Zimbazi 22
22
1Ciba kuhagula litagwa yiswanu, si nho wugoli.
No wendezwe, si nha fweza na zahabu.
2U mugoli no muciwa, wose wehwanile du.
Hambi Muwaha Mulungu,
nha yo yawawumba wose vyono wejete.
3Ne wanhu wono wena wizuce,
wawonaga mbali zikuza, wawa kwilega.
Ninga mono yasina mahweso, keyinjizaga,
na hanyuma kawa yali mu cililo.
4Wumuhulice Muwaha Mulungu,
weze wuli mwinenenyhezi,
nagwe kogolipa, kotuga lilumbo,
kanyhi kokwikala vilo vinji mono'nze.
5Na hono wuwe wuwendile wumi wako,
ale, wileje ne mitego yono yiwagwizaga i wabi mu zinzila.
6Wumwijize mwana mudodo,
mikalile yono yimunojeye.
Nayo kozikumbucila mu mikalile yakwe yose.
7Nawo waciwa wezaga wo wetumami we wagoli.
Kanyhi vyo yinha, hono wukope ca munhu, hodu,
nagwe weza wuli muwanda wo munhu yuyo.
8Na hono wuhadice mbeyu zono si ze ling'ani,
magayo gokuziza.
Ne nghani yo kuwewonela wanji, yowuka.
9Weze wuli lusungu, muhanje ndigwa ne waciwa.
Nagwe mbeka komoteswa.
10Wumuwingaje u munhu mwidunhumuzi,
mu widunhumuzi wakwe.
No wiwanganile wose womalika,
hamonga no wuma wose.
11Na hono wuwe wina wendo wo wele wa mu nhumbula,
na ku so lihewa lye zinghani zako,
ale, mutemi kowa mwendece wako.
12I meso go Muwaha Mulungu,
gayiwonaga i mbeka hono ho yili,
ninga zinghani ze walambi kazilemaga.
13Nayo munhu mudoba, kekalaga yekaye ha kaya du,
Yakutya ati, simba yomwibata hono yalawile kunze.
14Mucekulu musenyha, mutego.
No mutego wuwo,
wuwagwizaga wono Muwaha Mulungu yawasulile.
15I wana wadodo, wetumaga zo wulele wula kumanya.
Ninga mukotya, wowafunda nyikala yono yiwanojeye.
16Na hono wuwe kuwapela wagoli vipegwa,
no kuwewonela i waciwa walece kugolipa.
Ale, kowa muciwa gwegwe go mweneco.
Nonga makumi madatu ze mahala
17Alu wuhulicize,
nane nokwijiza zono wakulonga i wanhu we mahala.
Wiyijizaje mafundo gawo.
18Nagwe kosangalala, na kolo wukugakumbucila,
kowuyajila kugalonga.
19Ninga ane nghukusaka wumwitumbile Muwaha Mulungu.
Na yiyi yo yikuleka aluno,
nghuhila nghwijize nha vyono zinha.
20Nakondya kwandika nghani makumi madatu ku soko yako.
Ne zinghani zizi, mugati yayo mo wuli wizuce,
hamonga no wulanjize wuswanu.
21Nazo zokwijiza wuyimanye mbeka vyono yinha.
Nagwe kolo weza kuwuzwa,
ho wupitule zinghani ze mbeka.
-1-
22Wulece kumupujila muciwa,
vyono agwe wina vilungo.
Hamba kuwewonela vibi wono wakugazika ha mulango.
23Hambi Muwaha Mulungu,
nha kowahijila zinghani zawo.
Nayo komuwusiza wumi,
u munhu wo wose mono kowawusiza wumi wawo.
-2-
24Wulece kwiyenda ne wanhu wapelu kukolwa makuwo,
wono wena makuwo ge cigazigazi.
25Hambi nha kosuma kwiyijiza wuwe wawo,
nagwe hamba si kosuma kwipitula yaye.
-3-
26Wulece kwiyinjiza mu migawa ya wanji.
No kwihuwiza nha vyono kowalipila.
27Ku soko, hono wulece kusuma kuyilipa,
wosuma kukusolela hamba ne citanda cako.
-4-
28Wulecele lukulu kuteza citanjilo co mupaka we katali
wo mugunda wono walezi wako wawuwika.
-5-
29Wundajilaje ta,
u munhu mono ketumaga milimo viswanu,
nane nokulajila munhu mono ketumaga viswanu kuciza.
Nayo yena ne lilumbo lyo kusuma kwimana ne watemi.
Currently Selected:
Zimbazi 22: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.