. 19A Sore yere na: «Mãa n'ʋ bɛ ɩrɛ a kpɩɛr ɩ? Aɩ, a bɛl tɛɛ za nɛbɛ, ɛ́ a tɩ sɛw na k'aa ɩrɛ bɛ vĩ.»
20Al zũú, nyɛ̃ a lɛ a Sore Naaŋmɩn na yere a: «A ɩ̃ su-tʋlʋ kpãkpã na ìr'ɩ a tẽ-kpɛ̃ɛ ŋa ƴãw, a nɩsaalbɛ, a dʋn, a póru pʋɔ tɩɩr nɩ a bome a tẽsɔw na mɩ́ tɩr a ƴãw. Ʋ na ɩ na mɛ̃ vũu na dɩrɛ bɛ tɛr kpiiru daar a.»
Nɩ-bʋʋrɛ na bɛ bɛrɛ wone a bɛ Naaŋmɩn a
21À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: «Nyɩɩm tɛɛ za, nyɩ de a nyɩ nyɩw-a-za-bagɛ nɛnɛ ƴãw pʋɔ a nyɩ bàwr-yoru nɛn ƴãw 'wɔb#7:21 Naaŋmɩn mɩ́ tɩ so a nyɩw-a-za-bàwr bom za, alɛ so bɛ mɩ́ tɩ nyɩw a bàwr bom za cʋmɛcʋmɛ a bàwr-maal-kuur zu. A bàwr-yoru tɛwr bom kãw n'ʋ a nɩsaalbɛ mɩ́ tɩ tʋ̃ɔ́ 'wɔb. A Naaŋmɩn na yel kɛ́ bɛ de a nyɩw-a-za-bàwr nɛnɛ nɩ a bàwr-yoru nɛn 'wɔb a, ɩb'a ʋ ɩrɛ bɛ laar.! 22A lɛn daar ɩ̃ na ɩ a nyɩ sãàkʋm-kore bɛ yi a Eziptɩ tẽw a, ɩ̃ bɛ yel yel za kʋ̀ bɛ ɩ, ɩ̃ bɛ zɛlɩ a nyɩw-a-za-bàwr nɩ bàwr-yoru ɛ. 23À ŋá tɛwr'a ɩ̃ tɩ yel bɛ: “Nyɩ bɛrɛ wone a lɛ ɩ̃ na yere kʋ̀rɛ nyɩ a, ɩ̃ɩ na ɩ n Naaŋmɩn a nyɩ zie, ɛ́ nyɩ ɩ a ɩ̃ nɩbɛ. Nyɩ tuur a sɔ́r ʋl ɩ̃ na wule nyɩ a vla, ɛ́ nyɩ na wone nɩ nʋ̃ɔ̀.” 24Ɛcɛ bɛ bɛ bɛr wõ ɩ, bɛ bɛ cɛlɩ be ɩ, bɛ ɩ n lɛ bɛ na nɔnɛ a, a bɛ zu-kpɛ̃w-faa faa pʋɔ. Bɛ nãá lɩɛbɩ a bɛ niwn cɔw mɛ̃ a, bɛ bɛr'a ɛ́ lɩɛbɩ kpaar cɔw mɛ̃. 25A nyɩ sãàkʋm-kore na yi a Eziptɩ tẽw wa tɔ dɩ̃a a, bibir bɛ cɛ ɩ̃ bɛ tõ a ɩ̃ tõ-tõ-biir, a ɩ̃ ƴɛ̀r-manbɛ, a nyɩ zie ɩ. 26Ɛcɛ nyɩ bɛ bɛr wõ m ɛ, nyɩ bɛ cɛlɩ be ɩ, nyɩ ɩ n zu-kpɛ̃w ɩb. Nyɩ kpɛ n faa zuo a nyɩ sãàkʋm-kore.
