Vagalatia 1
1
1Paulo, mutume—alisi akafumile ku vanhu, ninga akatumizivilwe ngʼo na munhu, sumbwa na Yesu Kristo na Mulungu Vava, homwene wamuhembukizye 2uyo ku lufu—na vadugu vose hovene valiho hamohene 3na nene, ku mavilingano ga mu Galatia. Kisa kive hamohene ninwe na kuhola hokwene kulifuma kumwa 4Mulungu Vava na Guku wiswe Yesu Kristo, homwene wipanaga mwenekili kunguno ya mavukenaguzi giswe, kigele atukomole iswe ku liwelelo lyenili ivi lya hagisi 5hanuma na kikowa cha Mulungu Vava wiswe, homwenuyu apiwe lukumo kusika myaka na myaka de. Amen.
6Ndikumya ati inwe mulilekana wangu na mwenuyo homwene wamwitanaga inwe na kisa chamwa Kristo na mulipiluka ku mhola ya chelu ya mutindo gungi, 7kwisi mhola yingi ya chelu haduhu; sumbwa valiho vamo hovene valimutavanya inwe na valikova kuyipilula Mhola ya Chelu ya Kristo. 8Alisi ulu iswe, ninga malaika wa mwilunde akumutanizya inwe mhola ya chelu hoyene yililekana na iyo twamutanizaja inwe, 9mwenuyu afwizilwe! Navombaga hambele, na ndisyokelezya hangi: ulu umo alimutanizya inwe mhola ya chelu hoyene yililekana na iyo hoyene mwayanukulile, 10mwenuyu afwizilwe! Kinahe, ndikova lelo kuvityamilizya vanhu, ninga Mulungu? Ninga ndikova kuvatogezya vanhu? Ulu ntali ndikova kuvatogezya vanhu, sanga nene nkavile hangi mukumba wamwa Kristo.
11Ndimuwila inwe vadugu ati, Mhola ya Chelu hoyene yatanizivilwe na nene yikafumile ku vanhu. 12Kwisi nene mwene nkayipivilwe na vanhu, ninga nkahembekilwe yeniyi, sumbwa nafumbulilagwa na Kristo Yesu. 13Kwisi inwe mwigilwe kunguno ya kisimizile chane cha kale mugati na dini ya kiyahudi, kitisi najamaga muno kuliducha ivilingano lya Mulungu na kulikenagula. 14Hangi mu dini ya kiyahudi navakilaga vichane va musimo gwane mwigongo lyane, kunguno nagangadikaga munogwene mugati na fitilwe fya vahenga vane. 15Alisi Mulungu homwene wambagulaga kufuma munda yamwa mayu na wanitanaga mugati na kisa chakwe, 16aho watogagwa kumufumbula Mwana wakwe mugati na nene, kigele navatanizye vapagani Mhola yakwe ya Chelu, itungo lyenilo nkitozizye ninga na munhu umo ngʼo, 17ninga nkajile ku Yerusalema ku venavo hovene vavagi vatume hambele na nene, sumbwa najaga ku Arabia, na haho nasyokaga ku Damasko. 18Haho hanuma na myaka idatu najaga ku Yerusalema kwimanicha na Kefa, na nadilaga hawakwe nsiku ikumi nʼitano; 19alisi nkamuwine mutume ungi sumbwa Yakobo, muduguye wamwa Guku. 20Kunguno ya genaya ndimutonela inwe, lolagi, Mulungu alimanicha, nkavile kuyomba vulamba. 21Haho najaga ku lwande lwa Siria na Kilikia. 22Alisi navagi nkamanikizivilwe ku vusyu na mavilingano gamwa Kristo mu Uyahudi, 23sumbwa vigagwa duhu kitisi yayombagwa: Mwenuyo watudukaje kale alitanizya lelo isanizyo lyenilo walikanage kale. 24Na venavo vamukuzaja Mulungu kunguno ya nene.
Currently Selected:
Vagalatia 1: Nym51
Highlight
Copy
Compare
Share
Want to have your highlights saved across all your devices? Sign up or sign in
Nyamwezi New Testament © Bible Society of Tanzania, 1951.
