ISAYA 37

Mangyi Esekia atereva wiikimbi lwa Isaya

(2 Vam 19:1-7)

1Nalyo mangyi Esekia ekiita marero allya karandwa soori takwe, karaa makunnya, kaanga na efo mmba ya Nndumi Iruva. 2Karuma Eliakimu eto ekee mwiisalallya mmba na Shebna, mwireiya, vandevia vaniini va vakohani varee soori ta makunnya, veende kwa mwaawuya fisuku, we Isaya mwana wa Amosi, 3vakammbia, mangyi Esekia aamba, “Yeu ni nkonu wa ukiva, nkonu wa isutwa na yaararo ni mwana akundye iirwa, kya indi kwiifo finya ya imwiira-fo. 4Kungyi Nndumi Iruva asheitaa marero yoo nsongoru wa vasikari wa mangyi ya Ashuru alerumwa naarare nafyo Iruva eefo na muu, na Nndumi Iruva wafo asheekennyaa marero yoo aleita, fuuya Nndumi Iruva kya efyo filesaau.”

5Naasa vandu va mangyi Esekia vakaenda kwa Isaya. 6Isaya kavavia, “Vieny nndumi waany marero yaa; Nndumi Iruva aamba, nta kulairyee kimaruma kya marero a mangyi ya Ashuru, alya a ishaarara kuleitya-fo. 7Lola shishevikaa mumuyo nnang'ani yakwe nawuye na urukeny lwakwe muni nalyo ashewaawa na usu efo kwakwe.”

Vaashuru vengera iruma rumi ya weeresi

(2 Vam 19:8-19)

8Naasa Rapishake nsongoru ulya wa Ashuru kawuya kakooya mangyi ulya ekabanaa efo Libna kimmba enkwiipoo efo kakyillya Lakishi. 9Mangyi ya Ashuru keeta mbony ta Tirhaka sheelyi mangyi ya Esopia akee shia ikabana nawe. Karuma vandu vandevia Esekia kyeamba, 10“Lola nndu nalakulembe kukusurye Nndumi Iruva wafo. Yerusalemu ni kuti uvikwa maakony a mangyi ya Ashuru. 11Shilla kwammiita mbony takwa shaasa shantannya miri miingyi na iimamita deny. A ndesa yewe kushekyaa? 12A ndesa maruva a vandu va masanga valya vande vakwa valevamamita mmbo valekya Gohasi na Haran, na Resefu na vana va Adini valya vekee Telasari? 13Nkwi akai mangyi ya Hamati na mangyi ya Apadi mangyi ya muri wa Sefarvaimu, Hena na Iva?”

14Naasa Esekia kawarya nnrumi yeyo, ekimaa kaanga na mmba ya Nndumi Iruva, kaororwa mareiyo alya, katereva Nndumi Iruva eshambaa; 15na Esekia katereva Nndumi Iruva: 16“Woi Nndumi Iruva muni matorito, Iruva wa Israeli kukee uwe ya vaserafi, ni yewe kumuni Iruva, mangyi ya vamangyi va ulana loose. Ni yewe kuleumba ngina na uruka. 17Loota kuri woi Nndumi Iruva kwaaranyi, lola woi Nndumi Iruva kulolye, kwiitye marero a Senakeribu aleende naambo naarare Nndumi Iruva eefo na muu. 18Ni kya dede mangyi ya Ashuru alerumata miri miingyi, 19na imamita maruva awo na muro kimmba kulaore ekee Iruva, kya indi ekee mashora a maako a vandu; ekee ni miri na mawe nkyo kimaruma akarumatwa. 20Naasa woi Nndumi Iruva, Iruva weeru, lukire efo maakony afo; mangyi toose ta ulana tiite na imanya sheelyi yewe ni Nndumi Iruva kumuni nta kulaifo ungyi.”

Viikimbi lwa Isaya kwa Mangyi

(2 Vam 19:20-37)

21Llyo Isaya mwana wa Amosi karika mbony kwa Esekia kyeamba, “Nndumi Iruva, Iruva wa Israeli aamba endi: Kimmba kwashitereva kya Senakeribu mangyi ya Ashuru, 22irero arera Nndumi Iruva kyafo ni ekyi, sambura ya Sayuni ishekuteendaa, ishekwiinyala nnu. Sambura ya Yerusalemu ikee irinisa nrwe kimaruma kyafo.” 23A ni vi alemwaarara na insakira. Nkukeinwa miso afo na unyanga lwafo kwa vi? Ni uwe kwa mweele wa Israeli. 24Kulearara Nndumi wafo kwa mashinga afo kwepala kwaamba, kya mitika akwa shansaama uwe ya ifumbu kutani shafika nnang'ani ya Lebanoni na yeny shishemanyaa mieresi myaasha na ubanu myaasha na yeny mmbo nsheangaa na kwakwe ando eele, kwaasha nnu, nrema yakwe ivesye nnu deny. 25Shansuma kirori na ina mura, na marende akwa meni shisheumisaa mira myoose ya Misri. 26A ndesa nkwiitye ni yeny shiletana indo llya kasha na uka elyo mapookyony; shashemarisya ulaalu, lyive ishora lyafo ulaalu irumata miri ive nrapu. 27Nkyo kimaruma vandu vawo vakatura finya, vakatirwa mmbwerei na isavaa nnu; vakavaka mare a mbuveny; lyingyi vakavaka miri mivisi ilatiri finya, sha nganu kulaore tammikkwa. 28Kya indi shikwiishi, yaanga na isomuka lyafo na unyafi kuletira kimaruma kyakwa. 29Kimmba unyafi lwafo lulefika maarwiny akwa mmbo shishevikaa minya mbweny yafo na iraya kamu kana kyafo na yeny shishekuviraa na shia ilya sheni kulesha nayo.

30Na elu llo lushevaa wende lwafo Esekia. Mwaaka yeu mmbo mushelyaa shoonga eto timyaa sheni efo mareminy any. Na mwaaka wa kavii mushelya mbeu ta vayo. Mwaaka va kararu, remeny, vaakyeny mbeu na iilula na ilya. 31Valya valesaau va mmba ya Yuda vashevangaa na ifumbuka. 32Mashika efo Yerusalemu kusheukaau valesaau na valya efo ifumbuny lya Sioni Nndumi Iruva ashemarisyaa ishora lyakwe.

33Naasany, Nndumi Iruva mmbo aamba ule kya mangyi ya Ashuru we nnyasheangaa muriny eu-fo, nta nnyashorisaa mfe wa urovi lwakwe kunu-fo. 34Shia ilya sheni alesha nayo nnyo ashewuyaa nayo, nnyasheangaa muriny wany-fo. Ni Nndumi Iruva aamba. 35Na yeny mmbo shisheuringaa na iuleka muri yeu, kimaruma kyakwa na kya ishinga lyakwa, “Davidi.” Ni yeny Yahwe arera.

36Kio kilya kyeni nsu wa Nndumi Iruva kandewaa vasikari fiku iyana llyimwi makumi nyanya na varaanu va vaasikari, na kyeeri vandu valekwiipoo ngama vakakooya minying'a yaawo. 37Naasa Senakeribu mangyi va Ashuru kawuya Ninavi kakaafo. 38Kyeeri ekee itereva efo mmba ya Niskori, maruva awo, vana vakwe Adrameleki na Sheresa vakambwaa na upanga vakarishya uruka lwa Ararati na mwana wakwe we Esra-hadoni kashilya uruka ando a ndeye.

Currently Selected:

ISAYA 37: MAS2

Highlight

Copy

Compare