27A fʋ̃ʋ Zeremi, fʋ na tɩ yel'ɩ à á ŋá za kʋ̀ bɛ, ɛ́ bɛ kʋ̃ bɛr wõ ɩ. Fʋ na tɩ bʋɔlɩ bɛ na, ɛ́ bɛ kʋ̃ sàw ɛ. 28A na ɩ à ŋá a, fʋ na yel bɛ na: “Nyɩ ɩ n a nɩ-bʋʋrɛ bɛl na bɛ bɛrɛ wone a Sore bɛ Naaŋmɩn a, nɩ-bʋʋrɛ na zawrɛ a ʋ wulu bɛrɛ a. A nyɩ zie a, a yel-mɩŋa kpi na, nɩr za bɛ cãà pore a ʋ yúor ɛ.”»
A kʋ-faa faa bà-fʋɔla
29A Sore yere na: «Zuda tẽw nɩbɛ ɛ,
nyɩ ŋma a nyɩ zukɔbr-wowr
na wule kɛ́ mãa so nyɩ a#7:29: Nyɛ̃ Sɔr-n 6.1-21 baa zuo a za a kan-nɛ́ɛ 5 sob tɩ ta a 9 sob..
Nyɩ lɔb a bɛr.
Nyɩ kone lãw-mʋɔlɛ a tãli-kpalɩ zu.
Nyɩ ɩ n nɩ-bʋʋrɛ na ɩ a ɩ̃ suur ìr a,
ɩ̃ bɛ lɛb bɔbr nyɩ ɛ,
ɩ̃ lɔbr nyɩ na bɛrɛ.»
30A Sore yere na: «Sɩza, a Zuda tẽw nɩbɛ ɩ n a ʋlɩ bom nɛ na bɛ vɩɛl a, a ɩ̃ zie. Bɛ bin nɩ a bɛ tɩb-faar faar a yir ŋa ɩ̃ na so a pʋɔ, dɛw ʋ bɛr. 31A Bɛn-Hinom fʋɔla#7:31: Nyɛ̃ 2.23 nɩ a manʋ. A be a, bibiir'a bɛ mɩ́ maal'ɩ a bagɛ. Nyɛ̃ Lev 18.21. pʋɔ a, bɛ maal'ɩ zi-tuo a Tafɛtɩ, kɛ́ bɛ mɩ́ nyɩw a bɛ bidɛbr nɩ a bɛ pɔwyaar maal'ɩ bagɛ. Ɛcɛ, ɩ̃ bɛ tɩ yel à ŋá towtow ɛ, ɩ̃ bɛ dãw tɛr a tɩɛrʋ ɛ.»
32A Sore yere na: «Bibie waar'a bɛ kʋ̃ mɩ́ cãà yel kɛ́ “Tafɛtɩ” bɩɩ “Bɛn-Hinom fʋɔla” ɩ. Ɛcɛ bɛ na mɩ́ yel'a kɛ́ “kʋ-vãvɩrɩ-taa fʋɔla.” A be n'a bɛ na ũùne a kũuni#7:32: A kũuni na ɩ n a zie ŋa ʋ tɛr dɛwr. Bɛ kʋ̃ mɩ́ tʋ̃ɔ́ maalɩ bàwr a zie ŋa pʋɔ ɩ, mɔ̃ mɩ̀ ŋmɩn-bɛlɛbɛlɛ bàwr kʋ̃ tʋ̃ɔ́ maalɩ a zie ŋa pʋɔ ɩ., a ũùfʋ zie na kʋ̃ cãà ka be a ƴãw. 33A nɩbɛ bɛ ŋa kũuni na lɩɛb'ɩ a sidume nɩ a gbõgbo-cili bʋ̃-dɩrɩ, ɛ́ nɩr za kʋ̃ be be mɩ́ diw a bɛr ɛ! 34A Zuda tẽ-bɛrɛ pʋɔ nɩ a Zerizalɛm tẽw sɛ́ɛ zu a, ɩ̃ na ɩ na a cuwr gɔmɛ, a nʋ̃ɔ̀ cɛlsɩ nɩ a dɛb-sãan nɩ a pɔw-sãan yielu tɛw, bʋ̃ʋ n'ʋ vɛ̃, a tẽw na ɩ n deboru gã.»
La Bible en Dagara © Alliance Biblique du Burkina Faso, 2013.