ISAYA 38

Mangyi Esekia allwaa kyuumu na ishya lyakwe

(2 Vam 20:1-11; 2 Fye 32:24-26)

1Nalyo kyeeri yekyo mangyi Esekia kalwaa kyuumu, kafika ando a ifwa, nawe Isaya mwauya fisuku, mwana wa Amosi keenda kammbya, “Nndumi Iruva mmbo aamba indi, songosya mbony ta mmba yafo mashika ifwa ni kuti kufwe, nta nkushekyaafo.”

2Naasa Esekia ekiita indo, keenduta kisangu kyakwe isimambeny katereva Iruva, 3kaamba, “Woi Nndumi Iruva kummbwa shakutereva, shaasa shileenda mbee yafo na wiindi, shilekwiindya kya dede na nrima moose, shatana mesha mbee ya usangu lwafo.” Esekia kaiya kyuumu.

4Kirero kya Nndumi Iruva kikasheya nkisuku Isaya kyeamba; 5“Enda kwandevia Esekia, Nndumi Iruva wa Davidi, ndoo, aamba indi, shamiita fiterewo fyafo na shalollya misoru yafo; lola shishekwengeryaa suku tafo ando a myaaka ikumi na iraanu. 6Na yeny mmbo shishekuringaa yewe na muri yeu shishekuuta maakony a mangyi ya Ashuru. 7Na elu llo wende lusheukaa kwa Nndumi Iruva kyeora sheelyi Nndumi Iruva ashetanaa shaasa aamba. 8Lola kirishe kishewuyaa numa marende ikumi, alya fitereny filya fyesongosyony mangyi Ahasi.” Kirishe mmbo kikawuya numa marende ikumi kyuuka alya kyeendesa kyemfika.

9Na yaandi nng'u marero a Esekia, mangyi ya Yuda kyeeri alemaa ishia. 10Mmbo shileamba mikonu ya ikaa na muu yammesya. Shammeimwa mwengero wa mikonu yakwa. 11Shaamba nshishelollya-se Nndumi Iruva wakwa efo muriny wa vandu veefo na muu-fo. Nshishelollyaa-se nndu wa vandu na ewo vakee ulaniny-fo. 12Kirembo kyakwa kyammamitwa deny; kikaipowa sha yeema lya mwiisa findo; muu wakwa ukakushwa-kushwa sha nndu afuma isara. Shaerwa efo amwi na kitara uka nsanyiny fika kio vashimae. 13Shafiira shiiruuya weekyi kutani kwakya sha miiso idinaa na ipapara maffwa akwa, ukya nsanyiny kutani kwafika kio kashifita ufishyony. 14Nshileiya sha ndeye na ikapa kiiyo sha mbeta, shainuya miso akwa uwe kutani shaaraa. Woi nndumi Iruva shanlamyo, osho kushesheekya, kuve ngarami yakwa. 15A shaambe inda? We muni ammeamba, na we muni ammetana indo. Shishendaa mbee yakwe na waarya myaaka yakwa myoose kimaruma kya mavavyo a nrima wakwa. 16Woi Nndumi Iruva ni yewe kukee uwe ya findo fyoose fiifo na muu; ni yewe kuleshishiisaa na ishivirya muu. 17Lola shetiri mavavyo moomu kimaruma kya itura ufoo kya indi kya ikunda lyafo kwashikira na ishuuta ufuny. Mashika mmbo kuleshifwaaya kya ulyamari lwakwa loose. 18Mashika efo ando a vafu mmbashidimaa ikwiitikisa-fo nta ufu nlushidimaa ikurumisha-fo. Valya vakee ireka mmbashiidimaa imanya dede yafo-fo. 19Ulya akee na muu, eeda ulya akee na muu niwe ashekuitikisaa sha yeny enu. Vandeye veru vashemanyisyaa vana dede yafo. 20Nndumi Iruva akee ishikira yeny. Naasa lwiimbye Nndumi Iruva fiimbo fyeru mikonu myoose ya muu weru efo mmba ya Nndumi Iruva.

21Mashika Isaya ammaamba naasany uteny nkate wa ntini muvike yoo yuureny nawe asheshyaa. 22Lyingyi-se Esekia emmaamba, “A kwiifo wende-kyi lwa ishoora sheelyi shisheangaa-se na efo mmba ya Nndumi Iruva.”

Currently Selected:

ISAYA 38: MAS2

Highlight

Copy

Compare