Vafilipi 1
1
1Paulo na Timoteo, vakumba vamwa Kristo Yesu, ku vasondo vose vamwa Kristo Yesu, hovene valimo mu Filipi, hamohene na vasimamizi na vatumami. 2Kisa kiveho hamohene ninwe, na kuhola kwa Mulungu, Vava wiswe, na Guku Yesu Kristo!
3Kila itungo ndimwuzukila inwe, ndimulumbila Mulungu wane, 4na mu kila kulomba kwane ndimulombela 5inwe vose ha kudeha, kunguno ya lusangi lwinwe lwa kuyisambazya Mhola ya Chelu vukumbu na lusiku lwa mbele kusika lelo. 6Kunguno ndisanizya ati mwenuyo homwene wavukizaja mulimo musoga muwinwe akugumalizya kusika lusiku lwa Yesu Kristo. 7Na yilivela kuwane kusanizya yeniyi kunguno yinwe vose, kunguno inwe mulimo mu moyo gwane henaho mu kifungo chane kunguno ya kuyilindila na kuyikindika Mhola ya Chelu, muli na lusangi hamohene nane mugati na kisa. 8Kwisi Mulungu ali musangilwaho wane, isyo ndimukumbula inwe vose mugati na kutogwa kusoga kwamwa Yesu. 9Na ndimulomba yeniyi: kutogwa kwinwe kukule kingi munogwene mu ngelo na mu 10vumanicha vose, kigele mumaniche tusoga, kigele muve na moyo gwa pe na vuduhu kimelo kusika lusiku lwamwa Kristo mokaziwe na kisumo cha vugololoku, 11hochene kiligela mugati na Yesu Kristo, ha lukumo na ikuzyo lya Mulungu.
12Vadugu, ndikova mumaniche ati, genayo gankwililaga gagwasaja kuyisambazya Mhola ya Chelu. 13Yigelaga vuliko ku valindilizi vose mu numba ya Serikali na ku vose vangi vene ati, ndi mutungwa kunguno yamwa Kristo. 14Na hangi kunguno ya vutungwa wane vadugu vingi mugati na kumusanizya Guku, vapivagwa vugimu kugutanizya muhayo gwa Mulungu vuduhu kogoha kukila hambele. 15Ahene, vamo valiyitanizya mhola yamwa Kristo kunguno yʼivuva na 16lwanilo, alisi vangi na moyo gwa pe, navo valita sisyo mugati na kutogwa, vamanikizye ati ndiho henaha kunguno ya kuyilindila Mhola ya Chelu. 17Alisi avo valiyitanizya mhola yamwa Kristo kunguno yʼivuva, na ngʼo na moyo gwa pe, na valiloma kongezya vutimbu ku vutungwa wane. 18Ahene, kuduhu muhayo. Sumbwa ha mitindo yose, mugati na vugulumi ninga mugati na hanayene, mhola yamwa Kristo yilitaniziwa, na kunguno yeniyi ndideha. 19Hangi nkudeha, kwisi ndimanicha ati yeniyi yikunifikila ha vupiziwa wane kunguno ya kulombela kwinwe na vugwasya wa Roho ya Yesu Kristo. 20Kwenuku kuli kutamanilwa kwane na isigizyo lyane ati nene kupondwa ngʼo nsoni mugati na muhayo gumo, alisi mugati na vugimu vose, kitisi nsiku zyose, isyo lelo, Kristo akukumukiwa mugati na muvili gwane: mugati na vuzuvuku wane, ninga mugati na kufwa kwane.
21Kwisi kuwane kuzuvuka kuli Kristo, na kufwa kuli vusulu. 22Alisi ulu kuzuvuka mu muvili kulindetela kisumo, haho nkamanikizye icho nalahe, alisi ndifitwa 23mu moyo na mihayo iyi ivili: nditogwa kudahya moyo na kuvi hamohene na Kristo, kwisi yeniyi yikuvi 24sisoga munogwene; alisi kudila mu muvili yilifundwa muno kunguno yinwe. 25Na ndisigizya ati nkwikalaho henaha na nkudilaho hamohene ninwe vose, kigele inwe mutongele na mudehe mugati nʼisanizyo; na 26kwikumilizya kwinwe kunguno yane kukwile mugati na Kristo Yesu, ulu nasika hangi mugati ninwe.
27Musimize duhu kitisi yiligelanila na Mhola ya Chelu yamwa Kristo, kigele, ulu niza kumuvona inwe, ninga ndi haduhu, nigwe yeniyi duhu ati mulimila kijamu mu roho yimo, na muliyilasanila na moyo gumo Mhola ya Chelu vuduhu kukangwa na muhayo gumo na vakandi; 28kwisi yeniyi kuwavo lumeho lwa vuzimile, alisi kuwinwe lumeho lwa vupiziwa, nalo lwafuma kumwa Mulungu, 29Kwisi kunguno yamwa Kristo inwe mwapivagwa, ngʼo kumusanizya duhu, sumbwa kudukiwa savasava kunguno yakwe, 30na mulimo mu vulugu wenuvu wene kitisi mwawine navagimo nene, na kitisi muligwa lelo ati ntali ndimo.
Currently Selected:
Vafilipi 1: Nym51
Highlight
Copy
Compare
Share
Want to have your highlights saved across all your devices? Sign up or sign in
Nyamwezi New Testament © Bible Society of Tanzania, 1951.
