Zimbazi 28
28
1Nawo i wabi, watizaga wakumangha,
na hono hasina munhu wo wose mono yakuwawinga.
Ninga u munhu we ling'ani, yapetuce yenha simba.
2Nalyo likungugo,
hono liwe lyenjila mu wituma zimbi,
likawanizaga watemi walyo.
Ninga hamba nhavivyo,
likungugo lyowa lili vilungo,
hono liwe lina walongola we mahala no wizuce.
3No munhu mono yena wulajilize,
kanyhi ho yawe kuwewonela i waciwa,
yehwanile mvula mbaha,
yono yihodangaga vilimwa.
4Na hono wuwe si kuwucelelelaga wulajilize,
nagwe wehwana i wanhu wabi.
Ninga hono wuwe wukuwutyatya wulajilize,
si kohoswa yaye,
5Ne wanhu wabi,
hamba si wayimanyaga ling'ani yaye.
Ninga wono wamuhembaga Muwaha Mulungu,
wayimanyiye lukulu.
6Ciba hono wuwe muciwa, ninga wuli mwihuwilwa,
si nha kuwa wuli mugoli, na kuno si wuli mwihuwilwa.
7No muzelelo mono yakuwuhulika
no kuwutyatya wulajilize,
yuyo yena wizuce.
Ninga mono yakwilunza ne wanhu wono si wanojeye,
kamuletelaga sogwe cevu.
8Na hono wuwe kutugaga wugoli wako,
mu nzila yo konjeleza cambuzi hamonga no wukonji kuli wanhu,
ale, wumanye vyono, sawo yako yiyo,
yolohamila kuli yunji mono yali lusungu ku waciwa.
9Na hono wulece kuwutyatya wulajilize,
nayo Mulungu kowuwona wulombe wako si wuswanu,
hamba si kowuhulika yaye.
10Hono wumukwejeleze munhu we ling'ani,
no kumugwisiza mu wubi,
nagwe kogwila mu mutego wako go mweneco.
Ne wanhu wono wasina wusutye,
wohumbilizwa cihumbilizwa ciswanu muno.
11Nawo wanhu wagoli, nhondo zose,
wene wehwesaga nha vyono wena mahala.
Ninga kumbe u muciwa,
mono yena wizuce mu mikalile yakwe,
yuyo yo yamumanyile mugoli viswanu.
12Ne wanhu waswanu lono wakutema,
wanhu wose wakuwasangalalila.
Ninga kolo wanhu wabi wakutema,
i wanhu wakwihundika.
13Na hono wujendelele kuwuhundika wubi wako,
mbeka hamba si komoteswa mu mikalile yako.
Holeka yikunojeye wunene wubi wako, wuwulece,
nayo Mulungu kokuwonela lusungu.
14Weze wuli cihuliko kuli Muwaha Mulungu nhondo zose,
nagwe kowona nyemo.
Ninga hono wuwe wusina cihuliko,
mbeka kokongomezwa.
15Ne wanhu waciwa,
si watugaga wutazi kuli mutemi mubi,
hambi nha mukali,
yehwanile simba yono yikukoloma,
hamba dubu yono yidabuce.
16No mutemi mono yasina wizuce,
kawezaga mugazi muno.
Ninga mono yawusulile wusulumizi,
yuyo kotema vilo vinji.
17No munhu muwulaji,
kehimbilaga citenjelo cakwe musunho.
Holeka wulece kumwimila.
18Weze mwihuwilwa,
holeka nagwe kokwikala wupolile.
Ninga hono wuwe si wuli mwihuwilwa,
kogwa musunho.
19Nayo mono kalimaga yahidimbaye,
kawezaga na ndigwa nyinji.
Ninga i wanhu wono wajilizaga vipango bwete,
wowa kwikala vyo waciwa du.
20Ne wanhu wehuwilwa,
wowa wena mikalile yono yina wusangalale.
Ninga mono yakuseka ho yatuje wugoli musunho,
mbeka kolipicizwa.
21Nako kuwahijila mbejele wanhu, si kuswanu ng'o.
Ninga mahakimu wanji,
wakonga-kongwaga mu nzila yo kupegwa cinhu cidodo du ca mafupo.
22Ne wanhu wabugu, weyohaga kwitujila sawo,
hamba kumanya zono zowagana hanyuma.
23Wumutacilaje munhu, hanyuma nayo kokwendezwa,
si nha agwe kwiyendeza kuli mwene.
24Na mono yakwihwesa vyono,
si'sutya kuwahiziza walezi wakwe,
yuyo yakusutya, hambi wuhizi,
nha wuhizi du nhe wahizi wanji.
25No munhu mubugu, kasagahizaga mazozo.
Ninga agwe, wiyohe kumwitumbila Muwaha Mulungu du.
26Kanyhi yo nghani ya wulele,
hono wuwe kuyiwambaga zono watemya gwegwe du.
Holeka wilanjilile, vyono yili ciba,
hono wuwe kuwuhulika wulanjize we wanhu we mahala.
27Wuwapele waciwa, nagwe hamba si kokwanjila cinji yaye.
Ninga hono wulece kuwataza waciwa,
wanhu wenji wokulijita.
28Wanhu wehundikaga, lono wanhu wabi wakutema.
Ninga wawo kolo wawuswa mu wutemi,
i wanhu we ling'ani kanyhi wo wotema.
Currently Selected:
Zimbazi 28: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.