Zimbazi 9
9
Mahala no Wulele
1Mahala, yazenga kaya yakwe,
yakayiseseza ne masumbili mupunghati.
2Yakatemanga ng'ombe yakwe so sikukuu,
yakayihanzahanza ne divayi yakwe,
yakavitenga vyose ha meza.
3Yakawa kuwatuma wetumami wakwe we cicekulu,
wabite wakeme hacanyha,
i hanhu hono henucile muno mwi'kaya,
wawalalice wanhu wawe kutya,
4“Ale muze akuno,
anye mo wanhu mono musina mahala!”
Na kuli munhu mulele yakutya,
5“Ale wuze akuno wulye ndigwa yangu
no kung'wa divayi yangu yono hanzahanzwe.
6Muwuce mwi'puga lye wanhu walele,
ho muwumipe.
Mujendele mu nzila yo wizuce.”
7Na hono wumufunde munhu mubezi,
kokwitujila soni go mweneco.
Na hono wumutacile munhu mubi,
kokwitamisa go mweneco.
8Holeka yili ciba wulece kumufunda u munhu mubezi,
hambi nha kokusula.
Ninga hono wumufunde munhu we mahala,
ayo langa kokuhulika.
9Ne nghani yo yose yono koyilonga kuli munhu we mahala,
ayo yomunoza yawe ne mahala muno.
Ne nghani yo yose yono komulonjela munhu we ling'ani,
yiyo yomonjeleza wizuce wakwe.
10I cogopo co Muwaha Mulungu,
wo mwamulizo we mahala.
Na hono wumumanye Mono Yelile,
ale kowa watuga wizuce.
11Nago mahala gokonjelezeza myaka yo wikale wako.
12Nagwe kowa mwi'walo lye wanhu wono wena cambuzi,
hono wuwe wina mahala. Ninga hono wugaleme mahala,
ale, kowa wuli mwi'puga lya wono wotuga magazo.
13Nawo wulele,
wihwanile ne lizozo, no wu wula mahala,
wo mucekulu mono yasina cevu.
14Hambi mwene nha kekalaga ha mulango we kaya yakwe,
hamba lunji mwi'goda lyono liwicigwe
i hanhu hono henucile muno mwi'kaya,
15na kolo yakuwawona i wanhu wono wakupuluta baho,
wono wali mu zawo,
nalu wakuwuya ku zikwawo,
kawa kuwacemeleza yakutya,
16“Alu, muze akuno anye nyo wanhu mono musina mahala!”
Na kuli walele yakutya,
17“Malenga go kuhiza gali muzinzi.
Ne ndigwa yono yikuligwa cinyele,
nayo swanu muno.”
18Ninga munhu yuyo,
yakuwa si yamanyile vyono wanhu wose wono wenjilaga mu kaya
yo mucekulu yuyo, wafwizaga.
Na vyono wose wono wakondya kwinjila,
alu wali kusi ye yisi ye wafu.
Currently Selected:
Zimbazi 9: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.