Zimbazi 8
8
U lukumyo lwe Mahala
1Ale ta muhulicize!
Mahala gakucemeleza.
No wizuce nawo wukulonga wihindile.
2Mahala yemile mu matunda mucanyha behi ne nzila,
sunga na mono getang'aniye mabalabala.
3Yakucemeleza yali ha ciligati ye likaya yakutya,
4“Nghumucemenyi nyenye nyo wanhu wose mono'nze,
nghumunenenyi nyenye nyo wanhu.
5Anye mono musina mahala,
mutuje wizuce,
nanye mo walele,
mweze ne nhumbula yo wumanye.
6Muhulice, zinghani zangu ziswanu,
hambi zose zono nghumulonjelenyi,
nha ze ling'ani.
7Na zono nghulonga,
nghulonga za mbeka,
hambi'ne nha si nyendile wulambi.
8Holeka zose zono nghulonga,
nghulonga za mbeka musina nghani ya wulambi,
hamba ze liwanjilila.
9Kuli munhu mono yena wizuce,
zizi zose zili calinze,
kanyhi zili ling'ani kuli wose wono wena wumanye.
10Holeka ciba mugehaje mejizo gangu,
si nho kwihaga fweza.
Yili ciba mwihaje wizuce,
si nhe zahabu nengu.”
11“Ane yo nene Mahala,
yo nene du mono nomukwilenyi,
si nhe vibwe vyo wuguzi wukamu,
hamba hasina cinhu co cose cono kocisaka cono
cosuma kwihwananizwa na nene.
12Ane yo nene Mahala,
kanyhi nina no wizuce,
kanyhi nina no wumanye hamonga ne ning'aniza.
13I cogopo ca kuli Muwaha Mulungu,
ciletaga kusula wubi.
Nane hamba si niwendile widunhumuzi hamonga ne cibede,
hamonga ne zinzila zimbi,
ne zinghani zo wulambi.
14Nane nghali kwihwesa,
ho niwawusize lukulu hambi
nha nina wizuce kanyhi nili vilungo.
15Niwatazaga watemi ho wateme,
no kunoza wuling'anizi wuswanu.
16I wawaha wakutema so wutazi wangu,
hamonga ne walongola,
sunga ne walamuzi wose we'nze.
17Niwendile wono wanyendile
nayo mono yakunondola, kombona.
18Ane nina wugoli wose ne lilumbo,
vyono nosuma kumugawilenyi,
no kumumotyenyi.
19Na vyose vyono nomupelenyi,
nha viswanu vicizize
zahabu nengu,
hamba fweza swanu.
20Nane niyityatyaga nzila yo mugoloka du,
nhyatyaga zi nzila ze ling'ani
21ho niwapele zisawo wose wono wanyendile,
nizimemye zikaya zawo ne viwutwa.”
22“U Muwaha Mulungu nha yamula kumumba'ne katali,
mu mwamulizo we milimo yakwe.
23Ane nha nasimywa ku wulawa katali na katali
ha mwamulizo,
na lono yinze yali yikali si yinawa.
24Ane nghalelwa lono ne lilenga lyali likali hasina
na lono vikolongo vye malenga vikali vili hasina.
25Hambi 'ne nha nalelwa na lono matunda gali gakali,
ne vigongo vyali vikali nasimywa hanhu hayo.
26Na lono Mulungu yali yakali
nayiwumba yinze ne mawimbi,
hamba muhangha mulongozi wa mu funzi.
27Na lono yawikanizaga wulanga,
nane nali kuko,
na lono yawikaga cisolo ce lilenga.
28Na lono yagawikaga mavunde mu mwanya,
nali kuko,
sunga na lono yadigulaga mivwilo ye lilenga.
29Na lono yalilajilizaga lilenga hanhu hayo,
ho lilece kupuluta vyono yalilajilize.
Na lono yawusimizya musinji we yinze, ane nali kuko.
30Hambi nha nali hamonga nayo,
nho mwitumami munghula.
Nghawa kumusangalalila nhondo zose,
nghawa kusecelela hali mwene.
31Nghayisecelela yinze,
nghendezwa ne zinghungugo ze wanhu.”
32“Holeka lu wanangu,
muhulicize 'ne mwitume nha vyono nimwijizenyi,
nanye mosangalala.
33Mweze mwina cihuliko kuli zose zono mukwijizwa,
mweze ne mahala,
mulece kuzibedegala yaye.
34Yo mumoti munhu mono yakuhuliciza'ne,
yalindilize ha milango ye kaya yangu.
35Hambi mono yakumbona 'ne,
nha kawonaga wumi,
nayo Muwaha Mulungu kokwendezwa nayo.
36‘No munhu mono si yakumbona'ne,
yakwitamisa mweneco.
No munhu mono yasulile 'ne,
ayo yendile lifwa.’ ”
Currently Selected:
Zimbazi 8: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.