Zimbazi 7
7
1Gwe mwanangu,
wukamise zono nghulonga,
wulece kusemwa zono nghukulajiliza witume.
2Wibataje malajilizo gangu ho wuwumipe.
Wibate mejizo gangu ko wulanjilizi muno,
nha vyono kugalanjililaga meso gako.
3Weze wugebate mapango gose,
wugandice mu nhumbula yako mugati.
4Wuganoze mahala gawe yo lumbulyo,
no wizuce nawo wuwe yo mwendece wako.
5Navyo vyokucitila kuli wacekulu we wanhu,
na kuli wacekulu wono wena nghani zo wupepelezi.
Mucekulu we mikalile yo wusenyha
6Mwi'zuwa linji,
nali sunjiliye mwi'dilisha lya mu kaya yangu,
7nane nghawawona wazelelo wenji walele,
na mumo muli wazelelo wawo,
nghamuwona muzelelo yunji mulele.
8Muzelelo yuyo,
yakolaga mu nzila,
yono yikolile behi ne kaya,
yono yekalaga mucekulu yunji.
Nayo muzelelo yuyo,
yakolaga behi ne kaya yo mucekulu yuyo,
9mwi'pango lye cinyamihe,
lono kwali kwatukuwala.
10Nayo muzelelo yuyo,
vikawa kwitang'anila no mucekulu yuyo,
nayo mucekulu yuyo,
yali yavwalile kotya mucekulu musenyha,
akuno yena no wiwikanize wakwe.
11Yena meso makali,
yasina ne cevu,
yali yazoweye kujendajenda mu zinzila,
hamba
12kwima ha cipeto,
yalindilize walume.
Na hanji mumo mu zinzila,
hamba mu zi sokoni.
13Mucekulu yuyo,
yali yeza kwitang'anila no muzelelo yuyo mulele,
yakawa kumukumbatila muzelelo yuyo,
yakawa kumunonela,
akuno yamulanjile ku meso, no kumutya,
14“Ane zuwali ndavya vilavywa,
holeka ku kaya yangu ko yili nyama ye makumbiko.
15Holeka nane niwa kuza ku kuno kono nzila,
ho nghulondole.
Nali kusaka nghuwone,
kumbe nalu nakondya kukuwona!
16Alu ku kaya yangu,
nakondya kutandika citanda cangu ne mitote ye mawala,
yono yilawaga ku Misili.
17Nakondya kucimiziza citanda cangu vye mhunjile swanu,
hamonga no wugutika,
no wudi no mudalasini.
18Holeka lu, kenhe cibite,
cikagone sunga wele mitondo hakali mitondo.
Ciyisangalazize mu wikumbatile wetu.
19Hambi mulume wangu nha yakali yali hasina.
Yabita muhinzo wa kutali muno.
20Yabita kulondola sawo,
na holeka si kowuya mbela,
sunga vipulute vilo yikumi na vine ho yawuye.”
21Hodu mucekulu yuyo,
yakamukwega muzelelo yuyo kwe vitombo vyakwe,
akuno yakumupepeleza na nonga swanu muno.
22Hanyuma hadodo,
nghawona muzelelo yuyo yeza kumutyatya mucekulu yuyo,
nha ng'ombe yono yikubita kuwulagwa,
hamba nzimba yono yikwibananjila mu mutego,
23lono yakondya kugumwa,
ne songa yapuguza ko ku nhumbula kugati.
Na mbeka, muzelelo yuyo,
yali yehwanile nhe ndeje yono yikwitegula ku lwavu.
Hambi nha si yasuma kumanya vyono wumi wakwe wuli mu mbali.
24Holeka wanangu, muhulicize 'ne.
Mutejeleze muno kuli zono nghulonga.
25Mulecele lukulu kumuleceleza mucekulu we liwala lilyo,
yamusumenyi,
hamba mulece kumusejelela yaye.
26Hambi nha yawagwisize wenji,
kanyhi yawambuze wanhu wenji wafwe.
27Holeka hono mwijelele du mubite ku kaya yakwe,
ale, mowa mwenjila mu nzila yono yibitile ku yisi ye wafu.
Nayo yo nzila ye ndumula yo kufwa kamonga.
Currently Selected:
Zimbazi 7: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.